¹ Ẹfi ẹnẹ zi irẹkụra ọbani Amifiponisi ọnri Apononiya parafu da, de ve tu rẹkura Itẹsaronika, izẹni isinagọgu Iju nin ya. ² Venebiri Ipọọrụ mẹ mii mẹ, do ne tu wa, dọ si ẹkụshi Isabati ẹẹta pe waa karẹyi fini iwe ọnini. ³ Dọọ fụ iwe ọnini, dọọ shaafụ sha yụ wa, isẹnọ si sẹrẹ ki Kiristi ọ rụya ọnọ ri, dọ varama sha kwẹẹtẹ fini isu. Dọ ka, "Ijesu ọnọni oni mee showu aani yụ wụ nini ọnọ vi Ikiristi ọnaa karẹyi inọpati aani." ⁴ Iju ẹnyi ẹ dọwụ̣, dẹ vatụra Ipọọrụ ọnri Isainasi; Igiriki ẹrụrụ ana jẹngwu ngwụ irafẹkẹ vana zẹ vi vatụra wa, shi ẹrụrụ ini ọdọvidi anyẹnẹ nini. ⁵ Ama, di Iju nini ana razi nyị ọdọwu nyima aa kụayi aani; dẹ na kụ azẹshimi ẹnyi fini ofu vẹ, de pere azọkọni gụ, dẹ za irẹkụra, dẹ vaazi. Dẹ ngwụ ireshi Ijasọni, dẹẹ vaazi fụvọki ee si ki ẹnẹ tura Ipọọrụ ọnri Isainasi jinẹ va yi azọkọni ana gụ tuni ẹshẹẹshẹ. ⁶ Ama, eme rezi re wa za, dẹ tura Ijasọni ọnri ẹnyara ẹnyi ne tu oshirẹsụ ụkọrọ irẹkụra ọnọ, dee nowu ka, "Anẹru ẹnẹni anaa vẹshẹ rẹsụụ chi, ẹzẹ ngwụ irẹkura ayi ẹyọni do. ⁷ Anẹrụ ẹnẹni, ọni Ijasọni dọ pẹngwu vanaa misa eneẹ sii du ofi ọni Isiza si tẹtẹ; ẹẹ kaa ki oshinọyi ọsa yinaani, anaa shi Ijesu." ⁸ Azọkọni ọnri oshirẹsụ ụkọrọ nini vọni inẹ aani du ẹfi ẹnẹ wụrẹyi ọnọni. ⁹ Ama, Ijasọni ọnri Ipọọru shi ẹnẹnavọ mẹ si irashi ọni oshirẹsụ ụkọrọ nini kaa ki ẹ si jẹngwụ aanini da, dẹ fụrẹwa ụvọ. ¹⁰ Ini irafụ ọkụshi ọno, dị ẹnyara anọdọwụ nini tụ Ipọọrụ ọnri Isainasi ni Ibẹriya. Ẹfiene tuzọ, dẹ ngwụni Isinagọgu Iju nini. ¹¹ Anrẹkụra ẹnẹni ẹ nyi ụmẹnẹ ọnri ụvira funa ani Itẹsaronika nini, fụvọki ẹẹ sha ọtụtụrụma aanini sha, de batọ tụni irenube ọiza, dẹẹ zama irẹyi Oshomoshi re eyini eyini, doti e zu re aaviki irẹiza ọni isẹnẹni vi. ¹² Fụvavọ, azẹrụrụ ini ọdọvidi anyẹnẹ Igiriki ẹnyi ọnri anẹrụ Igiriki ẹrụrụ nin ẹnẹ dọwụ. ¹³ Ama, Iju nini ana yi Itẹsaronika mẹ wụ ki Ipọọrụ vana zaa kii karenube ọiza Oshomoshi ini irẹkụra Ibẹriya, dẹ ni izọ, dẹ naa va ẹtẹ zii izọ, dẹ kụ ọ kata azọkọni ẹnẹ ẹngwụ. ¹⁴ Ụmụmọ, di ẹnyara ini ọdọwụ nini sẹ si Ipọọrụ na ngwụ ini Irefu, ama Isainasi ọnri Itimoti vana dinẹ tụzọ. Ipọọrụ ọnri Isinsi ẹ nọ Iberiya ¹⁵ Di ẹnẹnaa si Ipọọru zụoze si ọ ne tu irẹkụra Atẹnsi. Dẹ navọ Ipọọrụ tụzọ, ama di Ipọọrụ tụ wa ki ẹ kaa yi Isainasi ọnri Itimoti ki ẹ mụsọfira doti e ve tu ọni. ¹⁶ Ipọọrụ mee zi wa ini Atẹnsi, ẹngwu aani ọi kụ dọ ẹfi ono re ori renyi renyi ana yini irẹkụra ọnọ. ¹⁷ Fụvavọ dọ ngwuni isinagọgụ, do nee pe Iju nin shi azẹnẹsa anaa fẹkẹ Oshomoshi, dẹ kareyi aani; shi ofu vọnọọ nọ nee pe aza karẹyi Oshomoshi. ¹⁸ Ama azẹnyi ọnọ vi ki ụvirarẹsụ ọnri ọyiyẹ ini ụpẹngwụ ẹnẹ nyi, de ve tu o. Di ẹnyi ka, "Sẹni ọzẹna razi nyi ọnọ yẹ ọnọni e si ki ọnaa ka kẹ?" Di azẹnẹsa ka, "O vene ẹnẹnaa shi aza ki ẹ vatụra ori renyi renyi ana razi yẹ," fụvọki ọọ karenube Ijesu ọnri ọshisha kwẹẹtẹ fini isu. ¹⁹ Dẹ za Ipọọrụ dẹ siọ vi irasha anaa shi Areopagọsi, dẹ ka, "Ụ wa va zụụ kaa yi yi inọpati isa ọwọọwa ọnụ waa zụ aza? ²⁰ Fụvọki isa ọnii razi yẹ inọpati aani ọnụ waa kaa yi yi. Fụvavọ, yee si ki ya yẹ izi isẹnẹni nyi rẹsụ tụ." ²¹ (Dọ va kusivi ki eziẹtẹ Ateni bo ọnri azẹga ana yi izọ ẹi kụ nyi isọsa ẹnẹẹ mẹ funa ki ee batọ tụni irẹyi ọwọwa ana zẹ yinaaani navẹki ọnaa karẹyi inọpati aani.) ²² Inaani, di Ipọọru dinẹ tụni akaakana Areopagọsi, dọ ka, "Ẹwu nin ani Atẹnsi, mee re ku wee sirẹyi irafẹkẹ inoze bo nin. ²³ Fụvọki mmaa paraafu dim re isirafẹkẹ awụ nini, mee re irẹta irafẹkẹ ana chẹrẹẹ tụ ka, 'Yaa si ọnọni yi Oshomoshi Ana razi Yẹ.' Fụvavọ, isọnụ waa fẹkẹ ini arimayẹ oni mee showu aani yụ wụ nini. ²⁴ Oshomoshi ana mẹ ẹshẹ shi isa bo ana yi ininaani, ọ ma ra ini itẹmpụrụ anaa sụvọ da fụvọki ọni ọnọ vi Ananyiyi ana nyi ineeku ọnri ẹshẹ. ²⁵ Ọi zẹ va vi ụvọ ọza ana sii fẹkẹẹ, umọvi ki ọzi nyi isẹnẹ vụya yọ, fụvọki ọni nyẹmbẹ ọnọọ si ẹshẹẹ yi aza, shi ifẹ ọnri isọzọọza. ²⁶ Zirẹngwụ ọza ọnya ọnọ ya mẹ aza bo ana yi irẹkụravabẹ bo, dọ mẹ ki ẹ ra inẹẹsụ ẹsḥe ọnọni, dọ mẹ ki ọzọọza ọ nyi ụmẹ ọnri ẹfi, shi ọtẹfi izẹni ọzọọza ra, ²⁷ doti e zuu si Oshomoshi, azẹmayẹ dẹẹ zi gụrẹ ẹ, dee re e. Tuavọtuavọ, ọzi kavanẹshẹ yi ọzọnyọnya ayi. ²⁸ Fụvọki ininẹ aani ọnii ya nyi ọrira ọnri ụsọọzi ọnri ifẹ ayi, venebiri ochoro awụ nin ọnyi mẹ ka, 'Fụvọki ẹyi nyẹmbẹ vi ozi aani.' ²⁹ Fụvavọ, ụmọnii yẹ ki ezi Oshomoshi ọnii vi, ọzi vọrọ ki yee roo ki a va zụụ si Oshomoshi mọrọ igoonu, isiriva navẹki irẹta --- isẹnẹni bo vi ụmama ọna si ụvọ ọnri ọbọrẹsụ anẹshẹ mẹ. ³⁰ Fụvavọ, arimayẹ ayi vọni Oshomoshi miaba, ama ọmẹyani, ọ sụmọ kaa yi anẹshẹ bo ana yi irasha turirasha ki e rinẹvarama. ³¹ Fụvọki ọ si irẹkụshi tẹtẹ ọnọ vaa sii mishọọji yi anẹshẹ inoze ana sẹrẹ zirẹngwụ ọzọnya ọnọ sụvọ aani ni. Oshomoshi ọ si ọzọnọ mẹ ọtẹrẹwa yi yi da, ọ mẹ sha a kwẹẹtẹ fini akaakana ẹnene fu su." ³² Ẹfiẹni ani Atẹnsi nin wụ inọpati ọvivarama sha kwẹẹtẹ fini akaakana ẹnene fu su, di azẹnyi inaanini aạ ji Ipọọrụ isiya; ama di ẹnyi inaanini ka, "Ii vee tenii batọ tuni irẹyi ọnọni." ³³ Ẹfiẹnẹ mẹ ta da, di Ipọọrụ navọ wa dọ fiizọ. ³⁴ Ama, di anẹrụ ẹnyi na vabẹrẹ ẹ, dẹ dọwụ; Idiọisiyusi ana vi ani Areọpagite, ọnyẹnẹ ọnyi anaa shi Idamarisi ẹnri azẹnẹsa ana ya pe wa ẹnẹ vatụra a.