¹ Anẹrụ ẹnyi e chi fụri Ijudiya na ngwụ Antiyọki, dẹẹ zụ ẹnyara ayi anọdọwụ nin ka, "Ọchishi ki ụ jụma nin vene isoshiẹtẹ Imosisi mẹ ka a, azẹi zụa jụ wụ tụ nin. ² Ọnọ mẹ ki Ipọọrụ ọnri Ibanabasi e pe azẹnẹ nyi ẹshankata ọkatẹngwụ̣. Fụvavọ da ni Ipọọrụ ọnri Ibabanasi bẹri azẹnẹsa fiini akaakana aanini, ka ẹ shirẹ nọ Ijerusanẹmụ ne tu ọnitụ nin ọnri azẹkụ nin doti ẹna geyi inọpati irẹyi ọnọni. ³ Fụvavọ, ọmẹ vi ki iragụ anọdọwụ nin ọnọ tụ wa, dẹ zi Ifonisha ọnri Isameriya parafu, de showu yụ wa ki Ijẹntaini nin ẹ si vara anọdọwụ. Dẹ si ụjẹ ọbani ve tu ẹnyara anọdọwụ aanini. ⁴ Ẹfiẹnẹ ngwụ Ijerusalẹmụ, di iragụ anọdọwụ nin ọnri ọnitụ Ijesu nin, shi azẹkụ nin kụ wa kaa nẹ, dẹ karenube ụkọrọ ọni Oshomoshi sụ wa mẹ. ⁵ Ama, di anẹrụ ẹnyi ana nyi ọdọwụ, ana yini aka ụvọrẹkụ Ifarisi nin, kwẹẹtẹ dinẹ, dẹ ka, "Ọ vọrọ ki aa ji aza ụma, ọnri ki a zẹ kaa yu ̣wa ki ẹẹ vaatụra ofi Imosisi. ⁶ Izọ di ọnitụ nin ọnri azẹkụ nin perẹngwụ vabẹ de roo inọpati irẹyi ọnọni. ⁷ Inaama ọne pe ẹngwụ nyi ẹshankata ọkatẹngwụ da, di Ipita kwẹẹtẹ dinẹ, dọ kaa yụ wa ka, "Ẹwụ nin ẹnyara ami, waa yẹ nin ka inisirọni, Oshomoshi ọ ni ọzọnya fini akaakana awụ nini, dọ ka ziri irẹyi irenu ami ọni Ijẹntaini nini va yaa wụ irẹyi irenube ọiza, dẹ dọwụ. ⁸ Oshomoshi ana yẹ ọtụtụrụma aza, ọnọọ mivenu yụ wa, dọ si Ifẹ Ọnini yụ wa, vene ọ mẹ si ọ yi yi. ⁹ Ọ zi tụ ẹyi rụ wa renyi yi ẹngwụ, dọ mẹ ki ọtụtụrụma aanini ọ ni kirikiri zirẹngwụ ọdọwụ. ¹⁰ Fụvavọ, ọmẹzi dụ wa zama Oshomoshi re, du wee zu ọparaka, ọni oshuku ada ayi nin navẹki ẹyi rai zụa za, gẹ eziafụ Ijesu nin ọbẹ kẹ?" ¹¹ Ama, yaa nyi ọdọwụ ki a vaa dọyitụ zirengwụ ọiza ọfẹ Ijesu Ananyiyi, vene a mẹmẹ zẹ di dọ ẹni tụ." ¹² Di azọkọni ẹnẹ bo chiiji keri, dee batọ tụni irẹyi ọni Ipọọrụ ọnri Ibanabasi aa ka, ẹfiẹnẹ karenube ụkọrọ oshishozeyi ọnri ami renyi renyi ọni Oshomoshi mẹ inakaakana Ijẹntairi nini zirẹngwụ aanini. ¹³ Inaama ẹnẹ karẹyi da, di Ijẹmisi tuoshi, dọ ka, "Ẹwụ nin ẹnyarami, bematọ nini. ¹⁴ Isaimọni ọ ka yi yi da Oshomoshi mẹmẹ savọ si ayụva aani mọgụvọ yi Ijẹntairi nin, doti o roze ni aza fini akaakana aanini yi irẹsha aani. ¹⁵ Irẹyi ọkisẹ nini ọ vaji irẹyi ọnọni, vene a mẹmẹ chẹrẹ tẹtẹ, ¹⁶ 'Inaama isẹnẹni, mvaa varama vẹ, dim va varama da ajẹngwụ Idevidi, ene wu nyẹtẹ; mvaa si ọ kwẹẹtẹ dim teni odidu aani bo varama tụni ụdi aani, ¹⁷ doti aza anavọ e zuu sii eyi Ananyiyi, shi Ijẹntaini nin bo ana shi zirẹngwụ irẹsha ami.' ¹⁸ Irẹyi ọni Ananyiyi ka yi, ọni ọna mẹ isẹnẹni, ana mẹ fụrụmọrụmọ. ¹⁹ Fụvavọ, isọnim ro ki ọ vọrọ ki ya mẹ ọnọ vi ka, asi kụọ kata Ijẹntaini nin, ẹngwụ,ẹnẹna va ka Oshomoshi vẹ. ²⁰ Ama, i vaa chẹrẹ iwe tu shu wa ki ẹ bẹdo