¹ Ụmọni igomina roo da ki a kụ yi ni Itani, da si Ipọọrụ ọnri anẹngwa enyi tụni afụ Ijuriọsi ana vi ọga ashoja ẹchẹshi ọnyi ini ishoja oshinoyi ki ọ siepe wa. ² Yaa ngwu ẹpa fụri Adụramitiyọmụ, ana vaa jantụụ kwẹẹtẹ na zi aka enyi Eshiya. Arisitakọsi ọna fụri Itẹsaronika ana yi Imasẹdoniya ọ vatụra yi. ³ Ineyineyishẹ aani dii tu irẹkụra anaa shi Isidọni; di Ijuriyọsi sụvọ ọiza za Ipọọrụ izọ, dọ yi ọ oze ka ọ ni idi ẹta aani doti ẹ zụ mọgụvọ yọ. ⁴ Fi izọ di ẹpa ayi ngwụ enyi na, dii si izi aka Isiprọọsi ọni ashi razi ya kụ yi epa, fụvọki ashi vana veyi ka yi aa kụ. ⁵ Ẹfiavọ, yee che irefu parafu da, dii gụrẹ ẹtẹ Isinishiya ọnri Ipamfiniya, di nee chi tụ Imira, ana yini irẹkụra Inisiya. ⁶ Izọ di ọga ashoja ẹchẹẹshi re ẹpa ana fụri Anẹksadira aa ni Itani, dọ kụ yi shi o. ⁷ Inaama ọnii si ẹkụshi ẹrụrụ tangwa aa zi, diivuri ziọ na gụrẹ irẹkụra Inidọọsi, di ashi rai kụ navọ ki ya vatụra oze ọnọ. Fụvavọ, dii kụ veyika oze enyi aka Ikereti izi ashi reezi tu, ọveyi ki Isaamọni. ⁸ Dii vụri ziọ na ngwụ irasha ọnyi anaa shi Ireshi Ụfọọtụ Ọ̄iza ọni ẹpa a dinẹẹ tụ, ana gụrẹ irẹkụra Inasiya. ⁹ Ọmẹyani, yaa si ẹfi du sha kokoro, di ẹfi ọni Iju nin sii bawẹ zẹ si si parafu, dọ si vi aifụrinẹ ki a si ẹpa zi irẹsụ enyi. Di Ipọọrụ kawọnọ, ¹⁰ dọ ka, "Ẹwụ nin anẹrụ, mee re ki ụsoze ayi vaa nyi ọkatẹngwụ, ana va zụụ mẹ ki ya tanava, ọnri ki aivi ogu ayi ọnri ẹpa ayi kẹnẹ ọnọ vaa mishi, ama shi ifẹ ayi vana vaa mishi." ¹¹ Ama, dọ va si vi ki irẹyi ọni ọga ashoja ẹchẹẹshi ọnri azẹna nyi ẹpa ọnọ ka ọnọ si mụkọrọ fu irẹyi ọni Ipọọrụ ka. ¹² Fụvọki ọzi rẹngwụ ki ẹ yi irasha ọni ẹpa dinẹẹ tụ ini ụmẹ ashi, fụvavọ di azẹrụrụ ini anụkọrọ ẹpa mẹ iweọji ki ẹnẹ kava fiizọ di ẹnẹẹ na, ki azẹmayẹ den zụ tu irẹkụra ọnaa shi Ifiniksi, doti ẹnẹ yi izọ ini ụmẹ ashi. Ifiniksi vi izi ẹpa dinẹẹ tụ ini ẹtẹ Ikereti, ana veyika aka ẹbẹẹba izi ọyi zii tụụ fụrẹ, dọ zẹ vi veyika aka ụvẹtẹ izi ọyi zii tụụ fụrẹ. Opomu ọ kụ ini irefu ¹³ Ụmẹni ashi vẹrẹ aa kụ cheeche fụri aka ụvẹtẹẹ vẹ, di anụkọrọ nin ana yini ẹpa ọnọ roo ki ene re isọni ẹnee si da. Ee tura ẹba ana si za ẹpa aanini, dẹ tụ ọ ụvọ tụni irefu, dẹ zi ụtọ irefu Ikereti na gụrẹ ụtubobo. ¹⁴ Ama, ini ẹfi che, di ashi opomu ọnya kụ fụri aka ẹbẹẹba vee tu ẹtẹẹ ọnẹ ya. ¹⁵ Ụmọni opomu ọnọni aa kụ ẹpa, dọ raikụ zụ veyika izi ashi ọnọ aa kụụ fụrẹ, dii kụ fụrẹ ẹngwụvọ yi opomu ọnọ, dọ kụ ẹpa ayi nọ aka izẹnọ kụụ nọ. ¹⁶ Yaa zi irẹsụ enyi ana gụrẹ ẹtẹ anaa shi Ikọda, izi ashi ya rọ che, di vuri sụ ẹpa oweyi ana sii dọzaatụ za ẹpa ọbani. ¹⁷ Ẹfi ene tura ẹpa oweyi ọnọ shirẹ da, dẹ si orupa aani sụ za ẹpa ọbani ọnọ. Di angwa ee shi wa ka ẹpa ọnọ wa va zụụ zi ẹyẹrẹ ene pere tuẹtẹẹtẹ irefu Isayatisi paraafu ọmẹyani, fụvavọ dẹ za ẹba ana si za ẹpa ọnọ, dẹ kụraachi, doti ẹpa ọ tangwaa na. ¹⁸ Ashi ọbani ọnọ ọ mẹ yi sẹkẹ sẹkẹ netu ka ineyineishẹ aani di anụkọrọ ẹpa nini vẹrẹ aa kụ ẹnya ayi vaa shi enyi. ¹⁹ Ini ọkụshi ọfụụta aani, dẹ si ụvọ aanini kụ ẹnyụkọrọ ẹpa va shi enyi. ²⁰ Ẹfiọni ọyi ọnri ụzọmi razi sha tụrayi mẹ ẹkụshi ẹrụrụ, di ashi opomu ọnọ aa kii kụ, di rai kụ nyi iribatọ kii vaa zụ mii mẹshẹ ²¹ Inaama ẹkụshi ọrụrụ onii rezi re isari ri, di Ipọọrụ kwẹẹtẹ dinẹ ini akaakana anụkọrọ ẹpa ẹnẹ, dọ ka, "Ẹwụ nini anẹrụ, ọọ vọrọ ku we yeen bematọ nin, di asi yaan kwẹẹtẹ fụri Ikireti; enya ayi ozi yeen mishi. ²² Ama, ọmẹyani, maa tụ wụ ụkata nini, nyi ayọọvi nini ki ọzọnzọnyi inawụ nin ozee su, ama ẹpa kẹnẹ ọnọ vaa mishi. ²³ Fụvọki irafụ, angẹni Oshomoshi ọnim vi ayaani, ọni maa fẹkẹ, ọ dinẹ pe mi. ²⁴ Dọ ka, 'Asi angwa shu wu, ẹwụ Ipọọrụ. Ụ bẹdọ vaa dinẹ tụnọvidi Isiza, du we re, ki Oshomoshi, ini ayụva aani, ọ kụ ẹnẹni ẹwụ rụ wa gẹ yini ẹpa aani chireụvọ da.' ²⁵ Fụvavọ, ngwareyi sha nini! Fụvọki maa kụ ọtụtụma tụra Oshomoshi ka ọmẹ kọ vaa vi hi mi gẹdẹgẹdẹ, avọ ọmẹ vaa vi. ²⁶ Ama, ashi vaa kụ yi na vaagara tụni ẹtẹ ọnyi ọni enyi varakara." ²⁷ Ụmẹ ọnii mẹ tu irafụ ẹwụrẹna, di ashi aa kụ yi shirẹ vaa chi ini Irefu Adiriyatiki, inọpati ajirafụ, di anụkọrọ ini ẹpa ọnọ ro ka ẹnaa kavaape ẹtẹ ọọnyi. ²⁸ Ee ne ọdọngwẹ ngwụni enyi ki ẹnẹ yẹ ọ mẹmẹ nyinẹ tu, de re ka afụ ẹchẹshi ri ofu rẹwụrẹta (133) ọnọ vi. Ụmẹ ọnọ zẹ da mẹ che, dẹ zẹ varama mọ ọ, de re ka afụ ẹchẹshi (100) ọni izọ vi. ²⁹ Di angwa shi wa ka asi ẹpa ayi va na vanga ini ireta, dẹ kụ ẹba ẹẹna ana sii za ẹpa dinẹ vashi enyi ini aka irama ẹpa, dẹ tuozurenu ki eyi ọ mẹẹ dọ jantụ ni. ³⁰ Umotu di anụkọrọ ẹpa nin sioze ka ene zue fi ini ẹpa ọnọ, ee chi ẹpa oweyi ana va zụ sii zue fiini ẹpa doti a navọ ẹpa ọbani tẹtẹ, dẹ vana kụra ẹpa oweyi ọnọ chi shi enyi, dẹ mẹ apẹ ki ẹnaa kụ ẹba anaa za ẹpa dinẹ, ini ọvidi ẹpa. ³¹ Ama, di Ipọọrụ kaa yi ọdọvidi ashoja ẹchẹẹshi ọnri ashoja ẹnẹ kaa, "Ọchishi ki aza ẹnẹni yini ẹpa, wai zụa nyi ọdidọtụ nini." ³² Inaani, di ashoja ẹnẹ ji obo ọna si za ẹpa oweyi ọnọ dinẹ, dẹ navọ ki enyi ọ si ọ na. ³³ Ẹfi ẹni eyi aa ni, di Ipọọrụ tụ wa ụkata ki ẹ navọ doti ẹ ri isari, dọ ka, "Irajini ọnọ gụ ẹkụshi ẹwụrẹẹna ọnụụ fụre e zi ki ashi ọ ta fụrẹtẹ nin, dụụ razi risari nini; waii ri ri isọnyọnyi nini. ³⁴ Fụvavọ, miyarẹ wụ nini, navọ wa na ga isari yi ọzọọza, fụvọki ọ sẹrẹ kụ wa ri isari dụ wa zụ mẹshẹ nini. Ọzi nyi oza ọnya awụ nini ọni eyirẹsụ aani ọnya vaa tụ fụrẹrẹsụ." ³⁵ Ụmẹ ọnọ maan ka da, dọ si ibụrẹdi, dọ kụ Oshsmoshi avọ ini eyi aza bo, dọ da a, dọ vẹrẹ aa ri isari. ³⁶ Avọ ọ mẹ tụ enbo ụkata, di ọzọọza ri isari. ³⁷ Ẹyi bo vi aza irẹka tụrẹbẹrẹta rẹwụ rishinọnyi (276) ana yini ẹpa ọnọ. ³⁸ Ẹfiẹnẹ si isari ri, di inẹ aanini shi, dẹ va kụ anavọ sha shini irefu, doti ẹpa o roze fẹrẹ. ³⁹ Ẹfiẹni eyi si ni, ẹ zi yẹ ẹtẹ irẹkụra ọnẹ ya, ama de re aka enyi ọni ẹyẹrẹ varakara, dẹẹ fọ ẹngwụ ki ẹn wa va zụụ si ẹpa awụọnini na dinẹ tụzọ. ⁴⁰ Dẹ vaa ji ẹba ana za ẹpa dinẹ, de ne wa va shi irefu. Ẹẹ ngwara orupa ọchi ana sụ za ọchi ọna yini irama ẹpa, dẹ kụra ita ana yini ọvidi ẹpa shirẹ, di ashi tụ ọ ụvọ na ngwụni ụtọbobo. ⁴¹ Ama, dẹ ngwụ enyi anaa jayi, di ẹpa na ngwụ ẹtẹ. Ọvidi ẹpa ọnọ kangwụ ezi ọnọ, dọ rai kụ zụ na, di enyi ọnaa da bụdụ vẹrẹ aa chaka irama ẹpa. ⁴² Aaro ashoja ẹnẹ ọnọ vi ka ẹn vaa wụ anijaaru ẹnẹ, doti asi ọzọnzọnyi aanini fọ enyi jinẹ, doo si zue. ⁴³ Ama di ọga ashoja ẹchẹsi ọnọ ee si ka ọnọ dọ Ipọọru tụ, fụvavọ dọ za aaro aanini dinẹ, dọ va kaa yi ẹnẹne yeyi amẹmẹẹ fọ enyi ka e ji nangwụ enyi doti ẹ bidi fọ enyi jinẹ na ngwụni ẹtẹ. ⁴⁴ Ụmavọ, di ẹnẹnavọ e ji tụra ụpako ẹnri ẹnya ọsọọsa fini ẹpa, dẹ si ọ fo enyi na jinẹ. Aani ọnii mẹ ziọ di ẹyi bo javọ rẹsụ rẹsu, di chi shi ẹtẹ ini ẹngwọrọ.