¹ Irẹkụshi ọnyi, di Ipita ọnri Ijọọnụ aa ni ni itẹmpụrụ, ini ọpati agogo ẹta ini ọọdụ, ẹfi ana sii tuozurenu. ² Dọ va si vi ki ọ nyi ọnọrụ ọnyi one suafụ amẹ fụrẹ ma a, dee chema vaa tụni ọchiọfọ itẹmpụrụ anaa shi Ozoza eyinieyini, doti o roze pa ẹkẹshi finụvọ ẹnẹna ngwụni itẹmpụrụ. ³ Ẹfi ono re ki Ipita ọnri Ij̣ọọnụ aa vaa ngwụ itẹmpụrụ, dọ pa wa ẹkẹshi. ⁴ Ipita ọnri Ijọọnụ ẹ feyi shi o, di Ipita ka, "Vareyi re yi." ⁵ Osuafụ ọnọ ọ veyika wa, doo zi ki ẹ vaa si isa yi ọni. ⁶ Ama, di Ipita ka," Ma zi nyi ẹkẹshi, ma zi nyi ọmọ, ama isa ọnim nyi, ọnim vaa si yụ wụ. Ini irẹsha Ijesu Ikristi Inazarẹti, waa zụsẹ." ⁷ Ipita ọ za a ụvọri, do tura a shirẹ, ụmụmọ di ụkata ngwụ osuafụ ọnọ ẹpẹpẹtụfụ ọnri atafụ ụfụ aani. ⁸ Di osuafụ ọnọ ji shirẹ, dọ kwẹẹtẹ dine, dọ vẹrẹ aa zụsẹ; ọ vatụra Ipita ọnri Ijọọnụ ngwụni itẹmpụrụ, dọọ zụsẹ, doo jii shirẹ, dọọ sụga yi Oshomoshi. ⁹ Aza bo e re ọ maa zụsẹ, dọọ sụga yi Oshomoshi. ¹⁰ Ẹ mẹ yẹ ki ọnọrụ anaa pa aza ẹkẹshi ini Ọchiọfọ Ozoza itẹmpụrụ yọ; isa ana mẹ shi osuafụ ọnọ vene shuweeyi, dẹ sharenu sha. ¹¹ Ọ mẹ zi Ipita ọnri Ijọọnụ, di o shi aza bo eyi, de zuechi ve tu wa ini ọdẹdẹ itẹmpụrụ ọnaa shi Ọdẹdẹ Isoromọni. ¹² Ẹfi ọni Ipita re isẹni bo, dọ tụ azẹnẹ oshi, dọ ka," Ẹwụ nin ani Isrẹni, ọmẹzi di irẹyi ana mẹ meen shuweyi nin, duu feyishi yi nini, venebiri ki ụkata ọnri ọnini ayi ọnii si mẹ ki ọnọrụ ọnọni ọọ zụsẹ? ¹³ Oshomoshii Abrahamụ, Aiziki ọnri Ijakọbụ, Oshomoshi ada ayi nini, ọnọ si ụbani yi ozida aani Ijesu, dọ si ọ tụẹba. Ọni ọnọ vi ọza ọnụụ si chire Ipaireti ụvọ, duu yi o tẹtẹ nin ẹfi ọni Ipaireti kaa ki ọ naa vaa fụrẹụvọ. ¹⁴ Wee yi Ọza Ọnini ọnri Ọmanasẹrẹ tẹtẹ nini, dụụ fisue ki akikọnọ a fụrẹ ọwụọza ụvọ yụ wụ nini. ¹⁵ Waa wụ Ẹzẹna si Ẹshẹ Shiẹtẹ nini, ẹzẹni Oshomoshi sha kwẹẹtẹ fiini su --- ẹyi bo vi onivenu irẹyi ọnọni. ¹⁶ Ọmẹyani, zirẹngwụ ọdọwụ ini irẹsha aani --- ọnọrụ ọnọni ọnụ wee re aani nin, dụụ yẹ nin --- irẹsha ọnyọnya ọnọni ọnọ yi ọ ụkata. Ọdọwụ ọna vẹ zirẹnwụ Ijesu ọnọ si ẹngwọrọ ẹchẹngwụ ọgụrigụ inọvidi awụ nini. ¹⁷ Ọmẹyani, ẹwụ nin ẹnyara ami, maa yẹ ka ini arimayẹ ọnụụ ya mẹ isẹnẹ ụmẹ nini, vene oshirẹsụ awụ nin mẹ zẹ mi mẹ. ¹⁸ Ama, irẹyi ọni Oshomoshi ka tẹtẹ zirẹngwụ ọkisẹ nin ka, Ikristi aani vaa rụya, ọni ọnọ va sẹ da aani. ¹⁹ Fụvavọ, rinẹ varama nini, dụ wa varama ka Oshomoshi vẹ, doti azụ nyina aichama awụ nini sha, doti ẹfi ọti tụ wụ nin ụkata ọ va zụ vẹ fiidi Ananyiyi; ²⁰ ọnri ki doti ọ tụ Ikristi vẹ, ọna ni tẹtẹ yụ wụ nini da, ọna vi Ijesu. ²¹ Ọni, ọnọ vi ọza ọni ineeku ọiza bẹdọ vaa dọ poro netu ẹfi ana va sii teni isa bo varama, ana vi irẹyi ọni Oshomoshi ka inọpati aani fụrụmọrụmọ zirẹngwụ ọkisẹ nin. ²² Inirẹiza, Imosisi ọ kaa ka, Oshomoshi Ananyiyi vaa si ọkisẹ ene vene mi kwẹẹtẹ fini akaakana ẹnyara awụ nini. U vee batọ dụụ wụ irẹyi bo ọnọ vaa ka yụ wụ nini. ²³ Dọọ si vi ki, aza bo ana razi wụ irẹyi ọkisẹ ọnọ venee vee vuri fiini akaakana aza Oshomoshi.' ²⁴ Avọ ọnọ mẹ vi, di ọkisẹ nin bo fụri ẹgẹ Isamụẹni na ngwụ ẹnẹna vẹ inaama aani, karẹyi tụẹshẹ, de showu isẹnẹ vaa mẹ bo ini ẹkụshi ẹnẹni. ²⁵ Ezi ọkisẹ ọnụụ vi nin, dụụ zẹ vi vi ezi irẹzẹ ọni Oshomoshi pe oshuku awụ nin mẹ, ẹfi ọnọ kaa yi Abrahamụ ka, 'Ininẹ ọina awụ ọna va yaa mẹ ẹdabẹrẹ yi ovuovu ireshi bo ọna yini ẹshẹ ọnọni.' ²⁶ Inaama ọni Oshomoshi si ozida aani kwẹẹtẹ da, ẹwụ nin ọnọ bidi tụ ọ shi, doti ọ zụ mẹ ẹdabẹrẹ yụ wụ nini ụmẹ ọnọ raa mẹ wụ nin rinẹ varama fini aichama awụ nini.