¹ Inaama efura ana yinaani, di Ipọọrụ tụ na shi eziafụ Ijesu nin, dọ tụ wa ụkata, dọ kụ wa nyooda, dọ va fiizọ a ni Imasidoniya. ² Ọ mẹ zi okakooro ẹnẹ parafu, do pe wa kareyi ẹrụrụ ọnọ si tụ wa ụkata da, dọ va fi izọ a ni Igirisi. ³ Inaama ọnọ mẹ ụfẹ ẹẹta izọ da, di Iju nini shọma ki ẹnaa vaa wụ ọ, fụvavọ do roo ki oze Imasidoniya ọnọni va sii zi ụmọni ọni raa varama. ⁴ Ẹnẹna kụafụza ne tu Eshiya vi Isopata ozi Ipairusi ana fụri Iberiya; Aristakọsi ọnri Isekọndusi, ọni ẹnẹviva fụri akaakana anọdọwụ Itẹsaronika; Igayọsi ani Idaabi; Itimoti; Itaikikusi ọnri Itrofimọsi ana fụri Eshiya. ⁵ Ama, anẹrụ ẹnẹni ẹ jitụ yi fiizọ, de nee zi yi Itrowasi. ⁶ Inaama ọni upe ibụrẹdi ana razi nyi ọva parafu da, dii ngwụ ẹpa fụri Ifiripayi, ini ọkụshi ọfụụshi, dii ve tu ẹnẹna yi Itirowasi. Ẹkụshi ishimba ọnii mẹ izọ. ⁷ Ini ọkụshi ipaapa ini ọsẹ, ụmọnii pere ẹngwụ gụ ki ya gẹ ri isari Oshomoshi, di Ipọọru pe anọdọwụ nin karẹyi. Ọọ nyi ọ tụni ọtụtụrụma ki ọn vaa fiizọ ini eyineyishẹ ishọ, fụvavọ dọọ kareyi poro na ngwụ ajirafụ. ⁸ Ọpa ọrụrụ ọnọ yini irẹngwụ ọtụrọsa ọnii pere ẹngwụ tụ. ⁹ Ọọ nyi oziọmụsha ọnyi anaa shi Iyutaikọsi ana yatụ tụni Ozekete, di ara si ọ dọ zi na. Irẹyi ọni Ipọọrụ a ka maa gi gọdọ tụọ, di oziọmụsha ọnọ ọnri eyiarara zina chi fini ọtụrọsa ọfụụta, na nyẹtẹ; ẹẹ na ki e nee ne chema, de ne tu ki o fu su. ¹⁰ Ipọọrụ o chi nẹtẹẹtẹ, dọ tana ẹngwụ aani tụra, dọ za vachirẹngwụ. Dọ va kaa yụ wa ka, "Asuu navọ ki inẹ awụ nin o du nini, fụvọki ọọ mi mẹshẹ." ¹¹ Ipọọrụ ọ varama shirẹ ni ni ọtụrọsa, dọ da ivụrẹdi, dọ risari. Ọ mẹ karẹyi yụ wa poro na ngwụ ajuveyini, dọ fiizọ. ¹² Dẹ si oziọmụsha ọnọ varama nineeshi, dọọ mẹshẹ, di inẹ enbo shinẹ ẹtẹrẹ fụvọki ọ yẹshẹ. ¹³ Dii na yi ẹngwụ ayi, tụọvidi Ipọọrụ na ngwụ ẹpa nọ Asọsi ne zi o, iirasha ọnii nyi tụni ọtụtụrụma kii va ya na yaa si ọ ngwụ ẹpa. Isẹni Ipọọrụ ọn nyẹmbẹ si yi, fụvọki ẹtẹ ọnọ nyi tụni ọtụtụrụma ki ọn vaa zii na. ¹⁴ Ẹfi ono ve tu yi Asọsi, dii si ọ na ngwụni ẹpa, dii fiizọ ni Imaitinini. ¹⁵ Dii va ngwụ ẹpa fi izo, ineyineyishẹ ishọ dii na ngwụ irasha ọna veyika irẹkụra ọna yini akaakana enyi, onaa shi Ikiyọsi. Ini ọkụshi ọfụụva, di ngwụ irẹkụra ana yini akaakana enyi ọnaa shi Isamọsi; ini eyineiyishẹ aani, dii na ngwụ irẹkụra Iminẹtusi, ¹⁶ fụvọki, Ipọọru venee si ki ọnaa zi irẹsụ enyi nọ Ẹfisọsi, fụvọki o zi si ki ono ku i Eshiya; fụvọki ọọ sheeyi ni Ijerusanẹmụ fụvọ ọkụshi Ipẹntikọsiti, aaviki ọ vaa vi ọni mẹ. ¹⁷ Dọ tụ aza fụri Imainẹtusi ni Ẹfisọsi na shi azẹkụ ichọọchi izọ ki e ve tu ọni. ¹⁸ Ẹfi ene ve tu o, dọ kaa yụ wa ka, "Ẹwụ nin nyẹmbẹ ọ yẹ mmẹmẹ si ẹfi bo ya pe wụ nini fụrẹ ọkụshi Ipaapa ọnim si ụfụ shi Eshiya. ¹⁹ Dim vẹngwụnẹtẹ ini ọfifẹkẹ Oshiomoshi bẹri orere; shi ụya onim ri fụvọ ọma ọni Iju ẹnyi ana razi nyi ọdọwụ a shi fụvọ ami. ²⁰ Waa yẹ nin mmẹmẹ razi si isọnsọnyi ana vaa mẹ wụ nin ọiza tẹ yụ wụ nini, shi mmẹmẹ zụ azẹrụrụ ini ibamba, fiini ireshi ọnya na ngwụ ọsa, ²¹ di maa kaa yi Iju ọnri Igiriki nini inọpati oririnẹ varama va ngwụ idi Oshomoshi ọnri ọdọwụ ini Ijesu Ananyiyi. ²² Re nini, maa ni Ijerusanẹmụ ọmẹyani, vene Ife Ọnini mẹmẹ aa za mii zi, ama ma zi yẹ isẹnẹ vaa mẹ mi izọ, ²³ ọọsifini ki Ifẹ Ọnini ọ kamọnọ ka ijaaru ọnri ụya renyi renyi o nee zi mi ini irẹkụra bo ọnim ra ngwụ. ²⁴ Ama, ifẹ ami ọzi vi isọnsọnyi tumeyi, aaviki maa zụ si si echi oni mee zue na zẹtẹ, ana vi ụkọrọ ọdọwụ ọni Ijesu Ananyiyi si yi mi ki maa divenu irenube ọiza ọfẹ Oshomoshi. ²⁵ Re nini, maa yẹ ki ẹwụ nin bo ọni ẹmi ri ọ gaa ngwụọ ziizi, di yee showu ijọva Oshomoshi, ki wai kụa varama re eyi ami nini. ²⁶ Fụvavọ, maa kụrenu ami yụ wụ nin irajini; ọzi nyi ọzọnzọnyi ọni anya aani ya mi irẹsụ. ²⁷ Fụvọki, ọzi nyi isa ọnim si tẹ yụ wụ nini mmaa karenube inọpati isa bo ọni Oshomoshi si yụ wụ nini. ²⁸ Fụvavọ si eyi pe ẹngwụ awụ nini, dụ wa zẹ si eyi pe atẹmẹ nini ọni Ifẹ Ọnini si yụ wụ nin kụ wa mẹ Ọsieyipe tụra nini. Navọ di ọsisi eyi pe iragụ anọdọwụ ọ vi isẹnẹ jụ wụ nin areyi. ²⁹ Maa yẹ ka inaama ọnim raa zi na da, ọdụmi nini vaa ngwụni akaakana awụ nin vẹ, dọ razaa nyi ọzọnzọnyi ọnẹ vaa vayaani ini iragụ atẹmẹ. ³⁰ Maa yẹ ka fiini akaakana ẹwụ nin nyẹmbẹ ki azẹnyi vaa vẹ, dẹẹ va irẹiza rẹsụ chi, doti ẹ zụ roze kụ eziafụ ẹnyi vatụra ẹngwụ. ³¹ Fụvavọ, sieyipeẹtẹ nini, dụ wa tamayi nin ka, irayi ẹẹta tụrama ọnim fụrẹ razi zụvọdinẹ ini ọzizụwụ ẹwụ nin bo bẹri orere, shi ọọdụ shi irafụ. ³² Ọmẹyani, maa sụ wụ nin chire Oshiomoshi ọnri ọiza ọfẹ aani ụvọ; ana vaa mẹ kụ waa fụ ini ụvira nin, dụ wa ze ri re ogu dọ ini akaakana aza bo ọnaa vara ọnini, daa shawa tụ renyi. ³³ Ma zi kụ eyi tụra igoonu, isirava navẹki ita ọzọnyọnyi. ³⁴ Ẹwụ nin nyẹmbẹ ọ yẹ ka ụvọ ami ẹnẹni ọ mẹ isa ana fụ ẹmi ri ẹnẹna ya pemi ri. ³⁵ Ini isa bo, maa si ọ zụ wụ nini ọmẹ vọrọ kụ wa mọgụvọ yi enena razi nyi ụkata ini ẹchẹngwụ, shi ọmẹ zẹ vọrọ kụ waa tamayi irẹyi ọni Ijesu Ananyiyi nyẹmbẹ ka: "Ẹdabẹrẹ yini irẹiza ọmimẹ funa irẹiza orire dọ." ³⁶ Inaama ọnọ maan karẹyi ẹnẹni da, do kuẹtẹ, do bere enbo tuozurenu. ³⁷ Di enbo aa jiorere shụụ, dẹ shara Ipọọrụ kuẹngwụ, dẹ si irenuku o. ³⁸ Di inẹ enbo si du, paapa fụvọki ọ kaa ki ei kue re eyi awụọni. Dẹ va si ọ natụ na ngwụ ẹpa.