¹ Di Ipọọrụ zẹ vẹ Idẹẹbi, shi Inistira; dọ nyi oziafụ anaa shi Itimoti ana yi izọ, ọni ọnya aani vi Iju anọdọwụ, di ada aani vi Igiriki. ² Ẹẹnyara ayi anọdọwụ nin ana yi Inistira ọnri Ikoniyọmụ vanaa karẹyi ọiza aani. ³ Di Ipọọrụ ̇ee si ki ọ vatụra ọni ji̇nẹ, dọ va si ọ dọ ji ọ ụma fụvọ Iju nin ana yi irasha ẹnẹ, fụvọki enbo ẹ yẹ da ka Igiriki ọni ada aani vi. ⁴ Ẹ mẹ yinoze aa na, dẹ zi akaakana irẹkụra ọbani ẹne paraafụ̣, dẹ siọzụ ichọchi ẹnẹ, isọ vọrọ ki ẹ vaatụra, ọni ọnitụ Ijesu nin ọnri azekụ ana yi Ijerusanẹmụ chẹrẹ tẹtẹ da. ⁵ Di ichọchi nin aa kataa tụọ ini ọdọwụ ọnri ka dẹẹ rụrụụ tụọ eyinieyini. ⁶ Di Ipọọrụ ọnri ẹnẹni ẹnri ọ gaa zi, ngwụni ọkakooro Ifirigiya ọnri Igalatiya, ọmẹvika Ifẹ Ọnini ̇ọ zi zẹ ki e showu irẹyi Oshomoshi ini okakooro Eshiya. ⁷ Ẹ mẹ zi gụri Imisiya, de zee si ki ẹ nẹ ngwụ ini Ibitiniya, ama di Ifẹ Ijesu yi ki asẹ nọ. ⁸ E ̣mẹ vaa zi Imisiya a paraafu, dẹ ziọ va ngwụ irẹkụra Itraowasi. ⁹ Di Ipọọrụ re ẹtoore inaafụ, ka: ọnọrụ Animakadoniya ọnyi ọ dinẹ, dọọ shi ọ, dọ ka, "Waa vẹ Imakidoniya, dụ wa va mọgụvọ yi yi." ¹⁰ Inaama ọni Ipọọrụ re ẹtoore ọnọ da, ụmụmọ dii kwẹẹtẹ aa ni Imakidoniya, ụmavọ dii si yẹ ki Oshomoshi vana shi yi ki ya na showu irenube ọiza yụ wa. ¹¹ Imẹ ngwụ ẹpa fụri Itụrowasi, dii vọọ vatụra oze na ngwụ Isamọtrasi. Ini eyinẹshẹ aani, dii ngwụ Iniyapọrisi. ¹² Di fiizọ aa ni Ifiripa, ana vi irẹkụra ọbani ini Imasẹdoniya, ana bani fu bo ini okakooro ọnọ, dẹ yini afụ ijọva Iromani; dii va yini irẹkụra ọnọni mẹ ọkụshi ọrụrụ. ¹³ Ini ọkụshi isabaati, dii zi ọchọfọ ana yi ini ụtọ okufa jinẹ tụra, fụvọki ye ro ki ii ve zuu re irasha ọnii va zụ yaa tuozurenu izọ. Yaa yatụ, dii karẹyi yi anyẹnẹ ẹnyi ene peregụ tụzọ. ¹⁴ Ọ nyi ọnyẹnẹ ọnyi anaa shi Inidiya, ana fụri Itayatira, anaa sofu ita ipọpụrụ, anaa fẹkẹ Oshomoshi, do bato tụni irẹyi ayi. Di Ananyiyi sha a ọtụtụrụma sha me doti o zu batọ tụni irẹyi ọni Ipọọrụ aa ka. ¹⁵ Ẹfi ọnii mẹ isami yi ọn ri anreshi aani da, dọ dipẹ yi yi kokoro ka, "Aaviki ọtụtụrụma wụ nin ọ kaa yụ wụ nin ki maa nyi irẹiza inọvidi Ananyiyi, vẹ we ve chi ineeshi ami nini." Dii zẹẹ yọ. ¹⁶ Umotu, i maa nọ irasha ana yaa tuozurenu, di ozioshi ọnyi, ana nyi ifẹ azeeshi ọnọ sii mirakụọ, vaji yi. Ozioshi ọnọni vanaa si ifẹ azeeshi ọnọni reẹtẹ yi aza, dọọ si ọgụ ụnọmpa vaa yi ọga aani nin. ¹⁷ Di ozioshi ọnọni a vatụra ẹyi rii Ipọọrụ ziizi, doo showu ka, "Anẹrụ ẹnẹni vi ezida Oshomoshi ana nẹba fu keekere. Oze ọnaa zi re ọdidọtụ onoo showu aani yụ wụ nin." ¹⁸ Dọ maan mẹ poro mẹ ẹkụshi ọrụrụ. Ama di irẹyi ọnọ kụ Ipọọrụ ayi kokoro, fụvavọ dọ kaa yi ifẹ azeeshi ọnọ ka, "Maa si ụmọ kaa yụ wụ kụ wa tụ jinẹ fụrẹngwụ ini irẹsha Ijesu Ikristi." Di ifẹ azeeshi ọno tụ jinẹ fini ẹngwụ aani ụmụmọ. ¹⁹ Ẹfi ọni ọga aani nin re ka izẹni ẹni kụ eyi tụra ki