vaa kavana yi ori ọfifẹkẹ, irẹka ọsisẹ, ọnri uye one simọbẹ, shi anya. ²¹ Fụvọki osiku ana fụrẹ aa showu ofi Imosisi ini irẹkụra bo fini ẹshẹ ụmọkụkụ vẹ, da kaa ini Isinagọọgụ, ini ọkụshi Isabati bo." ²² Inaani, do vene ki ọ sẹrẹ ini eyi ọnitụ nin ọnri azẹkụ nini, bẹri iragụ anọdọwụ bo, ki a ni Ijudasi ana shi Ibasabasi, ọnri Isainasi, ẹnẹna vọ ọdọvidi ichọọchi, da tụ wa ni Antiyọkụ bẹri Ipọọrụ ọnri Ibanabasi. ²³ Dẹ chẹrẹ ẹ ka, finụvọ ọnitụ nin ọnri azẹku ̣nin, ẹnyara wụ nin anẹrụ, tushi Ijẹntaini ana yi Antiyọkụ, Isiriya ọnri Isinishiya, yaa kụ wụ nini. ²⁴ Yaa wụ ki anẹrụ ẹnyi ẹ tụ fiini akaakana ayi dẹ razi doze finụvọ ayi, dẹ va ngwụni akaakana awu ̣nini, dẹẹ zụ wụ nin isa anaa kụ wụ nin ifẹ gẹba. ²⁵ Ọ mẹ maan si ya aani, ẹyi bo ọ nọma, dii zẹẹ ki ya ni aza, dii tụ wa bẹri Ibanabasi ọnri Ipọọrụ ọnii sirẹyi aani, shu wu nini; ²⁶ anẹrụ ana si ẹshẹ aanini tẹtẹ fụvọ irẹsha Ijesu Ikristi Ananyiyi. ²⁷ Fụvavọ, yaa tụ Ijudasi ọnri Isainasi shu wu nini, ẹni nyẹmbẹ vaa si irenu aanini karẹyi ọnyọnya ọnọni yụ wụ ini. ²⁸ Fụvọki ọ vọọ sẹrẹ ini eyi Ifẹ Ọnini ọnri ini eyi ayi ki asii kụọ kata wụ nin ẹngwụ fu isẹnẹni, ana vi isẹna sẹrẹ; ²⁹ kụ wa va fiini isẹna si misẹvọ yi ori nin, anya, uye one shiọbẹ, ọnri itutu asụ. Aaviki wa zi gọdọ yi isẹnẹni, ọ vaa rọ wụ nin ẹngwụ. Nyo da nin eee." ³⁰ Ẹfi ana karẹyi ọna kaa yụ wa da, de si fu aa ni Antiyọki; ẹfiene pere azọkọni gụ da, dẹ tana iwe itụ ọna si tụ wa itụ yụ wa. ³¹ Ẹfiẹnẹ ka iwe itụ ọnọ da, dẹẹ jụjẹ fụvọ irẹyi ọtitụkata one re ka fiinaani. ³² Di Ijudasi ọnri Isainasi ọni ẹnẹviva zẹ vi vi ọkisẹ ẹn zẹ karẹyi ẹrụrụ yi ẹnyara anọdọwụ nin, dẹ si ọ tụ wa ụkata. ³³ Ọmẹ na daa mẹ che izọ, di ẹnyarayi anọdọwụ ana yizọ tụ wa varama ini ẹngwọrọ ve tu ẹnẹna tụ wa itụ. ³⁴ Ama, di Isainasi re ka ọ sẹrẹ ki ọnọ kụ yi izọ. ³⁵ Ama, di Ipọọrụ ọnri Ibanabasi shi azẹnẹsa dinẹ tu Antiọkụ izẹ ya zụ aza isa, dẹẹ karenube ọiza Ananyi̇yi. ³⁶ Inaama ọnẹ mẹ ẹkụshi che izọ, di Ipọọrụ kaa yi Ibanabasi ka, "Navọ di ya varama ne re ẹnyara ayi anọdọwụ ini irẹkụra bo ọnii ya karenube ọiza Ananyiyi, di ye ne re ẹ mẹmẹ a mẹ izọ bo. ³⁷ Di Ibanabasi e si ki ọnaa si Ijọọnụ anaa shi Imaakụ vaatụrẹngwụ. ³⁸ Ama, di Ipọọrụ ro o ki ozi zoza ki ẹnẹ si Imaakụ vatụrẹngwụ, fụvọki ọ bidi fụrẹ wa ụvọ tụ Ipamfiniya, dọ rai kụ kụafụza wa zụsẹ nọvidi tụọ ini ụkọrọ ọnọ. ³⁹ Inaani, dẹ va nyi ẹshankata inakaakana aanini, ọna mẹ ki ọzọọza ọ si zi ayaani, di Ibanabasị si Imaakụ vatụrẹngwu,̣ dẹ ni Isaipurọsi. ⁴⁰ Ama, di Ipọọrụ ọn si Isainasi na, inaama ọni ẹnyara anọdọwụ nin si ọ chire ọiza ọfẹ Ananyiyi ụvọ. ⁴¹ Inaani, dọ zi Isiriya ọnri Isinisiya parafu, dọọ tu ichọọchi nin ụkata.