¹ Ọ nyi ọnọrụ ọnyi ọna yini irẹkụra ọbani ọnaa shi Isẹsiriya, ọni irẹsha aani vi Ikọnẹriyọsi, dọ vi ọga ashoja ẹchẹshi tụni ụvọrẹkụ anaa shi Ụvọrẹkụ Itaani. ² Ọ jẹngwụ ngwụ irafẹkẹ kokoro, dọọ si ẹfitụrẹfii fẹkẹ Oshomoshi bẹri anreshi aani bo; dọọ si ẹkẹshi ụnọmpa yii onriwa nini, dọọ si ẹfi bo tuozurenu shi Oshomoshi. ³ Ini ọpati iwakati ọfụshinna, do re ẹtoore ana feeyi yọ ẹtẹẹtẹrẹ, do re angẹni Oshomoshi ọ maa vẹ vee tu o. Di angẹni ọnọ shi ọ, dọ ka, "Ikọniriyọsi!" ⁴ Ikọniriyọsi ọ feyi shi o, di angwa shi o kokoro, dọ ka, "Ada ayi, ọmẹ ya kẹ?" Di angẹni ọnọ kaa yọ ka, "Ozurenu awụ ọnri ọiza ọnụ waa mẹ yi onriwa nin ọ shirẹ nẹbẹẹba inọvidi Oshomoshi da, ana vi irẹiza ọmimẹ ọna vaa tamayi aani poro. ⁵ Ọmẹyani, tụ aza ni irẹkụra ọnaa shi Ijoopa ne tu ọnọrụ ọni irẹshani vi Isaimọni, ọnaa shi Ipita, doti ẹ na si ọ vẹ. ⁶ Ọ ra pe ọnọrụ ọni ụkọrụvọ aani vi ọtụmpasha ọmimẹ, ọni irẹsha aani vi Isaimọni, di ireshi aani yini ụtọ irefu." ⁷ Inaama ọni angẹni one pe karẹyi zi na da, di Ikọniriyọsi shi ezida reshi aani ẹẹva bẹri ashoja ọnya ọna jiẹngwụ ngwụ ụkọrọ aani ẹtẹrẹ jinẹ fini akaakana ẹnẹnee sere e. ⁸ Di Ikọniriyọsi kaa yụ wa isẹnẹ mẹ bo, dọ va tụ wa a ni Ijoopa. ⁹ Ini eyineyishẹ aani ini ọpati iwakati ọfụshinọnyi, ẹ mẹ yini ụsoze aanini, dẹẹ zi gụrẹ irẹkụra ọbani ọnọ, di Ipita shirẹ tụra ẹbẹẹba ireshi na tuozurenu. ¹⁰ Di ụngwẹ vaa kụ ọ, doo si isẹnọ vaa ri. Ama, azẹnẹ maa misari, da si ẹtoore yọ re, ¹¹ do re ki ẹbẹẹba ọ na tẹtẹ, do re ọnya ọnyi onee chii fụri ẹbẹẹba vẹ, shi isene vene ita ọgana onee chii fụri ẹbẹẹba, da za a ini aka ẹnina aani e chii vini ẹtẹ. ¹² Di uye ọ nyi ụfụ ẹẹna renyi renyi gụ ininaani, shi uye enee tura ini ẹtẹ, bẹrẹ unomi ẹbẹẹba nini. ¹³ Inaani, di ọngwẹ ọnya kaa yọ ka: "Ipita, kwẹẹtẹ, dụ wa yinaani wụ ri." ¹⁴ Ama, di Ipita ka, "Ananyiyi, ma zi vọ zụa mẹ; fụvọki ma zi ri ri isẹna razi ni yẹẹyẹ." ¹⁵ Ama, di ọngwẹ ọnọ deni zẹ kaa yọ ụpọfụụva ka, "Isẹni Oshomoshi vara ọnini da, asụụ shi ọ isẹna razi ni." ¹⁶ Ọ maan mẹ gụ ụpẹẹta; inaani da va si ọnya ọnọ shirẹ varama nẹbẹẹba ụmụmọ. ¹⁷ Ẹtoore ọnọni me shi shi Ipita eyi, di afụ aani razi shi