¹ Itiofinọsi, ini iwe ọnim bidi chẹrẹ tụshi wụ, ma kaa yụ wụ ụkọrọ bo ọni Ijesu nyima aa mẹ, ọnri ọ mẹmẹ aa zụ aza isa, ² poro netu ẹfi ọna si si ọ nẹbeẹ̣ba, inaama ọnọ zirẹngwụ ụkata Ifẹ Ọnini si ụmọ yi ọnitụ nini ọnọ ni da. ³ Inaama ọnọ rụya da, dọ va siẹngwụ zụ wa inoze renyi renyi, ọna mẹ ki asi ọshisha kwẹẹtẹ aani vi isa ọna vaa jirẹka. Ọ si ẹkụshi ẹbẹrẹva siẹngwụ zụ wa, dọ kaa yụ wa inọpati ijọva Oshomoshi. ⁴ Ini ẹfi ọnọ sii nee re ọnitụ aani nin, dọ kaa yụ wa ki asẹ jinẹ fụri Ijerusanemụ, ama ẹẹ dinẹ zi otowụ Ada, inọpati irẹyi ọnọ ka ka, "Wa wụụ fini irenu ami nin, ⁵ ka, ini rẹiza, enyi ọni Ijọọnụ si mẹ isami yụ wụ nin, ama Ifẹ Ọnini ọna va sii mẹ isami yụ wụ nin ini ọkụshi ene rezee ku." ⁶ Ẹfi ene pere gụ, dẹ fọ ọ ka, "Ananyiyi, ẹfi ọnọni ọnụ wa vaa si si ijọva ani Isirẹni nin varama yụ wa?" ⁷ Dọ kaa yụ wa ka, "Azẹzi mẹ kụ wa yẹ ẹfi ọnri ụmẹ ọni Ada si ụmọ aani ji yi isẹnẹni. ⁸ Ama, ụ vaa dọ ụkata nin ẹfi ọni Ife Ọnini ra vaku wu nin da, dụụ vi onivenu ami ini Ijerusanẹmu, shi Ijudiya bo ọnri Isameriya na ngwụ izitizi ẹshẹ bo." ⁹ Ẹfi ọni Ijesu karẹyi ẹnẹni bo ta da, ẹ mẹ veyi shirẹ, dee re ẹbẹẹ̣ba, de re ki a si Ijesu shirẹ, di egushi gu o shi, de rezi ku re e. ¹⁰ Ẹ mẹ fi feyi shi ẹbẹẹba gogogo, dee re Ijesu maa shirẹẹ nẹbẹẹba, de re anẹrụ ẹẹva ene chire auru ọvụọvụ ki ẹ dinẹ pewa ini asigiri. ¹¹ Dẹ ka, "Ẹwụ nini anẹrụ Iganini, sẹṇẹ vẹ dụụ dinẹ tụ izọ nin, du veyi shẹbẹẹba nin kẹ? Ijesu ọnọni, ana si fini akaakana awụ nin shirẹ na ngwu ineeku ọiza, vaa varama vẹ inoze ọnyọnya ọnụụ re ki a si ọ na ngwụ ineeku ọiza." ¹² Inaama ọnọ, dẹ varama vi Ijerusanẹmụ fụri Irẹsụfa Onivii, ọna gụri Ijerusanẹmu, ọna vi ụsẹ ọ̣kushi Isabati ọnya. ¹³ Ẹmẹ ngwu, dẹ shirẹ nini ọturọsa izẹnẹ ra. Ẹnẹna yi izọ vi, Ipita, Ijọọnụ, Ijemsi, Anduru, Ifiripi, Itọmọsi, Ibatiromewụ, Imatiyu, Ijemisi ozi Afọọsi, Isaimọni Ọnyiọyaya, ọnri Ijudasi ozi Ijemsi. ¹⁴ Enbo vana vụvọbẹ, dẹẹ mọnya, dẹ si ẹngwụ aanini tụni ozurenu ọtitụ poro, bẹrẹ anyẹnẹ ẹnyi ọnri Imeri ọnyi Ijesu, ọnri ẹnyara Ijesu. ¹⁵ Ini ẹkụshi ẹnẹ, di Ipita kwẹẹtẹ dinẹ ini akaakana ẹnyara anọdọwụ nini, di enbo vi ọpati aza ẹchẹshi tụrofu dọ ka, ¹⁶ Ewụ nin ẹnyara ami, ọ vọrọ ki yaa mẹ isẹni iwe ọnini ka, ọni Ifẹ Ọnini ka yi Idevidi, inọpati Ijudasi ọna va aza tụọvidi dọ zụ wa oze na va zii za Ijesu. ¹⁷ Fụvọki, ọzẹnya ọnọ bidi vi ini akaakana ayi, dọ nyi ọgiga ini ọgụ ọna yini ụkọrọ ọdọwụ ọnọni. ¹⁸ (Ọmẹyani, ọzọnọni ọ si ẹkẹshi ọnọ dọ fini ụkọrụvọ ọshimi ọnọ mẹ, dọ na shi ẹtẹ, ini ẹtẹ ọnọ ono ye zina fụri irasha ọna nẹba, dọ si vi ki irẹsụ ọnọ si dọvidi, di ẹngwụ aani sẹ vasha, di ivu aani bo kashẹshẹ. ¹⁹ Aza bo ana yi Ijerusanẹmụ ẹ wụ inọpati irẹyi ọnọni, fụvavọ, dẹ kụa shi ẹtẹ ọnọ "Akẹndama," ọni ọshafụ aani vi, "Ẹtẹ Anya." ²⁰ Fụvọki aa chẹrẹ tụni Iwe Isaamụ, ka, Navọ di ẹtẹ aani ọ vara osusu, Asi ọzọnyọnyi na ra ini ẹtẹ ọnọ.' 'Navọ di ọzẹnẹsa ọ dudi ọnọ yaa mẹ oshirẹsụ.' ²¹ Fụvavọ, ọ vọrọ ki ya ni ọzọnya fini anẹrụ ana vatụra yi ini ẹfi bo ọni Ijesu Ananyiyi a sii jinẹ, dọọ ngwụreshi ini akaakana ayi, ²² vẹrẹ fini ẹfi ọni Ijọọnụ si mẹ isami yọ netu ẹfi ọna si si ọ fini akaakana ayi nẹbẹẹba, ọzọnọ bẹdọ zẹ vi vi ẹzẹna vi onivenu ọ̣shisha kẉẹẹtẹ aani." ²³ Ẹ si ẹzẹnẹva jinẹ vẹ, Ijosẹfụ ọnaa shi Ibasabasi, da zẹ shii shi ọ Ijọsitọsi ọnri Imatayasi. ²⁴ Ẹ tuozurenu, dẹ ka, "Ẹwu Ananyiyi, waa yẹ ọtụtụrụma aza bo, fụvavọ siọ zụ yi ẹzẹnụụ ni ini azẹviva ẹnẹni, ²⁵ ana vaa dudi Ijudasi ini ọshishi ọnọni ọnri ụkọrọ ọnitu ọni Ijudasi mẹ abojinye inaani, dọ si zi oze ayaani na." ²⁶ Ẹ mẹ mẹ ipẹpẹmpẹ, dọ vi ki Imatayạsi ẹnẹ va ni, da zaika bẹrẹ ẹnẹwụrọnya ana vọ.