¹ Fụvavọ, inipaapa, mee si ki ma tụ wụ ụkata nini, dụ waa pe azaa mẹ ozurenu ipẹ-ọdọ, ozurenu ọnri avọọkụ shi Oshomoshi yi aza bo: ² yi oshinọyi nin ọnri ẹnẹna yini udi ụmọ bo, doti ya zụụ mẹshẹ ẹngwọrọ ọnri ụmẹnẹ inoze ana sẹrẹ inọvidi Oshomoshi, ọnri ụbani. ³ Ọnọni ọnọ sẹrẹ, dọ vi isẹni Oshomoshi Ọdọzatụ tanụvọ dọ. ⁴ Osisi aani ọnọ vi ki aza bo ọ va nyi ọdidọtu ọnri ki ẹ va nyi ọyiyẹ ini irẹiza aani. ⁵ Fụvọki Oshomoshi ọnya ọnọ yinaani, ọnri ki Ijesu Ikristi renya ọnọ vi anakaakana yi ọza ọnri Oshomoshi. ⁶ Ọ si ẹngwụ aani dudi aichama aza bo, dọ si ọ mivenu ini ẹfi ana sẹrẹ. ⁷ Fụvavọ da si ẹmi nyẹmbẹ mẹ ọdọvidi irẹyi ọnọni ọnri ọnitụ. Irẹiza ọni maa ka. Mazi nyapinẹ. Ọzuọzisa Ijẹntaini nin ọnim vi ini ọdọwu ọnri ini irẹiza. ⁸ Fụvavọ, mee si ki anẹru ana yi izitizi ẹ tuozurenu, doti ẹ tanụvọ ọnini shi ẹbẹẹba, dọọ ma nyi ọikụ ọnri ẹshankata ini akaakana aanini. ⁹ Mi zee sii si ki anyẹnẹ nini ẹẹ kụ ẹnya inoze ana sẹrẹ, dẹẹ ma mẹ jinẹ ẹngwụ aanini, ọnri ki dẹ nyi ọzizẹngwụsụ ini ẹnya ọkiku. Asẹ si ẹyi ọsa bẹrẹ ẹyi aanini va, asẹ ku igoonu, navẹki iruweyi, navẹki ẹnyẹngwụ ọkatarishi. ¹⁰ Mee si ki ẹẹ kụ ẹnya ana sẹrẹ anyẹnẹ anaa si ọmimẹ Oshomoshi zụ zirẹngwu ụkọrụvọ ọiza. ¹¹ Ọnyẹnẹ vọnọ vọrọ ki ọọ kọsụẹ ini iriji, dọọ vaatụra irẹyi ọna ka. ¹² Ma zi sioze yi ọnyẹnẹ ki ọọ zụ ọnọrụ, navẹki ọọ mụmọ tụra ọnọrụ irẹsu, ama ọ vẹngwụnẹtẹ shẹẹ. ¹³ Fụvọki Adamu ọni Oshomoshi bidi tụ vẹshẹ dọ va nyi kọọ tụ Iivi vẹshẹ. ¹⁴ Ọzi vi Adamụ ọna jivene, ama ọnyẹnẹ ọnọ ọna jivene fụreshi inoze aichama. ¹⁵ Ama, shi ọmẹ daka vọọ vi, a vaa dọọ tụ zirẹngwu ezi ọmima, aaviki ẹ zụvọdinẹ ini ọdọwụ, osisi, ọnri ọshishatụ ini ivefu ọiza.