¹ Asụụ si ọngwẹ ọikụ karẹyi shi azẹkụ. Akikọnọ, tụ wa ụkata vene ụụ mẹ vaa mẹ shi ada awụ. Pe anẹrụ ana da wụ vachi karẹyi ana vaa tụ wa ụkata venụụ mẹ vaa mẹ shi ẹnyara awụ. ² Pe ọnyọzọkụ nin karẹyi ọna vaa tụ wa ụkata venụụ mẹ vaa mẹ shi ọnyi awụ nin, ọnyita nin venụụ mẹ vaa mẹ shi ẹnyara awụ anyẹnẹ inoze ọnini. ³ Sụbani yi osoku nin, ẹnẹna vi osoku oboro. ⁴ Ama, aaviki osoku ọ nyi ezi navẹki aazi, navọ di ezi navẹki aazi aanini ẹ bidi kọsuẹ amẹmẹẹ si ụbani yi ọnyi aanini ana vi osoku ini ovuovu aanini. Navọ dee si ọnyi ọnri ada aanini atọ, fụvọki inẹ Oshomoshi venee shine tụnaani. ⁵ Ama, osoku oboro ọn vana vi ọnirenya. Dọọ kụayitura Oshomoshi. Ini ipẹ ọdidọ ọnri ozurenu ọtitụ ọnọọ ya poro, ọọdụ shi irafụ. ⁶ Ama, ọnyẹnẹ ana ra yini ẹshẹ ọri ri poro vene fu su, shọọ daka vi ki ọọ ti tụfẹ. ⁷ Zụ wa irẹyi ẹnẹni doti asọ vana vi irẹyi ụshi yụ wa. ⁸ Ama, ọzẹna razi mẹ oze ọgụvọ tẹtẹ yi aza aani, paapa anreshi aani, ọnọ vi ki ọ fụrẹ ọdọwụ aani ụvọ tẹtẹ, di ayaani si duvi funa ẹnẹna razi vana nyi ọdọwụ. ⁹ Navọ di ọnyẹnẹ ọni ọva aani fu su, ọni ọkụshi irẹsụ aani rezi weyi fu irayi ẹbẹrẹta, ọnọ vi ki ọva ọnya ọnọ nyi, ọ va si irẹsha aani tẹtẹ, doti a zaika bẹrẹ osoku nin. ¹⁰ A bẹdọ yẹ tụni ọnụkọrụvọ ọiza, vene ọzẹne bidi sieyipe ezueyi da, navẹki ọ mẹ azẹga ẹtẹrẹ da, navẹki ọ nyina anọdọwụ nin afụ da, navẹki ọ mọgụvọ yi ẹnẹnaa rụya renyi renyi da, navẹki ọ ji ẹngwụ ngwụ ụkọrọ ọiza ọmimẹ. ¹¹ Ama, asu za ezueyi nin ana vi osoku ika bẹrẹ osoku nin. Fụvọki ụmẹ ono re tu, ẹ vaa si ẹngwụ aanini yi osisi ẹchẹngwụ inoze ọni Ikristi rezi si, dee si ki ẹ naa nyọva. ¹² Inoze ọnọni, dẹẹ si ivi ri, fụvọki ẹ varama ka isẹnẹ bidi aa mẹ ineeshi Oshomoshi. ¹³ Dọ vana zẹ si vi ka iriworo ọọ yẹ wa ẹngwụ da. Dẹẹ fini ireshi ọnya naa ngwụ ọsa. Ẹ maa nyi iriworo, avọ ọnẹ maa kụ aza irẹka inaama aanini, dẹẹ jẹngwụ ngwụ irẹyi ọni irẹyi. Dẹẹ karẹyi ọna razi vọrọ ki ẹ ka. ¹⁴ Fụvavọ mee si ki ozioshi nin ẹ nyọva, dẹẹ mozi, dẹẹ sieyipe ireshi aanini, doti asi ọnivi ne roze jivi yi yi ki ọ nyi akụvi ọnii mẹ. ¹⁵ Fụvọki azẹnyi ẹ va fini oze irẹiza da, dẹẹ vaatụra eshu. ¹⁶ Aaviki ọ nyi ọnyenẹ ana vi anọdọwu ọnyọnyi ana nyi osoku tụni ovuovu aani, ọ navọ ọ mọgụvọ yụ wa doti asi ẹnya ne chi iragu anọdọwụ nin ẹngwụ, doti e roze mọgụvọ yi osoku oboro nin. ¹⁷ Navọ a sụbani ẹdabẹrẹ yi azẹkụ ichọọchi anaa mẹtẹrẹ ini iragụ anọdọwụ nin, paapa ẹnẹnaa si irẹyi Oshomoshi ọnri ọzizụ aani mụkọrọ. ¹⁸ Fụvọki iwe ọnini ọ kaa ka, "Asụụ si orupa sụ ụnọ enee pe wu mụkọri irarẹ awụ irenu ẹfi ọnọ raa mụkọrọ ọnụụ si yọ," ọnri ki, "Ọ sẹrẹ ki e si anụkọrọ ụta ụkọrọ ọnọ mẹ." ¹⁹ Aaviki a va tụrẹka yụ wụ ki ọ nyi akụvi ọni ọzọkụ ichọọchi mẹ, asụụ fira na dọzẹ ki irẹiza yọ, ọchishi kuu re onivenu gụ ẹẹva navẹki ẹẹta. ²⁰ Navọ wa zụ anaichaima oze ana sẹrẹ ineyi aza bo, doti ẹnẹnavọ ẹ zụ nyi angwashi. ²¹ Maa si ụmọ kaa yụ wụ nin, inọvidi Oshomoshi, ọnri Ijesu Ikiristi, ọnri Angẹni nin ana ni, kụ wa si ụmọ ẹnẹni mukọrọ nini, asụụ ni ọza remeyi nini, navẹki isọnsọnyi ana vaa siọzụ ki ọ nyi ọzọnụụ dọrẹsụ sirẹyi aani fu ọsa. ²² Navọ asuu sheyi kụ avọ tụra ọzọnzọnyi. Asụụ nyụvọ tụni aichama ọzẹnẹsa. Mẹ ẹngwụ awụ nin ọnini. ²³ Asuu savọ ku fu enyi. Akikọnọ, ka eche iwaini che, dụ wa joombo fụvọ inẹ awu ọnri ẹngwụọzi awụ pẹrẹpẹrẹ. ²⁴ Azẹnyi vọna yẹ aichama aanini ini eyigede, di aichama ẹnẹ tụọvidi aanini ngwụni ishọọji. Ama, aichama azẹnyi vanaa vatụra wa irama. ²⁵ Avọ ọnọ mẹ zẹ vi vi ki ụkọrọ ọiza ẹnyi vana zẹ yi yẹ ini eyigede, ama azẹi zụa si anavọọ tẹ.