¹ Mə mbərandə Yahudawach nafchə khaa? Paɗ məne kə mbəsta'an khar i khechete? ² Nat kə tlə Yahudawata mbəs ənsəkhar, kətləm ə tərkanan ndikchə fartə tə parchənanda, ndiktəɗi pənamənchə ndu wunnakan. ³ Ma fərwu Yahudawa chə kit wa kəni? Na kumi fər kit ya ndə yata kakətifartə chə tərawa? ⁴ Nan tam chok kəɗuwa ɗənɗi nda Fartə wa nan chəta tlə chəchan, chək chok kan wa chu nafchə kəɗuwa. Kəɗ ɗənɗi yara fe kətləm kə pənfewa kaa nef nako khur ndiktiyo, paɗ kəɗin kə panga Fartəɗi ɓati təwech kə pangən chakme. ⁵ Kətləm nda'an ma ngəmwu fartə mənchəwa kətləm ɓəɓi fatyamən, namən ndatwa chaməntə ɓəɓi fatfawa? ndatwa mətlan ɓakhamənda ə khur səbtə khuryan wa? (nachi ndiktəya ə khur tlu tə fere.) ⁶ Nan tam nə kuɗuwa. Kətləm ma kuɗuyu nach fartə chakanme khesiɗiya wa kəni? ⁷ Ma kit i Farta təmɗi lekte ɗef kə chəmfendə kaan kətləm mə təfe chaki mee kə tlə ɓuɓi fata? ⁸ Ma kit'ta'an ni mbatu ya, chə Bulus, na'an chət səɓtə ɗəcha ma'na kwastə ɗəch kuɗuyu səɓta" tlə nach fowun ndik səɓtə ɗech kə ɗarna kətləm ndiktəini chə kəɗaya, na fartə chakan me nafchəini tlə mbachə ɗənni kə ɗarna, kekesi kə chakandach fe me ⁹ Namən ndatwa na fartə chakamən me samsamən tə fe nawakchə kə Yahudawa chawa? Namən mbakhən ndə kuɗuwa. Fe nach kə Yahudawacha tə fe nawakchə kə Yahudawacha nat ə chəndə ɓəɓi fata kətləm nda'an 'ke'ke məɗi Farta kə chakandach me. ¹⁰ Kəɗ ɗənɗi yarandə fe khaa, nggə nefsə nech kə ka nefawa, nggə ka nefsə chək arta wa. ¹¹ Nefsə sənchə ənawa. Nggə nefsə ne kaa Farta wa. ¹² Chək wuni kanchə kirsə fartəfa. Nat nda chok chandəkə fe nawaktəfe te chətənsi tanda chək arta nesəwa. ¹³ Wandə mədikchəyanda cha khaa kəɗ kwi mərta. Wansənu'təyanda i ləmfata. khurmichəyanda kə Yakhafti wirɓe. ¹⁴ Səɓtə ndikchə tlə chech kes me'yandə. ¹⁵ Tlə wesechandə kha kə mət ɓəlfata. ¹⁶ Dəna chəch yanda i ɓakhtəkha tə Səɓtəkaɗi. ¹⁷ Sənwandə chok khaskhas kət tə nafchawa. ¹⁸ Kwarandə Fartəsi wenitə yandawa. ¹⁹ Sənmən wa ɗəchəɗi mbatə sərtəɗya mbachəfe kəmɗi fe yakhtəfe səwa kə paranda, kətləm kə nggə lanfe me i chək wuni, kətləm nat khesi kə fər ngəmnan ə pangən Farta. ²⁰ Ə pangnnan nefsi ne khəratə kətləm para sərtə ə wenitiyan. Kətləm təmɗi sərta ɓa sən ɓəɓifata. ²¹ Ma khəra'amənchə Farta nga kətləm ɗənɗi tlə paraka mən sərtəɗi fərtən təmɗi Musa wa, yaranfe kha kə ɗaran ə khur sərcha'an paɗ təmɗi annabawacha ndatawa tlə kalamən chə fartə ɓəɓifatyamən kha tə mband samən, ²² Kwelenchə fartə ɓəɓi fatyamən kaɗi kətləm fərmən kit kə ɗənɗi chamən ndə Yesu Kristi tlə chəch Fartə kuɗuyu kəmɗi chəkawun fərchə kit kə Kristi, kətləm ɗəpan chan wa ngə ənsə chakan chə tlə Yahudawat kha tə tla nawak chə kə tlə Yahudawata. ²³ Nat nafcha chəndə ɓəɓifata mbakhənwandə sa'tə kə mandi Fartawa. ²⁴ Kwelenfe ɓəɓi fachyamən kaɗi təmɗi kakət yan kalamən ndən ɓəɓifachyamən kha, nat tə ndatwa ənsə chətmən tla kəmchəs kə chamənchəfe kuɗuwa, chəch Yesu Kristi ɗənni təmɗi kalaməndə khaa. ²⁵ Fərchə Fartə Yesu Almasihu tla fərchə fatyan kə tlətmənchə kaɗi tə fər kit təmɗi tlərandə feryankadi. Fərchan Almasihu kətləm ti ɓəɓifachdi chətmən kərsa khur kərəs ənyan. ²⁶ Nat dechəini səɓchan kətləm kə pənfe kakətyan khur khesi di nakanya, kətləm kə ndiiɗ khaa ndatwa mətlan tlə kal chəkawunkha fərchə kit təmɗi Yesu. ²⁷ Nggawa kətləm Parakamən sərti i Musa kala mənndə Fartə ɓəɓifatyamən khaa. Mbandəsə natmən ndatwa fəramənchə Fartə kakət kətləm ndiɗamən sərcha'ankhawa. Kətləm fərmən kit kə Almasihu kalaməndə Fartə ɓəɓifatyamən khaa. ²⁸ Kətləm nda'an nachan ə ɗakəta ndatwa tlə kalanchəfe ɓuɓifatyan nefkhaa təmɗi fərkit ngga tə tarchi sərtawa. ²⁹ Ngowun təɗi nach kə Yahudawa cha kə kaɗowun wa ngun ndak na fartə tlət kaɗwa, kə sənwun wa nan tlət fe nawakchə kə Yahudawachə paɗ, kuɗuyu nan tlət fe nawakchə kə Yahudawa cha. ³⁰ Kətləm kəɗ ɗənɗi fərtəwun kit wa Fartə arta nach si. Fartəini paɗ yahkchə Yahudawa chədikhechendetfe kətləm fərndə kit kə Yesu, paɗ mətlan kəmma yakhchə Yahudawacha fe khechewak cha, kətləm tandə paɗ ə fərndə kit kə Yesu Almasihu. ³¹ Ma ndimənwa yakhchə fartə mənchi kətləm ə fərmən kit kə Yesu Kristi, pən chan khachyawa sərtəini ngə teryansəwa wa? auwa! sərtəini pechan chət təre.