¹ Nakan tapi mbǝsmǝn khǝra'ta tǝmɗi fǝrkit, mbǝsmǝn khaskhaskǝt tǝ Farta tǝmɗi Yesu Almasihu. ² Tǝmǝnɗiyowun paɗ mbǝstǝmǝn sa'tǝ kǝmɗi kakǝta mǝɗi tlartǝmǝn kǝtlǝm fǝrkit 'yamǝn. nggamǝn sǝk mbǝnd fǝ kaan tǝ Farta kǝ ɓǝra ɗǝnɗi ne sǝɓtǝfǝ kǝ panga khur mandǝ 'yan. ³ / 3 Ngga nda'an ndak wa nggamǝn sǝk mbǝndfa tǝ ɓakhtǝ'yamǝn sǝnmǝnwa ɓakhtǝkhaa tlǝ nggǝtchan kǝrǝsta, ⁴ Kǝrǝstǝ paɗ tlǝ ɓachan tǝ nggǝmandǝ ǝna, nggǝmandǝ ǝn paɗ tlǝ ɓachan tǝ ɗǝf kǝfat kǝ ɗǝnɗi ne panga. ⁵ Ɗǝfkǝfat'yamən ɓawa tǝ khartǝfawa kǝtlǝm tlǝramǝnchǝ fe mbǝnfati Fartǝ kakha kǝ wandǝkaɗach'yamǝn tǝmɗi semet tla chǝɗchǝɗ fǝramǝn ndǝ fe. ⁶ Fartǝɗi nawaktǝ alkǝt'yamǝnsi farti'ini paɗ mǝrti Yesu kǝtlǝm fe lekewakchǝ Farta. ⁷ Nan nat 'yang'yang kǝ yakh nef kǝ mǝra kǝtlǝm ka nefe. 'Ma ya na nowun yakhtǝs kǝ mǝra mǝra kǝtlǝm ka nefe. ⁸ Farta pǝnamǝntǝ yakhtǝ'yan kǝtlǝm taa 'pe mǝn kǝ fǝ ɓǝɓifacha mǝr Almasihu kǝtlǝm mǝnchi. ⁹ Kǝnan nat nakanya mbǝstǝmǝn khǝ'ra'ta tǝmɗi fer'yan, namǝn mbǝs khǝ'ra'ta ǝ kombəli Farta. ¹⁰ Kǝtlǝm pa kamǝn kǝ tǝkritǝ Farta, mbǝnamǝn ndǝ fe tǝ Farta tǝmdi mǝrti wayan, kǝna nat kǝ nakanya mbǝnamǝndǝfe tǝ ndi, namǝn mbǝs khǝrata tǝmdi sisingddiyan. ¹¹ Ngga kǝɗu ndak wa, nggǝ mǝn sǝk mbǝndǝ fa khur Farta tǝmɗi chǝnmǝn Yesu Almasihu, tla tǝmɗiyan mbǝnamǝndǝ fe tǝ Farta. ¹² Kǝtlǝm nda'an kǝɗ ɗǝnɗi tǝmɗi nef arta 'yimdǝ ɓǝɓifat kǝ khur khesi, kǝɗu paɗ 'yimdǝ mǝrtǝ kǝ khur khesi tǝmɗi ɓǝɓifata. ¹³ Kǝ fǝrkǝ fe sərta ɓǝɓifatsi khur khesi chǝk kǝɗu senngewufe ɓǝɓifat mǝɗi nawaktǝ sərtəswa. ¹⁴ Chǝktǝ kǝɗu mǝrtǝsi 'tla tǝ ǝ Adamu kǝ Musa nat tǝ fe chǝwakchǝ ɓǝɓifat i talandǝ ɗǝnɗi mba'tǝ fe kǝɗ Adamu tla ne kǝ saktǝ tla ne ɓat ǝ pannga. ¹⁵ Pafǝn ta'an ngga nachan kǝɗ talandǝ ɗǝnɗi mba'tǝ fe wa. Ma Kǝtlǝm ɓəɓifati nafɗi artǝya, nafchǝ ka'an mǝmatata, kǝɗu paɗ mbǝs ǝnkhar tǝ sǝn ǝna tǝmɗi nafɗi artiya Yesu Almasihu mbǝs ǝnata'an khar nan wetlǝ kha kǝmɗi nafchǝ ka'an. ¹⁶ Kǝtlǝm pafǝn ta'an ngga kǝnau tla chǝch ɓǝɓifatawa. Tǝ kǝɗuyu ɓa ɓahktǝkha tla khaɗchan kǝtlǝm ɓǝɓifat tǝmɗi nef arta. Pa' kǝ nakanya sǝn ǝni ini ɓachan kǝrsǝ ɓəɓifach ka'an. ¹⁷ Ma kǝtlǝm ɓǝɓifati nafɗi artiya ɓa mǝrta, kǝɗuyu paɗ fe tlǝch kafati Farta tǝ mbǝs ǝnkhar tǝmɗi sisingndi Yesu Almasihu. ¹⁸ Kǝtlǝm nda'an kǝɗ ɗǝnɗi ɗǝftǝ ɓǝɓii nef artǝ nafchǝ kǝ ɓakhtǝ khaa nat, kǝɗu paɗ tar kafati tla artiyu nan ɓat tǝ khǝ'rata tǝ sisingnde kǝmɗi nafchǝ ka'an. ¹⁹ Paɗ kǝɗ ɗǝnɗi na kumi fǝrmandi nef arta chantǝ nafchǝ ka'an kǝ fǝ ɓǝɓifacha, kǝɗuyu paɗ tǝmɗi fǝr mandi tla arta nafchǝ ka'an nandǝ mbǝs kakǝta. ²⁰ Ɓati sərta ɗǝftǝ ɓǝɓifat kǝ cheke mǝɗi chektǝ ɓǝbifata kakǝt paɗ chek ka'an. ²¹ Chǝch ɗǝnɗiya kǝtlǝm kǝt ɗǝnɗi wetlǝ ɓǝɓifatkha'a khur mǝrta kǝɗu paɗ wetlǝ kakǝt kha tǝ sisingnde kǝ fere tǝmɗi chǝnmǝn Yesu Almasihu.