¹ Aponọsi mẹ yi Ikọrinti, di Ipọọrụ zi irẹkụra aka ẹbẹẹba va ngwụ Ẹfisọsi, dọ varama vii Ẹfisọsi. Do tu eziafụ Ijesu ẹnyi izọ. ² Di Ipọọrụ fọ wa ka, "U we re Ifẹ Ọnini dọ ẹfi ọnụụ dọ Oshomoshi wụ nin?" Dẹ tuoshi ka, "Eiyee, Ya zi vana wụ inọpati Ifẹ Ọnini." ³ Di Ipọọrụ fọ wa ka, "Yere ẹngwụ isami ọna mẹ yụ wụ nini?" Dẹ voshi ka, "Isami Ijọọnụ ọna mẹ yi yi." ⁴ Di Ipọọrụ voshi ka," Isami oririnẹ varama ọni Ijọọnụ mẹ. Dọ kaa yi azẹnẹ ki ọza ana vaa vẹ inaama awụọni ọnẹ ra dọwụ, ọzọnọ ọnọ vi Ijesu." ⁵ Ụmẹni azẹnẹ wụrẹyi ọnọni, da mẹ isami yụ wa ini irẹsha Ijesu Ananyiyi. ⁶ Ụmẹni Ipọọrụ kụ avọ tụra wa da, di Ifẹ Ọnini chi vẹ va vaku wạ, dẹ kụa karẹyi ini irarẹ renyi, dẹẹ kisẹ. ⁷ Enbo vi anẹrụ ẹwụrẹva. ⁸ Ipọọrụ ọ ngwụni Isinagọgụ, dọ si ayọọvi karẹyi izọ mẹ ụfẹẹta, doo pe waa si irẹyi zama irẹyii re, dọọ sii irẹyii zụ wa inọpati ijọva Oshomoshi. ⁹ Ama, di Iju ẹnyi nyi ọtụtụrụma ọkata, dẹẹ mẹ akamawụ, dẹẹ karẹyi ọshimi inọpati Oze ana vi oze. Fụvavọ di Ipọọrụ fụrẹwa ụvọ tụzọ, dọ si eziafụ aani nạ, dọ naa zụwa isa eyini eyini ini irẹngwụ ọni Itayiranọsi ya zụ aza isa. ¹⁰ Ọ vọọ̣ mẹ gụ irayi ẹẹva, netu ka ẹnẹna yi Eshiya bo ẹ wụrẹyi Ananayiyi, shi Iju nini ọnri Igiriki nini. ¹¹ Di Oshomoshi aa mụkọrọ oshishozeyi ziri ụvọ Ipọọrụ, ¹² netu ki itaone sii nyeeyi ọnri ita-irachi ana kani ọ da, vana si na kanii ẹnẹni ẹngwụ aani razi ni, dọ fụ wa ikụ sha, ọnri ka dọ dụ ifẹ azeeshi jinẹ fini ẹngwụ aanini. ¹³ Ama, dọ va nyi Iju ẹnyi ana vi ọnirakụọ, anaa dụ ifẹ azeeshi jinẹ fini ẹngwụ aza ọnri fini irasha ọnya na ngwụ ọsa, anaa zi izọ paraafu. Dẹẹ shi irẹsha Ijesu Ananyiyi doti ẹ zụ nyi ụkata fụ ifẹ azeeshi sha, ụmẹnẹ ra ka ka, "Zirẹngwụ Ijesu ọni Ipọ̣ọrụ e showu aani, maa sụmọ kaa yụ wụ ku ̣wa jinẹ." ¹⁴ Ezianẹrụ ishimba ana vi ezi Oshirẹsụ Arụfa Iju nini anaa shi Isikiva, ẹnẹ maani aa mẹ isẹnẹni. ¹⁵ Di ifẹ azeeshi ọnyi tụwooshi ka," Maa yi Ijesu, maa yi Ipọọrụ; ama, ẹnẹwụ nin zẹ vi?" ¹⁶ Di ifẹ azeeshi ọna yi ini ẹngwụ ọzọnọ ji tụra ọnirakụọ ẹnẹ, do tu wa, dọ mẹ wa sẹkẹ sẹkẹ. De zue jinẹ fineeshi ọnọ, ẹn ri afụafụ, shi ẹngwụ anava anava. ¹⁷ Aza bo vana wụ irẹyi ọnọni, sḣi Iju ọnri Igiriki nin, ana yi Ẹfisọsi. Di angwashi kue shi wa, dẹ vaa si ụbani yi irẹsha Ijesu Ananyiyi. ¹⁸ Di anọdọwụ ẹrụrụ ẹrụrụ ẹn zẹ vẹ, dẹ va dụvọ aichama aanini. ¹⁹ Di azẹrụrụ ana vi anẹtụravọ kụ iwe ẹtụravọ aanini vẹ, dẹ rụ wa ira ini eyi aza bo. Ẹfi ana zama iwe ẹnẹ mẹ nyirishi tu, oo tu isiriva akashi akashi oze ẹbẹrẹva rẹwu (50,000)̣. ²⁰ Fụvavọ, di irenube ọiza Ananayiyi garashi irasha bo inoze oshishozeyi. ²¹ Inaama ọni Ipọọrụ si ụkọrọ anọdọwụ ọni Oshomoshi kọ mẹ zẹtẹ da ini Ẹfisọsi, di Ifẹ Ọnini si ọ tụ ọ ọtụtụrụma ki ọ ni Ijerusanẹmụ, do ve ro o ki ọno si ̣zi oze Imasẹdoniya ọnri Akaya. Dọ ka, "Ụmọnim re tu izọ, mbẹdọ vee tu Iromu." ²² Di Ipọọrụ tụ Itimoti ọnri Ẹrasitọsi ni Imasidoniya; ẹnẹviva vi ọnọgụvụ aani ana bidii mọgụvọ yọ. Ama, di ọn nyẹmbẹ yi Eshiya ini ẹfi keere. ²³ Ẹfiavọ, daa siọ kata wa ẹngwụ ini Ẹfisọsi fụvọ Oze Odọwụ aanini. ²⁴ Ọ nyi anakuru ọnyi ana yi izọ ọni irẹsha aani vi Idẹmẹtirọsi, ọna si isiriva tụra ụmama Idayana; dọ mẹ ki oze ofu ọ fụ sha yi anụkọrụvọ ana yi izọ. ²⁵ Fụvavọ, do pere ẹnẹnaa mẹ ẹngwụ ụkọrọ ọnọ bo, dọ ka, "Ẹwụ nin Adayi, waa yẹ nini ka ofu ọnọni vanaa si ẹkẹshi ngwụreshi yi yi kokoro. ²⁶ We re e, dụ wụ nini ka, aivi ini Efisọsi renya, ama ini ọkakooro Eshiya bo, ọni Ipọọrụ ọnọni yaa kuushi aza ẹrụrụ inẹ, dọọ va wa eyi fini ori ayi. Dọọ kaa yụ wa ka ori ẹnẹni vana si ụvo mẹ, ka ẹzi vi Oshomoshi. ²⁷ Ọzi vi ẹyi renya ọni ofu aani e sheni, ama ireshi irafẹkẹ ori Idayana ọbani nyẹmbẹ vọne ku vee re venebiri isẹnẹ razi bẹri. Ẹfiavo,̣ ụbani aani dọọ si da kụrạ, ori ọnọ vi ka ani Eshiya bo ọnri anẹshe bọ aa fẹkẹ. ²⁸ Ẹfi ẹnẹ wụ irẹyi ọnọni, di ayi kụ wa, de nowu, dẹ ka, "Idayana ani Efisọsi nin vi ori ọbani." ²⁹ Di irẹkụra ọnọ bo si vazi, di anrẹkụra ẹnẹ bo zuechi na ngwụ ireshi ọbani ọni aza pere gụ tụ. Dẹ bidi za Igayọsi ọnri Aristakusi, ana vi azẹnẹva ana fụri Imasidoniya, ana vaatụra Ipọọrụ jinẹẹ tụra. ³⁰ Ipọọrụ mee si ki ọnaa ngwụ ini akaakana azọkọni ẹnẹ na, di eziafụ ana yi izọ za a dinẹ. ³¹ Di ọdọvidi anụkọrọ ẹnyi ini ọkakooro Eshiya, ana vi ọta Ipọọrụ, ẹn zẹ tụtụ shi Ipọọrụ ki asọ ngwụ ireshi ọbani ọnọ. ³² Aza ẹnyi ee nowu ka isọnyi, di azẹnyi ee nowu ka ọsa, fụvọki azọkọni ẹnẹ bo vono isa bo shagasheyi. Ẹrụrụ aanini ẹivan yẹ isẹnẹ ẹni fụvọ aani peregụ. ³³ Di azẹnyi ini azọkọni ẹnẹ na kaa yi Anẹkzanda, ẹzẹni Iju nini aa tụvọ nini ọvidi, fụvavọ di Anẹkzanda miuvọ shu wa doti ọ zụ sha afụ irẹyi ọnọ sha yụ azene peregụ tụzọ. ³⁴ Ama, ẹfi ẹnẹ yẹ da ki Iju ọnọ vi, di enbo si ọngwẹ vọnya, dee nowu tuẹshẹ mẹ ọpati iwakati ẹẹva, dẹ ka, "Atẹmisi Ẹfisọsi ọna nyi Ụbani." ³⁵ Ẹfiẹni ọchẹriwe irẹkụra ọnọ, gu ọkụ da, dọ ka, "Ẹwụ nin ani Ẹfisọsi, o ̣wa nyi ọza ana razi yẹ ka irẹkụra Ẹfisọsi ọnaa sieyipe ireshi irafẹkẹ ori Idayana Ọbani ọnri ụmama one zina fineeku vẹ? ³⁶ Ẹfiọnụ ye ki ọzi nyi ẹzẹna va zụụ jirẹyi ọnọni rẹka, ọvọrọ ku ̣wa navọkụ nini, di asụụ si ọikụ misa ọnọ razi vọrọ kụ wa mẹ nini. ³⁷ Fụvọki azẹnụụ kụ vi ni ireshi ishọọji nin aani, e zi ve yi isọnsọnyi fini ireshi irafẹkẹ ori ayi; ẹi zẹ va ka isaanyisi shi o. ³⁸ Fụvavọ, aaviki Idẹmẹtiriyọsi ọnri anụkọrụvọ anakuru ana ya pe e, ki ẹ va shụ wa irẹka, oze ọ fụ sha yụ wụ nin ọnri ka ọmọkarẹyi nin ọni ijọva ni, yi izọni. ³⁹ Ama, aaviki irẹyi ọsa ọnụụ za vẹ nin, ọnọ vọna vaa tuoshi tụ ini iragụ ọni aza bo ve yee peree gụ. ⁴⁰ Fụvọki, inirẹiza, ava zụụ shiyii irẹka fụvọ ọvivazi irajini, di yee me re irẹka kụ. ⁴¹ Ẹfi ọnọ karẹyi ọnọni da, dọ kaa yi aza bo ki ọzọọza ọọ neeshi.