sha sha yọ, di ẹnẹni Ikọniriyọsi tụ shi dinẹ tụni ọchiọfọ ẹfi ana zụ wa oze na ngwụ ireshi ọnọ da. ¹⁸ Dẹ si ọngwẹ tụẹba, de fisue ki izọ ọni Isaimọni ọnaa zẹ shii shi Ipita wechi tụ. ¹⁹ Ipita mee ri roo inọpati ẹtoore ọnọ, di Ifẹ Ọnini kaa yọ ka, "Re, anẹrụ ẹẹta ee fisue awụ. ²⁰ Kwẹẹtẹ, we chi ne tu wa , dụ wa vatụra wa na. Asuu yi kụ wa zi vatụra wa fụvọki ẹmi ọnọ tụ wa." ²¹ Inaani, di Ipita chi ne tu anẹrụ ẹnẹ, dọ kaa yụ wa ka, "Ẹmi ọnọ vi ọza ọnu wee fisue aani nini. Sẹnẹ za wụ vẹ nin kẹ?" ²² Dẹ kaa yọ ka, "Angẹni ọnini Oshomoshi ọ kaa yi ọga ashoja ẹchẹshi, ọnaa shi Ikọniriyọsi, ọna vi ọmanasẹrẹ, dọọ fẹkẹ Oshomoshi, di eyi yẹ ẹkụravabẹ Iju bo, ki ọ tụ aza ve tu wu ki ẹ va kaa yụ wụ ku we ve tu o ineeshi aani, doti o zu batọ tụni irenube ọiza ọnụụ vaa kaa yọ." ²³ Inaani, di Ipita shụ wa ngwụ ireshi ki ẹ va pe ọni. Ini eyineyishẹ aani ini ọnẹnẹ, dọ kwẹẹtẹ vatụra wa, di ẹnyara anọdọwụ ẹnyi fụri Ijoopa kụafụza a. ²⁴ Ini eyineyishẹ aani dẹ ngwụ Isẹsiriya. De ne tu ki Ikọniriyọsi venee zi ẹni; de ne tu ki ọ shi anda aani bo, shi ẹta aani bo gụ. ²⁵ Dọva si vi ki Ipita mẹ ngwụreshi, di Ikọniriyọsi vakuẹtẹ tụni iragada aani, dọ vaa fẹkẹ ẹ. ²⁶ Ama, di Ipita za ụvọ kwẹẹtẹ, dọ ka, "Kwẹẹtẹ dinẹ. Ọza vene wu ọni ẹmi zẹ vi vi." ²⁷ Ipita mee pe e karẹyi, ọ ngwụ inineeshi do ne tu ki azẹrụrụ e pere gụ. ²⁸ Dọ kaa yụ wa ka, "Ẹwụ nin nyẹmbẹ ọ yẹ ki ọzi sẹrẹ ki Iju o pe ẹzẹna razi vi Iju nyi ọrigẹ domotori ki ọ na kụ ani ẹkụravabẹ ọsa ineeshi aani. Ama, Oshomoshi ọ si ọ zụ mi ki asim kụ shi ọzọnyọnyi anarimani. ²⁹ Isẹnẹ mẹ ki ma vẹ, dim rezi pe wa nyi ẹshankata ẹfi ọnụụ si tụshi mi vọnọ. Ọmẹyani, o tu kụ wa kaa yi mi isẹnẹ vẹ dụụ tushi mi." ³⁰ Di Ikọniriyọsi ka, "Ẹkụshi ẹẹna tụrama, ini ẹfiaani gẹdẹgẹdẹ, mmaa tuozurenu ini iwakati ọfụshinna ineeshi ami, dim re ọnọrụ ọnyi ọna dinẹ tụni ọvidi ami, do chire auru ọnaa vụ bẹnẹ bẹnẹ. ³¹ Dọ ka, 'Ikọniriyọsi, Oshomoshi ọ wụ ozuurenu awụ da, ọnri ki ọiza ọnụ waa mẹ yi onriwa nin ọ tama Oshoshi ayi inọpati awụ da. ³² Fụvavọ, tụ ọza ni Ijoopa ki ọna shi ọnọrụ ọni irẹsha aani vi Isaimọni, ọnaa shi Ipita va yụ wụ. Ọnọrụ ọnaa shi