¹ Umotu, ini irẹkụri Ikoniyọmụ, di Ipọọrụ ọnri Ibanabasi gẹ ngwụni isinagọgụ Iju nini, dẹ karẹyi inoze ọno ̣si vi ki azẹrụrụ ini Iju ọnri Igiriki nini ẹnẹ̣ dọwụ. ² Ama di Iju nin anaa mẹ akamawụ na kushi Ijẹntaini nini inẹ, dẹ mẹ ki ayi ọ kụ wa tu ẹnyara ayi anọdọwụ. ³ Fụvavọ dẹ zafụ dinẹ, dẹ yi izọ ku, dẹẹ si ayọọvii karẹyi zirẹngwụ ụkata Ananyiyi, dọ zaa sii si ivenu ọiza ọfẹ ọna yini irenube aanii zụ. Ọ maan mẹ zirẹngwụ ụkata ọnọ si yi Ipọọrụ ọnri Ibanabasi ki ẹ sụvọ aanini mẹ ụkọrọ oshishozeyi onri ami renyi renyi. ⁴ Ama, azẹrụrụ ini irẹkụra ọnọ ẹzi si inẹ vọnya: azẹnyi ẹya bẹri Iju nini, di azẹnyi ya bẹri ọnitụ Ijesu nini. ⁵ Ẹfiẹni Ijentaini ọnri Iju nini ee si oze ọnẹ va sii kaa yi ọdọvidi aanini ki ẹ za Ipọọrụ ọnri Ibanabasi, doti ẹ va wa iriwa ọnri ki doti e ne wa irẹta, ⁶ dẹ va si wụ, de zue fiizọ ni ni irẹkụra Irikaoniya, Inisitira ọnri Idaabe ọnri ọkakooro izọ bo, ⁷ dee showu irenube ọiza izọ. ⁸ Ini irẹkụri Inistira, ọnọrụ ọnyi ene sụfụ fiininẹ ọnya aani, ọni ụfụ aani razi viẹchi, dọ razi zụsẹ yẹẹyẹ, ọ yatụ tụzọ. ⁹ Di ọnọrụ ọnọni wụ ki Ipọrọrụ aa karẹyi. Di Ipọọrụ feyi shi o, do re ki ọ nyi ọdọwụ ki a va zụụ fụ ọni ikụ sha. ¹⁰ Dọ va si ọngwẹ tụẹba, do ka, "Kwẹẹtẹ dinẹ." Di ọnọrụ ọnọ jishirẹ, dọọ zụsẹẹ ziizi. ¹¹ Ẹfiẹni azọkọni re isa ọni Ipọọrụ mẹ, dẹ si ọngwẹ tuẹba, dẹẹ si irẹkụra Inikaoniyaa kaa ka, "Ori nini e chi ve tu yi ini ụpẹngwụ aza." ¹² Dẹ kaa ka Ibanabasi ọnọ vi "ori Izeyusi;" di Ipọọrụ vi, "ori Amẹsi," fụvọki ọni ọnọ vi ọdọvidi ọkarẹyi. ¹³ Oshirafẹkẹ ori Iziyọsi, ọni ireshi aani yini akajinẹ irẹkura ọno, dọ kụ ụnọ nini ọnri ododo irafẹke ọna sụvọ nọ ẹrụrụ vi ni ọchọfọ itẹmpụrụ ori ọnọ; irafẹkẹ ọni ọn ri azọkọni ana yi izọ aa vaa mẹ yi ori. ¹⁴ Ama, ọnitu Oshomoshi, Ibanabasi ọnri Ipọọrụ mẹ wụ inọpati aani, dẹ na ita aanini shaa, dẹ sẹ ne tu azọkoni ẹnẹ, de nowu, ¹⁵ dẹẹ kaa ka, "Ẹwụ nin anẹrụ, ọmẹzi dụụ manaa mẹ nin ke? Ẹyi nyẹmbẹ vi aza vene wụ ninị, di ze̱ nyi ụpẹngwụ vene wụ nini. Irenube ọiza ọnii za ve tu wu nini, doti wa zụ varama fini isa ana razi zarẹsụ du ̣wa va ka Oshomoshi ana nyi ifẹ, ana tụ̣ ebe̱e̱ba, ẹtẹ ọnri irefu, shi isa tụrisa ana yi inine̱ aanini. ¹⁶ Ini ụmẹ iyẹẹyẹ, ọ navọ ki irẹkụravabẹ bo ẹẹ mẹ ene tu wa ụvọ. ¹⁷ Ama, tuavọ tuavọ, ọ zi vọọ navẹngwụ aani kẹnẹ ki ọ zinyi onivenu, ụmọvi ki ọ mọiza ini orishi ọnọ si yụ wụ nini fụri ẹbẹẹba ọnri ụmẹ ẹtụtụ, dọọ si isari ọnri ụjẹẹ shi wụ nin inẹ." ¹⁸ Ipọọrụ ọnri Ibaranabasi ee pe wa karẹyi poro, tuavọ tuavọ ẹi zụ za azọkọni ana yi izọ ki asẹ si isẹvọ fẹkẹ ẹni vene ori. ¹⁹ Ama Iju ẹnyi ana fụri Antiyọki ọnri Ikoniyọmu mẹ vẹ dẹ, kushi azọkọni inẹ. Dẹ vẹrẹ dee ne Ipọọrụ irẹta, de turẹẹtẹ fụri irẹkụra ọnọ, de ro ki o fu su. Ipọọrụ ọnri Ibanabasi ẹ varama vẹ Antiọki ²⁰ Tuavọ tuavọ, eziafụ aani mẹ dinẹ varakara a, dọ kwẹẹtẹ, dọ ngwụ ni irẹkụra ọnọ na. Ineyineishẹ aani, di Ipọọrụ ọnri Ibanabasi ni Idaabe. ²¹ Inama enẹ showu irenube ọiza ini irẹkụra ọnọ da, dẹ nyi eziafụ ẹrụrụ, dẹ varama ni Inistira, Ikoniyọmụ ọnri Antiyọki. ²² Dẹẹ si apadapada tu eziafụ aanini ụkata doti ẹ va zụụ siafụ shiẹte ini ọdọwụ aanini, dẹ ka, "Ii bẹdọ ngwụ ijọva Oshomoshi zirẹngwụ ẹkatẹngwụ renyi renyi." ²³ Inaama ẹnẹ ni azẹkụ tụni ichọchi ọzọọza da, dẹ tuozurenu, dẹ bawẹ, dẹ va sụ wa chire Ananyiyi ụvọ, ọnẹ nyị ọdọwụ aanị. ²⁴ Inaani, dẹ zi oze Ipirsidiya parafu, dẹ na ngwụ Ipamfiriya. ²⁵ Ẹfiẹnẹ karenube ọiza Ipaaga da, de si fu dẹ ni Ataniya. ²⁶ Fiizọ, dẹẹ ni Antiyọki izẹnẹ ya siengwu tụni ọizaọfẹ ọna yini ụkọrọ Oshomoshi, ọnẹ za na ngwụrẹsụ da. ²⁷ Ẹfiẹnẹ ngwụ Antiyọki, de pere ichọọchi gụ, dẹ karenube isa ọni Oshomoshi mẹ zirẹngwu aanini, shi ọ mẹmẹ fụoze ọdọwụ yi Ijẹntaini nini. ²⁸ Dẹva yi izọ ku pe eziafu aanini.