ọgụ a fụrẹẹ vẹ, ọi kụ yinaani, dẹ za Ipọọrụ ọnri Isainasi, de tura wa na ngwụ ini ofu, inọvidi ọnụmọ nini. ²⁰ Ẹfi ẹnẹ za wa ve tu ọmọkarẹyi nini da, dẹ ka, "Anẹrụ ẹnẹni aa tụ anrẹkụra ayi nin irẹkụ. Iju ọnẹ vi. ²¹ Dee showu isoshuku ana razi vọrọ yi ani Iroomu nin, dẹẹ kaa yụ wa ki ẹẹ vaatụra wa. ²² Inaani, di azọkọni nini kwẹẹtẹ vabẹ tu Ipọọrụ ọnri Isainasi; di ọmọkarẹyi nini na auru shi wa ẹngwụ. Dọ si ụmọ yụ wa ka ẹ si enyiisụẹ tu wa. ²³ Ẹfi ene fu wa isa ipẹrika da, de ne wa ngwụni ijaaru, dẹ si ụmọ kaa yi ọga anijaaru ka, ẹ sieyi pe wa kokoro. ²⁴ Ọga anijaaru mẹ dọ ụmọ ọnọni da, do ne wa ngwụni ijaaru fuufu, dẹ tụ wa ipetuma. ²⁵ Inọpati ajirafụ, Ipọọrụ ọnri Isainasi maa tuozurenu, dẹẹ jashẹ shi Oshomoshi, di anijaaru ọsa nin ee bewatọ. ²⁶ Ini asigiri, di ẹtẹ jibora, netu ka do sheni na za oshiẹtẹ ireshi ọba ijaaru. Ụmụmọ, di oze ọba ijaaru bo naa sha, di ẹba ọna kụ shi wa afụ ngwara shiẹtẹ. ²⁷ Di ọga anijaaru nin si sha kwẹẹtẹ fini ara, de re ki oze ọba bo e ̣si na tẹtẹ. Dọ tụ itakovi aani doti ọnọ si ọ wụ ẹngwụ aani, fụvọki ọ kẹni ki anijaaru nin e ku zue. ²⁸ Ama, di Ipọọrụ si ọngwụ tụẹba nowu, dọ ka," Asụụ wụ ẹngwụ awụ, fụvọki ẹyi bo yizọni." ²⁹ Di ọga anijaaru ọnọ kaa ka a si ọpa vẹ. Dọ sẹ zue ngwụninẹ ijaaru, di irẹgashi si ngwụ ọ ẹngwụ. Do ne ẹngwụ aani nyẹtẹ tụnọvidi Ipọọrụ ọnri Isainasi. ³⁰ Ọ kụ wa jinẹ vini ẹshẹẹshẹ, dọ ka, "Ẹwụ nin ada ami, sọ vọrọ ki ma mẹ doti a zụ dọ mi tụ." ³¹ Dẹ ka, "Dọ Ijesu Ananyiyi wụ, a vaa dọ wụ tụ, shi ẹwụ shi anreshi awụ." ³² Dẹ karenube Ananyiyi yọ, shi azabo ana yini ireshi aani vabẹ. ³³ Inaani, di ọga anijaaru ọnọ kụ wa neeshi ini iwakati irafụ ọnọ gẹdẹgẹdẹ, do pe wa ya anava aanini. Ụmụmọ, dẹ mẹ isami yi ọga anijaaru ọnọ ọnri anreshi aani bo. ³⁴ Ọ mẹ si Ipọ̣ọrụ ọnri Isainasi vineeshi aani, dọ si isari yụ wa, dọọ jụjẹ, shi ọni shi anreshi aani, fụvọki ọ dọ Oshomoshi wụ da. ³⁵ Ẹfiene eyi si ni, di ọmọkarẹyi nini tụ netu ọga anijaaru nini ka, "Fụrẹ anẹrụ ẹnẹ ụvo doti ẹẹ nạ." ³⁶ Di ọga anijaaru ka yi Ipọ̣ọrụ ka, "Ọmọkarẹyi nini ẹ tụshi mi ki ma fụrẹwụ nin ụvọ. Fụvavọ, jinẹ ve,̣ dụ waa na nin ini ẹngwọrọ." ³⁷ Ama, di Ipọọrụ kaa yụ wa ka, "Ee tu yi ini orere, dẹ razi navọ ki ya kurenu ayi. Shọmẹ daka vi ki ani Iroomu ọnii vi, de ne yi ngwụni ijaaru. E we ve bebe a vaa fụrẹyi ụvo ọmẹyanị? Ya zaa zẹẹ. Ẹnyẹmbẹ, ẹ va si ụvọta aanini kụ yi jine." ³⁸ Di ọga anijaaru ọnọ ka irẹyi ọni Ipọọrụ ka yi ọmọkarẹyi ẹnẹ. Ẹfiẹnẹ wụ ki Ipọọrụ ọnri Isainasi vi ani Iroomu, di angwa shu wa. ³⁹ Di ọmọkarẹyi ẹnẹ vẹ va dipẹ yụ wa, dẹ kụ wa jinẹ, dẹ kaa yụ wa ki ẹ zi kavana yi irẹkụra ọbani ọnọ. ⁴⁰ Avọ ọni Ipọọrụ ọnri Isainasi mẹ jinẹ fini ọba ijaaru, dẹ vineeshi Inidiya. Ẹfiẹni Ipọọrụ ọnri Isainasi re ẹnyara ini ọdọwụ nin, dẹ tụ wa ụkata. Umotu, dẹ fiini irẹkụra ọbani ọnọ.