Isamọni, ọni ụkọrụvọ aani vi ọtụmpasha ọmimẹ, ọna ra tụni ụtọ irefu, ọnọ ra pe.' ³³ Ọnọ mẹ ki ma sẹ tushi wu; waa mẹ ẹtẹrẹ dụụ vẹ. Ọmẹyani, ẹyi bo o pere gụ tụzọni inọvidi Oshomoshi ki ye ve batọ tụni irẹyi bo ọni Oshomoshi kụ wa va ka yi yi." ³⁴ Inaani, di Ipita sharenu dọ ka, "Inirẹiza, maa si yẹ ki Oshomoshi ọ ma mẹ aka. ³⁵ Akikọnọ, ọzatụrọza ọna raa fẹkẹ ẹ, dọọ mẹ ana sẹrẹ ini ẹkụravabẹ bo, ọnọọ tanụvọọ dọ. ³⁶ Waa yẹ nin itụ ọnọ tụshi ani Isrẹni nin ẹfi ono showu irenube ọiza ẹnwọrọ zirẹngwụ Ijesu Ikristi, ọna vi Ananyiyi yi aza bo --- ³⁷ ẹwụ nin nyẹmbẹ ọ yẹ isẹrụrụ ana mẹ ini ẹtẹ Ijudiya bo, vẹrẹ fụri Iganini, inaama isami ọni Ijọọnụ showu aani; ³⁸ isa bo ana mẹ inọpati Ijesu ani Inazarẹti, Oshomoshi mẹmẹ si Ifẹ Ọnini bẹri ụkata ni ọ renyi. Dọọ ngwọọ ziizi, dọọ mẹ ọiza yi aza, dọọ fụ ẹnẹni eshu a zama bo ikụụ sha, fụvọki Oshomoshi ọ ya bẹrẹ ẹ. ³⁹ Onivenu isa bo ọni Ijesu mẹ ọnii vi, isa bo ọnọ mẹ ini ẹkụravabẹ Iju nin ọnri ini Ijerusanẹmụ. Ẹẹ wụ ọ ẹfi ẹnẹ kani ọ za ọchi avashi, ⁴⁰ ama di Oshomoshi sha a kwẹẹtẹ ini ọkụshi ọfụụta, dọ navọ ki aza e re, ⁴¹ aivi aza bo ene re, ama onivenu nini ọni Oshomoshi ni tẹtẹ tụọvidi ki ene vee re --- ẹyi ene pe e ri, dii pe e fu inaama ọnọ sha kwẹẹtẹ fini akaakana enene fu su. ⁴² Dọ si ụmọ kaa yi yi ki yee showu, di yaa divenu yi aza ki ọni ọnọ vi ẹzẹni Oshomoshi ni tẹtẹ ki ọ vaa mishọọji yi anẹshẹ ọnri aneku bo. ⁴³ Ọni ọni ọkisẹ nin bo divenu yi, doti aza bo ana ra dọọwụ e zu re ayụva aichama aanini dọ zirẹngwụ irẹsha aani." ⁴⁴ Ipita maa karẹyi ẹnẹni inụvọ, di Ifẹ Ọnini vaku enbo enee batọ tụni irẹyi aani. ⁴⁵ Azẹna bẹ tụni aka anọdọwụ ọjụma nin --- ẹnẹna vatụra Ipita vẹ bo --- vono sheyi, fụvọki Ifẹ Ọnini vana zẹ vi vaku Ijẹntaini nin nyẹmbẹ. ⁴⁶ Fụvọki ẹ wụ Ijẹntaini ẹnẹ bo maa si irarẹ renyi renyi karẹyi, dẹẹ si ọ sụga yi Oshomoshi. Di Ipita si tuoshi, dọ ka, ⁴⁷ "Ọwa nyi ẹzẹna va zụụ tere enyi kavana yi azẹnẹni dọ ki asaa mẹ isami yụ wa, azẹnẹni ọnọ vi ki ee re Ifẹ Ọnini dọ vene ẹyi me ze re dọ?" ⁴⁸ Inaani, dọ kaa yụ wa ki a mẹ isami yụ wa ini irẹsha Ijesu Ikristi. Inaani, dẹ kaa yọ ki ọ ya pe ẹni mẹ ẹkụshi ẹrụrụ tụọ.