¹ Ụkụ Ẹmi Ipọọrụ, ọna vi ọnitụ Ijesu Ikristi inoze ọna vatụra ụmọ Oshomoshi ayi Ọdọzatụ ọnri Ijesu Ikristi ọna vi ọkụayitụra ayi, ² tushi Itimoti ọna vi ozi irẹiza ini ọdọwụ. Ọiza ọfẹ, ayụva, ọnri ẹngwọrọ fidi Oshomoshi Adayi ọnri Ijesu Ikristi Ananyiyi ọva si vi ayawụ. ³ Venim mẹ mẹ ka yụ wụ dim tangwa va kwẹẹtẹ aa ni Imasidoniya, savọ yi Ẹfisọsi dụ wa zụ sụmọ kaa yi azẹnyi ki asẹ jụmọ vẹtẹ ana va zụ aza isa ana razi vaji isẹna ka tẹtẹ. ⁴ Navẹki dee batọ tụni ụshi tụrụshi ọnri irẹyi inọpati izẹni ọza chi fụrẹ ana razi nyi ọtẹfi. Ẹnẹni bo vanaa kụ ẹshankata shiẹtẹ, ọnọ vọrọ ki ọ navọ ki eto ọni Oshomoshi mẹ tẹtẹ zirẹngwu ọdọwu ki ọọ nọvidi. ⁵ Ọmẹyani, isẹni ụmọ ọnọni aa duechi aani ọnọ vi osisi ana fini ọtụtụrụma ọnini, ana fini ivefu ọiza, ọnri ana fini ọdọwu irẹiza. ⁶ Azẹnyi e nyeeyi finoze ana sẹrẹ da, dẹ varamaka isẹnẹni, dẹẹ veyika irẹyi ana razi zarẹsu. ⁷ Ee sioze ki ẹnẹ vi ọzụọzisa ini irẹyi ofi, ama irẹyi ẹnẹẹ ka o zi ye wa ọnri ka ẹzi yẹ navẹki isẹnẹnaa ka vi irẹiza. ⁸ Ama, yaa yẹ ki ofi vi isọiza aaviki ọza ọ vatụra a inoze ana sẹrẹ. ⁹ Yaa yẹ ki azẹzi mẹ ofi yi ọmanasẹrẹ, ama ẹnẹna ra ma vatụra ofi ọnri avaazi nin ọna mẹ ẹ yi; ẹnẹna razi nyi ivefu Oshomoshi tụni ẹshẹ aanini ọnri anaichama nini; shi ẹnẹna razi nyi Oshomoshi tụni ẹshẹ aanini ọnri ẹnẹna razi dụbani yi irẹyi Oshomoshi, ọna mẹ ẹ yi. A mẹ ofi yi ẹnẹnaa wụ ọnyi ọnri ada, ọnri ọwụọza nin, ¹⁰ ẹnẹnaa mẹ ititụ asụ, animọrimọ asụ, ẹnẹnaa za ọza dẹ vara ọ ọrishii, anapinẹ nini, ọnri ẹnẹnaa divenu apinẹ ọnri isa bo ana razi vaji oze irẹyi irẹiza ana ka tẹtẹ. ¹¹ Irẹyi ọnọni ọ vatụroze irenube ọiza ana nyi ụga ọni Oshomoshi ana nyi ẹdabẹrẹ si chire mi ụvọ. ¹² Ma kụ Ijesu Ikiristi Ananyiyi avọ. Ọ yi mi ụkata dọ si mi tụni ụkọrọ ọdọwụ, fụvọki ọ sieyi ọnirẹiza re mi. ¹³ Ẹzẹnaa karẹyi ene rezizee shi Oshomoshi ọnimvi oshẹtẹ, di maa mụyaari anọdọwụ nin, di maa si ọikụ du isa vaa sha. Ama, dim re ayụva dọ, fụvọki ini arimadọwụ ọnri arimayẹ ọnim bidi yaa mẹ isẹnẹni bo. ¹⁴ Ama di ọiza ọfẹ Ananyiyi shi yi ọdọwụ dọọ kaa vaa sha, bẹrẹ ọdọwu ọnri osisi ana yininẹ Ijesu Ikristi. ¹⁵ Itụ ọnọni vi irẹyi irẹiza ọnọ vọrọ ki a shẹngwụsha dọ, ki Ijesu Ikiristi ọ vẹ ini ẹshẹ ọnọni va dọ anaichama nin tụ. Ẹmi nyẹmbẹ vi anaichama enefu bo. ¹⁶ Ama, fụvavọ, dim re ayụva dọ, doti Ijesu Ikristi ọ zụ si ọsẹngwụdọ aani zụ zirẹngwụ ẹmi ana tụọvidi ini anaichama. Ọ maan mẹ doti o roze siọ mẹ iweọji yi ẹnẹna kụ ọtụtụrụma tụra a ki ẹn vaa mẹshẹ poro pooro. ¹⁷ Ọmẹyani, ụbani ọnri ụga ọnọ sẹrẹ Oshomoshi ana vi ọnya poro pooro, ana vi oshinọyi fụrụmọrụmọ, ene re me su, ọni ọza ze me re. Aami. ¹⁸ Ẹwụ Itimoti, ozi ami, maa si ofi ọnọni tụọvidi inoze ana vatụra ẹtoore ene re yụ wụ tụrama, doti wa zụ vụrẹvụ ana yini ọdọwu inoze ana sẹrẹ, ¹⁹ dụ wa ta ọdọwụ ọnri ivefu ọiza ku. Ọdọwụ azẹnyi ana kụrẹyi ọnọni sha vana vanga do chirẹnya. ²⁰ Ẹngwụ azẹnẹni vi Ainẹniyọsi ọnri Anẹkzanda, ọnim si chire Eshu ụvọ doti ọ zụ wa ki ọzi sẹrẹ ki ọza ọọ ka isaanyisi shi Oshomoshi navẹki irẹyi aani.