¹ Ẹfiẹni ọkụshi Ipẹntikọsiti tu, di ẹnbo pere tụrasha ọnya. ² Di ọkụ sụ fineeku ẹbẹẹba ini asigiri, venebiri ashi ọbani mẹmẹẹ kụ, do shi ireshi ọnẹ yatụ tụ bo. ³ De ve re irarẹ nin ene vene ira ana ga tụra ọzọnyọnya aanini. ⁴ Di enbo shi yi Ifẹ Ọnini, dẹ vẹrẹ dẹẹ ka irẹkụra renyi renyi, vene Ife Ọnini mẹmẹ si ọ yụ wa ki ẹẹ ka. ⁵ Ini ụmavọ, ọ nyi Iju ẹnyi ọnọ vi ki Ijerusanemụ ẹnẹ ra, dẹ vi aza Oshomoshi ana fụri irẹkụravabẹ bo ọna yini ẹshẹ. ⁶ Ẹfi ẹnẹ wụ ọkụ ọnọni, di azọkọni peregụ, dọ shagashuweeyi fụvọki aza bo vana wụ ireyi ẹnẹẹ ka ini irẹkụra ọzọnyọnya aanini. ⁷ Oo shuwa eyi, dẹ sharenu sha, dẹ ka inireiza, aivi ani Iganini ọni aza ana kareyi aani vana vi aavọ? ⁸ Ọmẹzi di eyi bo vaa wụrẹyi ọnẹẹ ka ini irarẹ irẹkụra ana ya ma yi kẹ? ⁹ Ani Ipatiya nini, ani Imẹdisi nini, ani Enamiti nini, ẹnẹna ra tụ Imẹsopotemiya, Ijudiya ọnri Ikapadoshiya, Ipọntusi onri Eshiya, ¹⁰ Ifirigiya onri Ipamifiniya, Ijipiti ọnri aka ẹnyi ini Inibiya ọna gụrẹ Isireni, shi azẹga ana furi Iromu, Ipita ọ karẹyi ini ọdẹdẹ Isoromoni ¹¹ Iju nini ọnri ẹnẹna razi vi Iju ama dẹ nyi ọdọwụ ini Isẹni Iju nini dọwụ, ani Ikireti ọnri Arabụ nini, ẹyi bo aa wụrẹyi ọnẹẹ ka inọpati ụkọrọ ọbani Oshomoshi ini irarẹ ayi. ¹² Enbo vono shieyi, dọ shaga shuweeyi, dẹẹ kaa yi ẹngwụ ka, "Sẹnẹ vi ọzarẹsụ irẹyi ọnọni kẹ?" ¹³ Ama, di azẹnyi aa jụ wa isiya, dẹ ka, "Eche ọwọwa ọne fu ọnaa mẹrẹ wa." ¹⁴ Ama, di Ipita dinẹ pe ẹnẹwụrọnya ọnavọ, dọ si ọngwẹ tụẹba, dọ ka yụ wa ka, "Ẹwụ nin anẹrụ Ijudiya ọnri ẹwụ nin bo ọnọ vi ki Ijerusanẹmụ ọnụụ ra nin, navọ dụ wa yẹ isọnọni nini; batọ tụni irẹyi ami nini. ¹⁵ Fụvọki, azẹnẹni ezi fueche vene u me roo nini, fụvọki iwakati ọfụụta ini ọnẹnẹ ọnii ya. ¹⁶ Ama, isẹna zirẹngwụ Ijọeni ọkisẹ ka yi: ¹⁷ Oshomoshi ka, 'Ini ọkụshi ọikọta ọnọ vaa vi, Mva va Ifẹ ami ku anẹshẹ bo. Ezi aụ nin ini anẹrụ shi ini anyẹnẹ vaa kisẹ, ezi ọmụsha awụ nin ve reẹtẹ, ọnri ki azekụ awụ nini vaa rụra renyi renyi. ¹⁸ Ini ẹkụshi ẹnẹ, shi ezida ami ini anẹrụ shi ini anyẹnẹ vọnim vaa va Ifẹ ami ku; ẹ vaa kisẹ. ¹⁹ Mvaa si isoshishiozeyi zụ ini ovurukutu ẹbẹẹba, dim mẹ ọsizụ ini ẹshẹ ana yi ẹtẹẹtẹ aani, anya, ira ọnri areyi irivu. ²⁰ Ọyi vaa vara oozi, di ụfẹ vara anya dọ tangwa vanyi ki ọkushi ọbani Ananyiyi one re zi re ẹngwụ aani yẹẹyẹ o tu. ²¹ Dọọ sivi ka, ọza tụrọza ọna ra shi irẹsha Ananyiyi vana vaa dọọtụ.' ²² Ẹwụ nin ani Isrẹni, batọ tụni irẹyi ẹnẹni: Ijesu Inazareti, ọza ọni Oshomoshi si zụ wụ nini ki ọni ọnọ vi ọza ebebaani ọna karẹyi aani zirẹngwụ ụkọrọ ẹbani, isa oshishozeyi, ọnri ọsizụ ọni Oshomoshi mẹ zirẹngwụ aani, ini akaakana awụ nini, vene ẹwụ nin nyẹmbẹ mẹ yẹ. ²³ Aa si ọnọni chire wụ ụvọ nini zirengwụ eto ọni Oshomoshi me tẹtẹ ọnri ọyiyẹ aani; ama dụụ wụ ọ nini ụmẹ ọnụụ kani ọ za ọchi avashi nini, zirẹngwụ oduofi nin. ²⁴ Ama di Oshomoshi sha a kwẹẹtẹ, dọ naatụ fini ọngwẹngwụ ọna yini isuọwọza, fụvọki isuọwụọza ọi zụ taaku. ²⁵ Fụvọki Idevidi ọ karẹyi