¹ Ẹfiẹnii fi idaanini da, dii na ngwụ ẹpa, dii vọọ fi izọ na fuu na ngwụ irẹkụra ọbani anaa shi Ikọọsi. In eyineyishẹ aani, dii ni Irodisi, dii va fi izọ ni irekụra ọbani anaa shi Ipatara. ² Ẹfiẹnii re ẹpa ọnaa jinẹ nangwụ Ifẹnishiya, di ngwụ ọ, di yaa na. ³ Ẹfiẹnii taneyi re Isiprọsi da, dii ẹpa ayi sha zi akọsa, dii navọ irẹkụra ọnọ tụ aka ụvọọfa parafu ni Isiriya, dii na dinẹ tụ Itaya, izẹni ẹpa ayi ya ji ẹnya shiẹtẹ. ⁴ Ẹfi ọnii re eziafụ Ijdsu nin da, dii yi izọ mẹ ẹkụshi ishimba. Di Ifẹ Ọnini si ọ zụ wa ini ẹtoore, dẹẹ mẹ iweọji yi Ipọọrụ ki asọ ni Ijerusanẹmụ. ⁵ Ẹfi ọni mẹ ẹkụshi ọni yaa mẹ izọ da, dii fi izọ. Di enbo, shi ose aanini, shi ezi aanini si yi na tụ jinẹ fini irẹkụra ọnọ. Inaani, dii kuẹtẹ ini ụtọ enyi, dii tuozurenu. ⁶ dii va kụ ẹngwụ nyooda. Inaama ọnọ, dii ngwụ ẹpa, dẹ varama neeshi. ⁷ Inaama ụsoze ayi fụri Itaya, dii na ngwụ Itonemayisi. Dii na kụ ẹnyara ayi anọdọwụ izọ, di ya pe wa mẹ ọkushi onya. ⁸ Ini eyineyiẹshẹ aani, di fi izọ ni Isisariya. Yaa ni ineeshi Ifinipi ọkarenube oiza, ọna vi ọnya ẹmẹ gẹ vi ọnọgụvọ ishimba, dii ya pe e. ⁹ Ọnọru ọnọni ọ nyi ezioshi ẹẹna anaa kisẹ, dẹ razi yi yẹ ọnọrụ. ¹⁰ Ẹfiẹnii yi izọmẹ ẹkụshi che, di ọkise ọnyi anaa shi Agabọọsi fụri Ijudiya vẹ. ¹¹ Oo ve tu yi, dọ si ibaanu Ipọọrụ sụ ẹngwụ aani ạfụ ọnri ụvọ, dọ ka, "Ifẹ Ọnini ka, aani ọni Iju nin ana yi Ijerusanẹmụ mẹ vaa sụ ẹzẹna nyi Ibaanụ ọnọni, dẹẹ si ọ chire Ijẹntaini nin ụvọ." ¹² Ẹfiẹnii wụ inọpati irẹyi ẹnẹni, di ẹyi ri ẹnẹna gẹ ra izọ dipẹ yi Ipọọrụ ki asọ shirẹ ni Ijerusanẹmụ. ¹³ Di Ipọrụ tuoshi ka, "Sụ waa mẹ nin aani kẹ, du wee sune, du wee du mi ayi nin? Fụvọki aivi ki a vaa sụ mi kẹnẹ ọnim teni engwụ e zi, ama ki me ze si su ini irẹkụra Ijerusanẹmụ fụvọ irẹsha Ijesu Ananyiyi." ¹⁴ Ipọọrụ me rezi si ki ka vara ọni ọtụtụrụmạ, dii naavọ, dii va kụa tuozurenu ka, "Ọ va si vi Oshomoshi me si o." ¹⁵ Inaama ẹkụshi ẹnẹni, dii kụ ẹnya ayi, dii shirẹ ni Ijerusanẹmụ. ¹⁶ Di eziafụ ẹnyi zẹ vatụrayi fụri Isisariya, dẹ si ọnọrụ ọnyi ọnaa shi Iminasọọni, ani Isiprọọsi, bẹrẹ ẹngwụ, dọ bẹrẹ ọnipaapa eziafụ; ireshi ọzọnọni ọna kii vaa ya. ¹⁷ Ẹfiẹnii ngwụ Ijerusanẹmụ, di anọdọwụ nin ana yi izọ si inoshine mẹ yi ẹtẹrẹ. ¹⁸ Ini ẹyineyiẹshẹ aani, di Ipọọrụ vaturayi ni idi Ijemsi, dii ne tu ki azẹkụ nin yi izọ. ¹⁹ Ọ mẹ kụ wa da, dọ va kaa yụ wa isa bo ọni Oshomoshi mẹ ini akaakana Ijẹntaini nini zirẹgwụ aani. ²⁰ Ẹfiẹnẹ wụrẹyi ọnọni, dẹ sụga yi Oshomoshị, dẹ kaa yọ ka, "Ẹwụ ọnyara ayi, a vu ree, aza akaashi akaashi avaavọ ana dọwụ ini akaakana Iju nini. Enbo ẹ daninya da ka ẹn vaa vatụra ofi. ²¹ A karẹyi yụ wa inọpati awụ nin da, kụ waa zụ Iju nin ana yini akaakana Ijẹntaini nin ki e yi ofi Imosisi tẹtẹ, ki asẹ kụ ji ozi aanini ụma, onri ki asẹ kụ vatụra isoshiẹtẹ oshuku. ²² Sẹnọvọri