¹ Irẹyi ọnọni vi irẹyi irẹiza ana razinyi ọjirẹka: Aaviki ọza ee si ki ọnaa vi ọdọvidi iragụ Oshomoshi, ọ vọrọ ki ọ nyi osisi yi ụkọrụvọ ọiza ọmimẹ. ² Fụvavọ, ọdọvidi iragụ ọzi bẹdọ nyi ụvọ tụni akụvi ọmimẹ. Ose ọnya ọnọ bẹdọ ra nyi. Ọ zi bẹdọ mẹ jinẹngwụ aani, dọọ nyi irẹyọyẹ, dọọ si eteeto misa, dọọ mẹ azẹga ẹtẹrẹ. Ọ bẹdọ yẹ a mẹmẹẹ zụ aza isa. ³ Ọ zi bẹdọ vi ofueche, navẹki ọvụrẹvụ; akikọnọ ọ vi ọza shẹẹshẹ ana nyi ụmẹnẹ. Ọ zi bẹdọ vi ọzẹne sirẹyi ẹkẹshi. ⁴ Ọzẹna zụa sụvọ za ofenje aani ẹtẹrẹ ọnọvọrọ ki ọ vi, ọnri ka di ezi aani aa wụrẹyi tụ ọ irenu, dẹẹ zẹ dụbani yọ ọmẹ sẹrẹ. ⁵ Fụvọki ọnọrụ razi yẹ a mẹmẹẹ sụvọza ofenje ayaani, ọ mẹmẹ va zụụ sụvọza iragụ Oshomoshi aavọ? ⁶ Ọzi vọrọ ki ọ vi ọzẹna shẹshẹ nyi ọdọwu, doti asọ va naa kụavaka tụẹba ana vaa mẹẹ zinaa ngwụ ivi venebiri Eshu. ⁷ Ọzẹ vi vọrọ ki ọ vi ọza ọni anẹshẹẹshẹ nin aa ka ọiza aani, doti aso vene zina ngwụ ini ụtẹ ọnri irẹpa ọni eshu va. ⁸ Avọ ọnọ mẹ zẹ vi vọrọ ki Idikọni nin nyẹmbẹ ẹ nyi ụbani; ọzi vọrọ ki ẹ viaza ana nyi irarẹ ẹẹva. Ọzi vọrọ ka dẹẹ bara eche ofifu, navẹki dẹẹ risari avụka avụka. ⁹ Ọ vọrọ ki ẹ si ọtutụrụma ọiza za irẹiza ọdọwụ ana tẹ ọna si zụ wa. ¹⁰ Ọ vọrọ ki a savọ zama wa re, aaviki ẹ zi nyi ivi, daa tangwa va navọ ki ẹ mụkọrọ ọdọwụ. ¹¹ A vọ ọnọ mẹ zẹ vi vọrọ ki anyẹnẹ nin ẹnẹ zẹ sii si ụbani yi ẹngwụ aanini. Ọzivọrọ ki ẹ vi ọza anaa si irenu du azẹnẹsa sha. Asẹ mẹ jinẹngwụ aanini, ọnri ki ẹ nyi irẹiza ini oze bo. ¹² Ose ọnya ọni Idikọni nin bẹdọ nyi. Ẹ bẹdọ sụvọ zi ezi ọnri anreshi aanini ẹtẹrẹ. ¹³ Fụvọki ẹnẹna mụkọrọ aanini ẹtẹrẹ vana si ụbani ọnri ayiọvanẹtẹ ọbani yi ẹngwụ aanini ini ọdọwu ana yininẹ Ijesu Ikristi. ¹⁴ Maa chẹrẹ isẹnẹni tuu shu wu, dim zaa nyi iribatọ kim vaa jantu vee tu wu. ¹⁵ Azẹ ma yẹ dim ku, ọni maa si chẹrẹ iwe ọnọni, doti wa zụ yẹ a mẹmẹẹ si ivefu ọiza misa ini akaakana anreshi Oshomoshi, ana vi iragu Oshomoshi, ana nyi ifẹ, ana vi ọchiọtu ana si irama ka ini irẹiza. ¹⁶ Ọzi nyi ọjirẹka ka, irẹiza ana tẹ ọni Oshomoshi si zụ yi inọpati ẹngwụ aani ọ ọbani: "Ọ siẹngwu zụ ini ụpẹngwụ, di Ifẹ Ọnini dọirenu, di Angẹni nin re e, de showu aani ini akaakana irẹkụravabẹ bo, da dọọwụ ini ẹshẹ, da si ọ shirẹ nẹbẹẹba ini ụga."