inọpati aani, ka, 'Ẹfi bo ọnim si re Ananyimi ini ọvidi ami, fụvọki ọ yini aka ụvọri ami, ana mẹ ki asim tụainẹ. ²⁶ Fụvavọ ọtụtụrụma ami o shi yi ụjẹ, di irarẹ ami jụjẹ. Ọnri ka, ẹchẹngwụ ami vaa nyi ọkụayitụra ini irẹyi Oshomoshi. ²⁷ Fụvọki wa zaa fụri ifẹ ami ụvọ yi Ineeku Ọrọkọtọ, dọ va na si vi kụụ vaa navọ ki Ozi Ọnini awụ ọ vụ vasha. ²⁸ Wa shafụ oze ẹshẹ sha yi mi; ụ vaa navọ ki me shi yi ụjẹ ineyi awụ.' ²⁹ Ẹwụ nin ẹnyara ami, mve zuu juvọkurachi karẹ̣yi yụ wụ nini inọpati Idevidi: oo su, de nee, di irikuta aaani ya pe yi turajini. ³⁰ Fụvavọ, ọkisẹ ọnọ vi, dọ yẹ ki Oshomoshi ọ sheku bẹri ireji yiọni ka, ọnvaa si ozi aani ọnya shirogedẹ aani. ³¹ Ọọ nyi ẹtoore ọnọni tụọvidi, fụvavọ dọọ karẹyi ini ọpati oshisha kwẹẹtẹ Ikristi, dọ ka, 'Azẹzi shiayi aani tụni Ineeku Ọrọkọtọ, dọ va na si vi ki ẹchẹngwụ aani ọ vụ vasha.' ³² Ijesu ọnọni --- Oshomoshi ọ sha a kwẹẹtẹ, dọ si vi ki ẹyi bo vi onivenu aani. ³³ Fụvọki a si ọ shirẹ nẹbẹba da, da si ọ na tụni aka ụvọri Oshomoshi, ọnri ki ọ dọ Ifẹ Ọnini ọna motowu aani yọ finụvọ Adayi da, fụvavọ ọ va Ifẹ Ọnini ọnọ vaku yi da; ọnu wee re,dụ waa wụrẹyi aani nin aani. ̣ ³⁴ Fụvọki, Idevidi ọ zi shirẹ ni ineeku ẹbẹẹba, ama dọ ka, 'Ananyiyi ọọ ka yi Ananyimi ka, "Yatụ tụni aka ụvọọri ami, ³⁵ netu ẹfi ọnim va sii si ọnivi awụ mẹ irẹfụ ọnụụ vaa kụ afụ awụụ shi."' ³⁶ Fụvavọ, navọ di ovuovu ireshi Isrẹni nin bo ẹ yẹ ki ọzi nyi ọjirẹka ka Oshomoshi ọ si Ijesu mẹ Ananyiyi ọnri Ikristi (Ọdazatụ) da; Ijesu ọnọni ọnụụ wụ ini ọchi avashi nin." ³⁷ Ẹfi ẹnẹ wụ irẹyi ọnọni, dọ kani wa ọtụtụrụma, di ẹngwụ aa jụ wa ebe, dẹ fọ Ipita ọnri ọnitụ nin anavọ ka, "Ẹwụ nin ẹnyara ayi, sẹnọ vọrọ ki ya mẹ kẹ?" ³⁸ Inaani, di Ipita kaa yụ wa ka, "Rinẹ varama, doti a mẹ isami yi ọzọnuọnya awu nini, ini iresha Ijesu Ikristi, doti a zụ si aichama awụ nin vayawụ nini, du vee re ọiza Ife Ọnini dọ nini. ³⁹ Fụvọki otoowu ọnọni vana yinaani yụ wụ nini, shi ezi awụ nin, shi aza bo ana yi irasha ana gọdọ fiizọni; shi azẹrụrụ ẹrụrụ ọni Oshomoshi Ananyiyi vaa shi." ⁴⁰ Ọ karẹyi renyi renyi ọnọ si divenu yụ wa, dọ tụ wa ụkata, dọ ka, "Di ẹngwu awu nini tu fini evereze ọshimi ọnọni." ⁴¹ Inaani, dẹ dọ irẹyi aanini wụ, da mẹ isami yụ wa; aza akashi oze ẹẹta (3,000) ẹnẹ vabẹrẹ wa ishọnọ. ⁴² Dẹ vashi irenube ọiza ọzizụ aza vene ọnitụ Ijesu nin mẹẹ mẹ, ọnri ka dẹẹ nyi iragụ anọdọwụ, ini ẹ mẹmẹ gẹ a ga isari ri, ọnri ọtituozurenu vaabẹ. ⁴³ Di angwashi ngwụ aza bo ẹgwụ, dẹ va mẹ isa oshishozeyi ọnri ọtẹrẹwa renyi renyi zirẹ̣ngwụ ọnitụ nini. ⁴⁴ Aza bo ana dọwụ vana gẹ aa ra, di ẹnbo gẹ aa mọnyọnya. ⁴⁵ Dẹẹ na ogu ọnri isẹnẹ nyi bo, dẹẹ ga a yi aza vene ọngwẹngwụ ọzọọza mẹ bani tu. ⁴⁶ Inaani, dẹ si ọma vọnya eyinieyini ini itẹmpụrụ, dẹẹ gẹ a ri isari ineeshi ẹngwụ, fineeshi ọzọnya na ngwụ ọsa, dẹẹ si ụjẹ ọnri ivefu ọiza ga isari ini akaakana aanini. ⁴⁷ Dẹẹ sụga yi Oshomoshi, di aza bo ee re wa eyi. Eyinieyini ọni Ananyiyi a si si ẹnẹnọ dọtụ bẹrẹ wa.