¹ Navọ di ẹnẹna si ọparaka ọrishi za bo ẹ si ụbani ana sẹrẹ ọga aanini yụ wa. Ọ vọrọ ki ẹ maan mẹ doti asi aza na mẹ isaanyisi shi Oshomoshi ọnri ọzizụ aani. ² Asi ọrishi nin ana nyi ọga anọdọwụ sieyiwụ ọga aanini fụvọki ẹnyara ayi anọdọwụ ẹnẹ vi. Akikọnọ, ọ vọrọ ki ẹẹ fẹkẹ wa fuavọ. Fụvọki ọga ọnẹẹ mụkọrọ yi vi anọdọwu, dẹ vi azẹni Oshomoshi sirẹyi aanini. Navọ dụ waa zụ wa isẹnẹni, dụ wa zẹ shii showu aani. ³ Zama re deere, aaviki ọ nyi ọzẹnaa zụ isẹnẹ ikoze irenyi, dọ razi vatụra ọzizụ irẹiza ayi, ọna vi irẹyi Ijesu Ikristi Ananyiyi. Aaviki ẹzi tanụvọ dọ ọzizụ ọnaa za aza naa ngwụni ọmimẹ Oshomoshi. ⁴ Ẹngwụ ọza ọnọ vanaa kụ avakaa tụẹba, ọnri ki ọzi yẹ isọnsọnyi. Akikọnọ, ọ kụ ẹngwụ vi ẹngwụ ẹshankata ọnri irẹyi tụrirẹyi. Ọvairẹsụ ẹngwụ irẹyi ẹnẹni vi ayamkụ, irazi, ụfụ ọki kụ ẹngwụ, arima dọ ẹngwurenu, ọnri ⁵ irazi anaa si ẹfitụrẹfii zi ini akaakana ẹnẹna razi nyi ivefu ọiza. Ẹẹ varama fini ana vi irẹiza. Dee ro ka arimamẹ osisi Oshomoshi ọnọ vi oze ana sii vara opisa. Asụụ nyụvọ tụni isẹnẹni nini. ⁶ Ọgu ọbani ọnọvi yi ọzẹna nyi ivefu Oshomoshi, ọni isa che ọnọ nyi fụ. ⁷ Fụvọki ọzi nyi isọnsọnyi ọnii za vẹshẹ. Ọi zẹ va nyi nyi isọnsọnyi ọnii vaa za chaụvọ fiinaani. ⁸ Akikọnọ, a navọ di isari ọnri ita ọnii ve sii ku ẹngwụ ọ fụ yi. ⁹ Enene si ki ẹnaa vara opisa vene zina ngwụni amore, de zina ngwụ irẹpa. De zina ngwụni isa ozititụ renyi renyi, shi osisi ẹchẹgwụ renyi renyi, shi ọntụrọni ọnaa kọzụvọ na ngwụni isu ọnri ovivuri. ¹⁰ Fụvọki ẹkẹshi osi sirẹyi aani ọnọ vi ẹpa ọna za isọshimi bo dinẹ. Azẹnyi e sirẹyi ẹkẹshi netu ki ọ ba wa sẹdụ finoze ọdọwụ da, dẹ si inẹ-odu ta ẹngwụ aanini anava. ¹¹ Ama, ẹwụ ana vi ọza Oshomoshi, navọ we zue kavana yi isẹnẹni, dụ waa dụ ọmimanasẹrẹ, ọmimẹ Oshomoshi, oze irẹiza, osisirẹyi ẹngwụ, ọsiẹngwụdọ ọnri ụmẹnẹ. ¹² Sikamarenu ini echi ọiza ọnu wee zue ini ọdọwụ. Sụvọ za ẹshẹ poro pooro ọna shụ wụ tụ ẹtẹrẹ. Ọnọni ọnụụ divenu inọpata aani inọvidi azẹrụrụ ka isọiza ọnọ vi. ¹³ Maa si ụmọ ọnọni yụ wụ inọvidi Oshomoshi ana tụ isa kekere vẹshẹ, inọvidi Ijesu Ikiristi ana karẹiza yi Ipọntiyọsi Ipaireti. ¹⁴ Sụvọ za ụmọ ọnọni ẹtẹrẹ doti asọ nyi ivi netu ụmọni Ijesu Ikristi Ananyiyi vaa siẹngwụ zụ. ¹⁵ Oshomoshi ọna nyi ụbani, Ọnẹdabẹrẹ, Ọnụkata ene fu, Oshinọyi ana shirogede, Ananyiyi ọnaa mẹ ijọva, vaa si ọvivẹ aani zụ ini ẹfi ana sẹrẹ. ¹⁶ Ọn renya ono reme su, dọ ra ininẹ ẹtofeyi ọnọ ọza reme zu tere pe. Ọzi nyi ezene ve zuu re e, navẹki e shee eyi. Ọni renya ọnọ nyi ụbani ọnri ụkata poro pooro. Aami. ¹⁷ Kaa yi opisa nini ana yinẹshẹ ọnọni ki asẹ kụẹngwụ tụẹba, ọnri ki asẹ kụ ọtụtụtụma tụra ogu aanini ọnọviki isẹne ve zuu vu ọnọ vi. Akikọnọ ẹ kụ ọtụtụrụma aanini tụra Oshomoshi. Ọn renya ọnọ zụụ mẹ ogu yi ọza, ọnaa mọza inẹẹshine. ¹⁸ Kaa yụ wa ki ẹẹ mọiza, ki ẹ vi opisa ini ụkọrọ ọiza, ẹẹ shụvọ sha mẹ irẹiza yi aza. ¹⁹ Ini oze aavọ, dee teni isa tẹ yi ẹngwụ aanini ana vaa mẹ ki iramụfụọ aanini ọ nyi afụ shẹtẹ yi ọiza anaa vẹ, doti ẹ zu sụvọ za ẹshẹ oboro. ²⁰ Ẹwụ Itimoti, teni isa ana si chire wụ ụvọ. Sheni kavavana yi irẹyi ozititu ọnri ẹshankata ọshimi ọni azẹnyi nyeeyi aa shi irẹyiọyẹ. ²¹ Azẹnyi e showu isẹnẹni, di ọdọwụ aanini jụ wa ụvọ. Ọiza ọfẹ ọ va si vi ayawụ nini.