¹ Ọmẹyani, ọnitụ Ijesu nin ẹnri ẹnyara ini ọdọwụ nin ana yi Ijudiya ẹ wụ ki Ijentaini nin nyẹmbẹ ẹẹ dọ irẹyi Oshomoshi wụ. ² Ẹfiẹni Ipita shirẹ vi Ijẹrusanẹmu da, di ẹnẹna bẹ tụni ụvọrẹkụ ụma ọjiji vee duẹngwụ ki ọzi mẹtẹrẹ; ³ dẹ ka, "Wee pe ẹnẹna razi jụma mẹ ọrigẹ, du wee pe waa risari!" ⁴ Ama, di Ipita vẹrẹ a sharẹyiafụ sha yụ wa ngwụnẹ ngwụnẹ, do ka, ⁵ Ẹfiọni maa tuozurenu ini irẹkụra Ijọpa, dim re ini ifẹ ki ọnya e chii vẹ, dọ si mẹi isa ọgana enee chi fụrẹ ẹbẹeḅa vẹ, de doro o ini akẹnina. Do chi ve tu mi. ⁶ Dim feyi shi o, dim ze ro inọpati aani. Dimre isụpa ọnyụfụ ẹẹna o nee re ini ẹshẹ ọnọni, uye inavi nini, uye ana kụ irachi tura, ọnri unomi enee shira ini ovurukutu. ⁷ Umotu, dim wụ ọngwẹ ana kaa yi mi ka, "Ipita, kwẹẹtẹ, wụ ọ dụ wa ri ọ." ⁸ Dim ka, "Ananyimi, ma zi vọ zụa mẹ; ọzi nyi isẹnẹ razi vi ọnini navẹki isẹnẹ razi ni o ne si ngwụ ineenu ami yeẹ̣yẹ." ⁹ Ama, di ọngwẹ ọnọ ze tuoshi ụpọfụva fụrẹ ẹbẹẹba, dọ ka, "Isẹnẹ Oshomoshi ra mẹ ọnini, asụụ kaa ki ọzi ni. ¹⁰ Ụpẹẹta ọnọ vọọ mẹ, da va kụ onbo keekere varama shirẹ nẹbẹẹba. ¹¹ Umotu, dim re anẹrụ ẹẹta ana dinẹ tụnọvidi ireshi izẹnii ya; Isisariya ọna tụ wa fụre ve tu mi. ¹² Da sụmo kaa yi mi ini Ifẹ ki ma vatura wa, ọnri ki asim sieyiwụ wa ki Ijẹntaini ọnẹ vi. Ọnọrụ ishinọnyi ẹnẹni ẹnẹ kụafụza mi na, dii ngwụneeshi ọnọrụ ọnọ na. ¹³ Dọ kaa yi yi ọ mẹmẹ re angẹni ana dinẹ tuneeshi ani dọ ka, "Tụ aza ni Ijopa doti ẹ na si Isaimọni anaa shi Ipita vẹ. ¹⁴ Ọ vaa kaa yụ wụ irenube ọiza ana vaa mẹ ki a dọ wụ tụ --- shi ẹwụ shi anreshi awụ." ̣ ¹⁵ Mmẹ vẹrẹ ọkikarẹyi yụ wa, di Ifẹ Ọnini chi tụra wa vene ọ mẹmẹ ya yiyi gẹdẹgẹdẹ ini ivẹrẹ. ¹⁶ Dim tamayi irẹyi ọni Ananyiyi ka, ọmẹ kaa ka, "Inirẹiza, Ijọọnụ vana mẹ isami enyi; ama ava mẹ isami Ifẹ Ọnini yụ wụ nini. ¹⁷ Ụmọnọ maan si vi ki Oshomoshi ọ si isọnyọnya ọnọ si me yi irẹiza ẹfi enii dọwụ, dọ zẹ si ọ mẹ wa irẹiza, ẹnẹvi ẹmi ana vaa kaachire Oshomoshi?" ¹⁸ Ẹfiẹnẹ wụrẹyi ẹnẹni, ẹzi karẹyi ọnyọnyi, ama dẹẹ sụga yi Oshomoshi, dẹ ka, "Ọnọ vi ka, Oshomoshi ọ ze si si oririnẹ varama anavaa si ẹshẹ poro pooro yi Ijẹntaini nini aavọ." ¹⁹ Ụmavọ, ẹnẹna garashi fụvọ ụyoori anọdọwụ ọna vẹrẹ ini ẹfi ana si wụ Istivini, ẹ garashi na ngwụ irekụra Ifonisha, Isaipụrọsi ọnri Antiyọki, ama dọ vi ki Iju nin renya ọnẹẹ karenube ọiza inọpati Ijesu yi. ²⁰ Ama, di anẹrụ ẹnyi inaanini ana fụri Isaipụrọsi ọnri Isairini vi Antiyọki, dẹ zaa kii karenube ọiza inọpati Ijesu Ananyiyi yi Igiriki nini. ²¹ Di ụvọ Ananyiyi ya bẹrẹ wa. Azẹrụrụ ẹrụrụ ẹnẹ dọ wụ, dẹ si ẹshẹ aanini yi Ananyiyi. ²² Di irenube inọpati ọdọwụ aanini ne tu ichọọchi ana yi Ijerusanẹmụ; dẹ tụ Ibanabasi na ngwụ Antiyọki kokoko. ²³ Ẹfi ọnọ vẹ, do re ọiza Oshomoshi, di inẹ aani shine; dọ tu wa ụkata ki ẹ kụ ọtụtụrụma aanini bo tụra Ananyiyi, doti ẹ zụ nyụfụ shiẹtẹ. ²⁴ Fụvọki ọnọrụ ọiza one shi yi Ifẹ Ọnini ọnri ọdọwụ ọnọ vi, da za azẹrụrụ ika bẹrẹ ẹnẹna nyi ọdọwụ ini Ananyiyi. ²⁵ Inaani, di Ibanabasi jinẹ ni irẹkụra Itasusi ne si Ipọọrụ. ²⁶ Ẹfi ono re, dọ siọ ni Antiyọki. Dọ sivi ki ini irayi ọvụọvụrụ dee pe iragụ anọdọwụ nin peree gụ, dẹẹ zụ azẹrụrụ. Antiyọki ọnọ vi irasaha ipaapa ọna ya shi eziafụ Ijesu Ikrisitiẹni. ²⁷ Ini ẹfi ọnọni, di ọkisẹ ẹnyi fụri Ijerusanẹmụ va ngwụ Antiyọki. ²⁸ Di ọnya inaanini, ọnaa shi Agabọsii, kwẹẹtẹ dọ siọ zụ ini Ifẹ ki ọshashi ọbani vee shi ini ẹshẹ keekere. Ụmẹ ọni Ikiraụdisi si vi oshinọyi Iromu ọni ẹtoore ọnọni si gẹ. ²⁹ Fụvavọ, di eziafu Ijesu nin gẹ roo ki ọpa ọni ọzọọza ra nyi ụkata tu, ki ẹn vaa mọgụvọ yi ẹnyara anọdọwụ ọzọọza, ana yi Ijudiya. ³⁰ Dẹ vọọ me,̣ de pere ẹkẹshi dẹ si ọ tushi azẹkụ Ijudiya zirẹngwụ Ibanabasi ọnri Isọọrụ.