¹ Ini ụmẹ ọnọ, di Ihẹrọdụ oshinọyi za azẹnyi ana vi anọdọwụ doti o roze mụyari wa. ² Dọ si itakovi wụ Ijemsi, ọnyara Ijọọnụ. ³ O me re ka inoshine Iju nini ọnọ vi, dọ zẹ tụ ki a naza Ipita. Ụmavọ vanaa rupe ibụrẹdi ọna razi nyi ọva. ⁴ A mẹ za da, do nee ngwụni ijaaru, dọ tụ ki a na kụ ashọja ẹbẹrẹva doti e vee sere e; dọ nyiọ tụni ọtụtụrụma ki ọn va si ọ vee tu Iju nini inaama Upe Ọpiparafu. ⁵ Avọ ọna mẹ si Ipita tụni ijaaru, ama di ẹnẹna yini ichọọchi a si apada apada tuozurenu shi Oshomoshi fụvọ aani. Aa ji Ipita tụ ⁶ Inaafụ ọnyi, ọmẹ si vọ tu ụfụọ ọni Ihẹrọdụ vaa si ọ jinẹ doti ana tuoshi tụni irẹyi aani, di Ipita aa sụra ini akaakana ashoja ẹẹva, da si ẹba ẹẹva sụ ọ, di osereẹtẹ nin yini ọvidi oze, dee sere ọba ijaaru ọnọ. ⁷ Ụpọnyụpọnya di angeni Ananyiyi dinẹ pe e, di ẹtofeyi sha tụra irẹngwụ ijaaru ọna zaachire tụ. Do juvọku Ipita ini irakasha, dọ sha a, dọ ka "Sẹsẹ kwẹẹtẹ," di ẹba ọna si za ụvọ javọ fụrẹ avọ. ⁸ Di angẹni ọnọ kaa yọ ka "Chire auru awụ, dụ wa kụ ivata awụ." Di Ipita sẹsẹ vọ vọọ mẹ. Di angẹni kaa yọ ka "Chire auru ọsa ku ọtụnẹ awụ, dụ wa vatụra mi." ⁹ Di Ipita vatụra angẹni ọnọ jinẹ. Ọ zi yẹ ka iseni angeni mẹ vi irẹiza. Do ro ki ẹtoore ọna sizụ ọni. ¹⁰ Inaama ọnẹ para oserẹtẹ ọi ipaapa ọnri ọi ụpọfụụva fu da, de ne tu ọchiọfọ enyisuẹ ọnaa fụ dee ve tu irẹkura; di ọchiọfọ enyisụẹ ọnọ na yi ẹngwụani. Ẹẹ jinẹ tụẹshẹ, dẹ zi ọvanjoze ọnyi chi, di angẹni vọọ fụrẹụvọ izọ. ¹¹ Ẹfi ọni eyi Ipita si fa, dọ ka, "Maa yẹ inirẹiza ki Oshomoshi ọnọ tụ angẹni aani ki ọ va dọm tụ finụvọ Ihẹrọdụ, shi isa bo ọni Iju nin aa nyi iribatọ aani." ¹² Ẹfi ọnọ maan yẹ da, dọ ni ineeshi Imeri onyi Ijọọnụ (ọna zẹẹ shii shi Imaakụ), izẹni aza ẹrụrụ pere gụ tụ, dẹẹ tuozurenu. ¹³ O me fuoze ọna yini ọchiọfọ ireshi, di oziọnyẹnẹ ozida ọnaa shi Iroda jinẹ vẹ, dọ na tuoshi. ¹⁴ Ọ mẹ wụ ọngwụẹ Ipita, di ụjẹ shi o inẹ netu ka ọi va kụ tamayi na na oze ọchiọfọ yọ; akikọnọ, doo zue varama ni ni irẹngwụ, dọ na kitụ ka Ipita ọ dinẹ tụni ọpanfuoze. ¹⁵ Dẹ kaa yọ ka, "Ẹwụ kue suvu aano." Ama, dọ ka irẹiza ọni ọnaa ka. Dẹ ka, "Angẹni aani yọ." ¹⁶ ama, Ipita mẹ vee fii fu oze, dẹ na na oze. E me re, do shu wa eyi. ¹⁷ Di Ipita sụvọ kaa yụ wa ki asẹ sụọkụ, dọ ka yụ wa Ananyiyi mẹmẹ tụ ọni jinẹ fiini ijaaru. Dọ ka, "Na kitụ irẹyi ẹnẹni yi Ijemisi, shi ẹnyara ayi ini ọdọwụ nini." Inaani, dọ fi izọ, dọ ni irasha ọsa. ¹⁸ Ọmẹyani, eyi mẹ si ni, aivi ozi ẹshanakata ọnọ yini akaakana ashọja nin inọpati irẹyi Ipita, ki sẹni ẹn yẹ kọọ na mẹ ẹ. ¹⁹ Ihẹrọdụ me si o do rezi re, dọ fọ oserẹtẹ nini ipẹpẹẹ, dọ si ụmọ kaa ki a wụ wa. Inaani, di Ipita chi fụri Ijudiya na ngwụ Isisariya, dọ na yi izọ. ²⁰ Ụmavọ, Ihẹrọdụ vanaa mọikụ shi ani Itaya nin shi ani Isidọni nin. Di irẹkụra ẹviva gẹ ne tu o. De ne tu Ibiratusi, ana vi ọnọguvọ oshinoyi, dẹ kaa yọ ki ọ mọgụvọ yẹni. Inaani, dẹ dipẹ yọ ki ẹngwọrọ ọni enee si, fụvọki irẹkụravabẹ ẹnẹviva vanaa kụ isari vaa yi yi fụri irẹkụavabẹ oshinọyi. ²¹ Ọkụshi ọnẹ ji me tu, di Ihẹrọdụ kụẹnya oshinọyi aani, dọ yatụ tụra ogede, dọọ karẹyi yụ wa. ²² Di aza ee nowu, dee gono o, dẹ ka, "Ọngwẹ ori yi, aivi ọngwẹ ọza!" ²³ Afuọnọ afuọnọ, di angẹni Ananyiyi visari ọ, fụvọki ọ zi sụga ọnọ yi Oshomoshi; di ukokoromi nin ri ọ, do su. ²⁴ Ama di irẹyi Oshomoshi aa fụ tụọ, dọọ garashii fuavọ. ²⁵ Ẹfiẹni Ibanabasi ọnri Isọọrụ mẹ ụkọrọ one si chire wa ụvọ zẹtẹ da, dẹ varama fụri Ijerusanẹmụ, dẹ si Ijọọnụ ọna zẹ shii shi Imaakụ bẹrẹ ẹngwụ.