¹ Mə natmən mbata kə ɓəra Ibrahim chichətmən? mə mbəs tən? ² Ma kətləm teri Ibrahim, mə mbəstə əna tla inde ngga pangn Farta wa. ³ Tə Paɗa mbachə yarata'an wa kəni? "Ibrahim fər tə kit kəmɗi Farta seng kə fe kakət yan kəm ɗan." ⁴ Nakanya mətlan təɗi ne chət tere, kərtət yan chokwa pafən wa. ⁵ Mətlan tə ɗi paɗ nawaktə tarchə yansi, fərtə kit kəmɗi fe tlə kalchə ɓəɓifat khaa, fər kit tə'ini yan yu tərchə fe kə kakəta. ⁶ Dauda mbatə kakət kə ɓəra nafɗi seng ndi Fartə kə tlə kakəta tə kumi tarcha. ⁷ Ndakan wa, "fə mbəs ɗəch khar fe kalandə fe ɓəɓi fachyandə kha, paɗ fe na ɓəɓi fach yandə mət wuɓta. ⁸ Tlə mbəs ən khar tla sengnge waktə fartə ɓəɓi fatyan. ⁹ Mbəstə'ini khar mbutə fe yu ndu nachan ə ɗarfe khechewaktə fe wa? kətləm ndimən, "Fər kit i Ibrahim sengnchə fe kə kakət kəm ɗiyan." ¹⁰ Tə kən sengndə fe Ibrahim, kərsə khechet yan wa, ndu khur kumi khechet yan wa? ngga khur khecheta wa, ə kumi khechete. ¹¹ Ibrahim tlət ɗənɗi pənchə khechete. Nda'an ne kə ɗəf kher mbəs əni fər kit tla ne yansi tləkhaɗi khechewaktən. kətləm ɗinni pəndən yu, chok tən kə chən fə fərkit nat, chək mə nakan kheche wa ndawa. Sakta'an wa nən fe sengnge nde mbəs ənyandə khar. ¹² Tlenni paɗ, sakta'an wa Ibrahim chikə chən fə khecheche, kəmɗi fe ɓach ngga kətləm fə khechech ndak wa, paɗ kətləm fe parach sarti chənmən Ibrahim paɗ tlenniya ne kə fər kit təɗi nesəyan ə kumi khechete. ¹³ Kətləm ngga təmɗi Chakme. ndanəfe Ibrahim wa na khesə nat kə yinanda tə kwatlan paɗ təmɗi kakəta tə fərkit. ¹⁴ Kətləm ma fen təɗi ne kə i sərta khesi yinanda fər kit ngga əna wa. ¹⁵ Kətləm chakme tlə ɓachan tə kombəle paɗ ma ngə sərtəswa ngə səɓandə ənsəkaɗwa. ¹⁶ Kətləm ɗənni səɓchan təmɗi fər kit kətləm kə chok təmɗi kafata.Kəɗuyu ndiitən kha ə khur kwatlan nat. paɗ kwatl ini ngga nachan kə fe sənchə sərtə ndak wa, nat tə fe ne khur fər kit kə Ibrahim kətləm mətlan ne kə chən nafchə nat. ¹⁷ Kəɗ ɗənɗi yarandə fe kha, "chuchi kaɗ kə chən khakhichə kaan tləch Ibrahim ɗəchiini məɗi Farta, mətlan ne kə Farta tla tlə fəranchə sisingndə məmatacha, paɗ tlə takhəssan ɗəcha khur ɗənɗi nawakchəsi.. ¹⁸ Nat tə ɗəchəɗi ne ɗakəta Ibrahim fərti kit kəmɗi Farta tə wanɗəkaɗat artak kə ɗar ɗəchəɗi ne səbtə panga. chəkan kə chən khakhichə kaan kəɗ ɗənɗi mbatə fe. "kəɗuyu na kwatlwu nata." ¹⁹ Nggwitu fər kityanwa kətləm tapi sinwa serkaɗi khurach'yan kumchət kum. Sən paɗwa wur nggətti nuwan Saratu pa wa nggət wa wa. ²⁰ Kətləm ɗənɗi mba'andə Farta Ibrahim sək wa ləkləktə kumi fər kit wa kətləm mbəstə alkət khur fər kityan tə manandə Farta. ²¹ Nggəmanchəwa ɗənɗi nda Fartə wa nan chəta tlə ndiiɗan chan kha ²² Ɗinni paɗ senge ndə fe kəɗ kakəta. ²³ Yarawu fe kha kətləm mbəs ən yan khar ndakwa, sengen chə fe kətləm mətlan. ²⁴ Nachan kə yarata'an kətləm mənchi kətləm fe nafe senge nde, nggamən təɗi fər chə kit kəmɗiyan mətlan təɗi tla'anchə Yesu chənmən khur məmatacha. ²⁵ Mətlan niya khiyandə fe kaɗ kətləm ɓəɓifach yamən tla tla'andə fe kətləm kə khəramən.