nbtt-igb-x-etuno_1pe_text

Irẹsụ 3

¹ Inoze ọnyọnya, ẹwụ nini ana vi ose, navọ wa vẹngwụ shẹtẹ yi ọva wụ nini. Wa vọọ mẹ, shi ọ daka viki anẹrụ ẹnyi ẹ ma vatụra irẹyi Oshomoshi, ivefu ose anini vaa zụ mẹ ka ẹ vara, shi ọ zi daka karẹyi yọ ọ. ² Fụvọki e ve re ụbani ọnụ waa daa yụ wa ini irẹiza, zirẹngwu ivefụ ọiza. ³ Navọ asọ viki ini ẹnya-ẹngwụ renyi renyi ọni ụ vaa si mee; ẹyi ọninọ ene zụ gẹ ẹyi-irẹsụ, igonụ naveki ita ọkatarishi. ⁴ Akikọnọ, navọ wa mi isa ọiza ana fi ininẹ ọtụtụrama awụ vẹ ọnri uzoza ifẹ shẹshẹ, ọnri ẹngwụọrọ, ana ngwu Oshomoshi eyi etẹrẹ. ⁵ Fụvọki aavọ ọni anyẹnẹ ana nyi ifẹ ọnini mẹẹ kwẹnya oo shẹtẹ. Ẹẹ kụayitụra Oshomoshi, dẹ vẹngwụ nẹtẹ yi ̣ọva anini. ⁶ Aavọ ọni Isera mẹ wụ irẹyi tu ọva aani renụ, dọọ shi ọva aani Ananyimi. Ezi aani ọnụvi ọmẹyani nin, aaviki wa mẹ isa anasẹrẹ ọnri kụ wee zi shangwa irẹyi. ⁷ Inoze ọnyọnya, ẹwụ nin ọva, waa si ọyiyẹ pe ose awụ mẹ nini, fụvọki ẹnẹ vi ovi fụẹfụẹ ana razi kata.̣ Ọ vọrọ kụ wa sụbani yu wa fụvọki ẹwụ ri ụwa, ọnọ gẹ vaa riọgụ ẹshẹ poro-pooro. Mẹ ọnọni doti asi ozụrenụ awụ za dinẹ. ⁸ Ini ọikọta, ẹwụ nin bo, waa mọ ọnyanya nini, nyi ayụva, osisirẹyi ẹngwụ vene ̣ẹnyara, ọtụtụrụma ana rọ, ọnri ụmẹnẹ. ⁹ A sụụ si ọshimi si ụta ọshimi, navẹki wa sụfụ si ụta ụfụ. Akikọnọ, waa mẹ ẹdabẹrẹ fụvọ ọnọni ana si shụ wụ, dụ ̣wa riọgụ ẹdabẹrẹ. ¹⁰ "Ọza ene re sirẹyi ẹshẹ ani, doo si ka ọno re ẹkụshi ozoza, vọnọ vọrọ ka ọ si irarẹ ani fini irẹyi ovivene-ọza, dọ sụvọ zi onupa ani fini apẹ-ọmimẹ. ¹¹ Navọ dị ẹ varama fini isa odụvi, dọọ misa ọiza. Oo si ẹngwọrọ, doti waa vatura. ¹² Iri Ananyiyi ee re ẹzẹna manasẹrẹ, di ụtọ aani aa wụ, isa ene fisụe. Ama, Ananyiyi ọọ vi eyi irazi ka ẹnẹna mi ọshimi." ¹³ Ẹnẹ vi ọza ọnọ ana va zụụ me wụ ọshimi aavi ku wee si isa ọizạ? ¹⁴ Ama, waa rụya fụvị anasẹrẹ, ọmimẹ-anasẹrẹ, ẹdabẹrẹ vi ayawụ. Asụụ shangwa, isẹna mangwa shu wa. Asụụ tụayinẹ. ¹⁵ Ama si ụbani yi Ananyiyi Ikristi ini ọtụtụrụma awụ. Teni ẹngwụ tẹtẹ ini ẹfi boo, dụ wa zụ voshi yi ọzatụrọza ana raa fọ wụ ka, si u nyi ọkụayitụra ini Oshomoshi tụ. Navọ wa si ụmẹnẹ tụọ, dụ wa si ụbani yụ wa. ¹⁶ Nyi ivefu ọiza doti ụshi ọ nyi ẹnẹna kụ wụ ufụ fụvị ẹshẹ ọiza awụ ini Ikristi, fụvọki ẹẹ ka ọshimi awu venebiri ka isa ọshimi waa mẹ ninị. ¹⁷ Ọọ dashi fụ ki Oshomoshi ra vọ sio, kụ waa rụya ini ọiza ọnị waa mẹ, fụni ọshimi ọni waa mẹ. ¹⁸ Ikristi nyẹmbẹ ọọ rụya fụvi aichama. Ọza ana manasẹrẹ, dọ rụya yi yi, ẹyi ana razi manasere, dotị ọ zụ si yi ve tụ Oshomoshi. Aa wụ ọ ini ẹchẹngwụ, ama di Ifẹ Ọnini sha a kwẹtẹ. ¹⁹ Zirẹngwụ Ifẹ Ọnini, ọna ki renụbe yi ifẹ nini ana yini ijaarụ. ²⁰ Ẹ zi wụ irẹyi chire Oshomoshi renụ, ụmọni ụmẹnẹ Oshomoshi zụ wa ini ụmẹ Inoa, ụmọnị ana mẹ epaa, di Oshomoshi ji aza che tụ, aza shinta ẹnẹvi. ²¹ Ọnọni ọnọvi oterẹwa anaa dọ ụ tụ ọmẹyani, aivi vene amẹ nyinẹ-vụvụ fini ẹngwụ, ama vene ipọọdọ ọi ivefụ ozoza netụ Oshomoshi, zirẹngwụ ọshisha kwẹtẹ Ijesu Ikristi. ²² Ikristi yini akụvọri Oshomo-shi. Ọọni ineekụ. Angẹni nin, ijova ọnri ụkata vee nyima rẹsụ yọọ.