ki ya mẹ kẹ? Ọzi nyi ki ẹ zaa wụ kụ waa vẹ da. ²³ Fụvavọ, misa ọni ra ka yụ wụ. Azenẹ̣ẹna yini akaakana ayi ana ji ireji shi Oshomoshi. ²⁴ Si azẹnẹni, di ẹwụ rụ wa ọ na vara ẹngwụ awụ nin ọnini, du we pe wa suta, doti ẹ zụ fara ẹyirẹsụ aanini. Ẹfiavọ, di ọzọọza yẹ ka irẹyi ọna ka inọpati awụ vi apinẹ. Doti ẹ yẹ ki ẹwụ vana za vii vaatụra ofi. ²⁵ Ama, inọpati Ijẹntaini nin ana nyi ọdọwu da, dii chẹrẹ iwe na kaa yụ wa ka ẹ kavana yi isẹna si mẹ isẹvọ yi ori nini; ẹ kavana yi anya ọnri uye ene simọbẹ; doti ẹ zẹ kavana yi itutu asụ." ²⁶ Inaani, di Ipọọrụ si anẹrụ ẹnẹ, ini eyineyishẹ aani dọ ngwụni Itẹmpụrụ, inaama ọni ọnrụ wa vara ẹngwụ aanini ọnini da, do showu yụ wa ẹfi ọni ọvivara ẹngwụ ọnini aanini vaa zẹtẹ, poro ne tu ẹfi one ve sii pe ọzọọza si isụpa aani misẹvọ aanini yụ wa. ²⁷ Ẹfi ọnọ vọ che di ẹkụshi ishimba ọ gụ, di Iju ẹnyi ana fụri Eshiya vẹ; ẹfiene re Ipọọrụ ini itẹmpụrụ, dẹ kụshi azọkọni anayi izọ inẹ, dẹ za a. ²⁸ Dee nowu ka, "Ẹwụ nin ani Isrẹni, mọgụvọ yi yi nin ee. Ọzọnọni ọnaa ngwụọ ziizi, dọọ zụ aza iirasha tụrirasha ki ẹẹ mẹ osieyiwụ yi Iju nini, ọnri ki asẹ vatụra ofi Imosisi, ọnri ki asẹ sụbani yi ireshi Oshomoshi. Ọọsifini ọnọ, dọ vana bẹ zẹ kụ Igiriki nini vini itẹmpụrụ, de vee du irasha ọnini ọnọni." ²⁹ Fụvọki, e bidi re ọn ri Itrofimọọsi ani Efisọsi ini iboro, de ro ki Ipọọrụ ọnọ si ọ vini itẹmpụrụ. ³⁰ Irẹkụra ọnọ bo dọ si vazi, di aza zue ni izọ, dẹ na za Ipọọrụ, de tura a fiini itẹmpụrụ, dẹ sẹ gu oze. ³¹ Ẹfiene sioze ki ẹnẹ wụ Ipọọrụ, di itụ ve tu oshirẹkụ ashoja nin bo ki Ijerusanẹmụ o si fura bo. ³² Ụmụmọ, dọ sẹ kụ ashoja ọnri ọga ashoja ẹnyi, de zue ne tu azọkọni ẹnẹ. Ẹfiẹni azẹnẹ re ọdividi ashoja ọnri ashoja ẹnẹ, dẹ fụri Ipọọrụ ụvo,̣ de rei ku tu o. ³³ Di ọdọvidi ashoja ọnọ na za Ipọọrụ, dọ ka a si ẹba ẹẹva sụ ọ. Inaani, dọ va fọ ọ ka ẹnọ vi, ọnri ki sọnọ mẹ. ³⁴ Di azẹnyi ini azọkọni ẹnẹ ee nowu karẹyi ọnyi, di azẹnyi aa kọsa. Fụvọki ọkụ ọzi navọki ọdọvidi ashoja ọnọ ọ wụrẹyi ọnẹẹ ka, dọ kaa yụ wa ki ẹ si Ipọọrụ ngwụ ireshi okata ashoja nini. ³⁵ Ẹfi ono tu opanfuoze, di ashoja nin ku chema fụvọ ọikụ azọkọni ẹnẹ. ³⁶ Di azọkọni ẹnẹ vatụra wa, dee nowu ka, "A wụ ọ!" ³⁷ Ẹfi ana vaa si Ipọọrụ ngwụ ireshi ọkata ọnọ, dọ kaa yi ọdọvidi ashoja ọno kạ, "Mwe ve zuu pe wu karẹyi?" Di ọdọvidi ashoja ọnọ ka, "Ụ waa ka Igiriki? ³⁸ Aivi ẹwụ ọnọ vi ani Ijipti ọna bidii kụ aza bẹrẹ ẹngwụ kachire ijọva ini ene rezi ku, dụụ zẹ kụ 'Ọwụọza' akaashi oze ẹẹna na ngwụni ụnọmi?" ³⁹ Di Ipọọrụ ka, "Iju ọnim vi, fụri irẹkụra Itasọsi ini Isinishiya. Ani irẹkụra ebebani ọnim vi. Mee fisue, navọ me pe azẹnẹni karẹyi." ⁴⁰ Ẹfiẹni ọdọvidi ashoja ọnọ sioze yọ, di Ipọọrụ shirẹ tụra ọpanfuoze, do miuvọ yi azẹnẹ ki e batọ. Ụmọni ọkụ zadinẹ, dọ si irẹkụra Iburu karẹyi yụ wa. Dọ ka,