¹ No mbakhen ndatwa kǝ chan Fartǝ kita fe tlǝ tlǝnchǝ ɗǝnɗi yakhwaktǝ Farta paɗ ma ndiin kuɗu, kǝ sininwa ndachowa kǝ chuchǝ Fartǝ kita si, kǝtlǝm chǝpaɗ ǝ chokǝn we'tǝ choktǝ'ini. chin we'tǝ ɗǝchi'ini chǝtǝndǝ yu. ² Sǝnmǝn ndatwa na Fartǝ chakanme nafchi'ini tlǝ chǝch ɓǝɓi ɗǝchi'ini. ³ Chi'ini tlǝ ndach wa kǝ chanfe kita fe tlǝ chǝch ɗǝnɗi yakhwaktǝ Farta nat tǝ ndat wa, chǝpaɗ tlǝ chǝcho, kǝ keɗenwa chǝ tǝ ind'yo no khǝra'wa ma 'tla Fartǝ chu kita sǝwa! ⁴ Paɗ kǝ ndenwa "Fartǝ kǝrǝs nanchǝ kǝtlǝm nda'an ni nat ɗǝt kǝ pang tǝ ɓǝɓi fatinchi." Kǝ sininsǝwa nach Fartǝ kǝrǝs wechkhar kǝtlǝm kǝ tirinkha ǝ khur ɓǝɓi fat'yo. ⁵ Kǝtlǝm 'kwa'kwa tǝ ind'yo karko malandǝ ɓǝɓi fata, na Fartǝ chu kita sǝ ka'an. nachan chǝt kǝɗuyu fartǝɗi sǝɓtǝ khurchiyan kaɗi, paɗ nan chan kita chǝka wun nefsi. ⁶ Nan tiyandǝ chǝkawuni 'ke'ke tǝ ɗǝnɗi chǝtǝn. ⁷ Fe kwe'chǝkha paɗ tǝ tlǝrɗaktǝ kǝmɗi nafcha nggǝ tǝngandǝswa, mbǝsandǝ ind'yandǝ chǝmnda tǝ manda, tǝ sisingnde tla kǝ fere. ⁸ Kǝmɗi fǝ yakh incha, fe karchǝ para ɗǝnɗi nach kǝ kit'ta'an, fe tlǝ chǝwakchǝ kakǝta, na khuptǝ khuri Fartǝ tǝrtǝ kakh kǝ ɗarnanda. ⁹ Na Fartǝ ɓat kakh tǝ ɓakhtǝkhaa tǝ sǝɓtǝ khure kǝ ɗar chǝkawuni tla chǝch ɓǝɓi fata, tǝrkanan tǝ yahudawacha, kǝnan nat kǝ Helenawacha. ¹⁰ Nakan chǝmnda tǝ manda tǝ khaskhas kǝta nan nat khur fe tlǝ tlǝnchǝ ka ɗǝcha, tǝrkanan tǝ yahudawacha kǝnan nat kǝ Helenawacha. ¹¹ Kǝtlǝm Farta ngga tlǝ tlan nef ind'sǝwa. ¹² Fe chǝch ɓǝɓi fata ǝ khur kumi sǝn sərchi Musa, nach fe chanda kita si ǝ ɗar kumi sǝnd 'yanda, fe paɗ chǝch ɓǝɓi fata nat tǝ ndatwa ǝ sǝndǝ sərchi Musa, na fe chanda kita 'ke'ke tǝ ɗǝnɗi mba' tǝ sərta. ¹³ Kǝtlǝm ngga fe tlǝ sǝkchǝ ndikta'an nach kǝ ka nafchǝ ǝ pangn Farta wa, fe tlǝ tlǝnchǝ ɗǝnɗi mba'tǝfe ne khǝ'rata. ¹⁴ Ma pari fe sǝnwakchǝ Fartǝ sərtǝɗi fǝrtǝ Farta kǝtlǝm ǝ mananda, pǝnchansǝwa sərtǝ ini si ǝ khurnanda, nat tǝ ndatwa ǝ sǝnwandǝ doka tǝ'ini i Farta fǝrtǝ fe tǝmɗi Musa yuwa. ¹⁵ Pǝnchandǝswa ǝ sǝnda ǝ khur wandǝkaɗach'yanda ɗǝnɗi mba'tǝ Farta khur sərtǝɗi fǝrandǝn Musa, kǝtlǝm chǝkawun ǝ khur wandǝkaɗach'yanda tlǝ pǝnandach fat'yanda, kaɗat'yanda ndu tǝtl pǝnchan kuɓandǝ fat'yanda, ndu tǝtl kǝsandachsi. ¹⁶ Fartǝ chanda kita si fartǝɗi natǝn chan kita chǝkawunsi 'ke'ke tǝ ɗǝnɗi saktǝnda tǝ ɗǝnɗi chǝtnda ǝ wuɓta, nachan chakmi'ini tǝmɗi Yesu Kristi. Nda'an tlǝ mba'andi nafcha, ma nggǝt ɓas ndikti Farta. ¹⁷ Nakanya ni mbaowunda ngun tǝɗi nach kǝ yahudawacha, fǝrwun kit ndatwa na Fartǝ khǝra'owunda kǝtlǝm ǝ sǝnwun sərtǝɗi fǝrtǝn tǝmɗi Musa. Tlǝ tla'anchowun indǝwa nggun i Farta. ¹⁸ Sǝnwun ɗǝnɗi yakhtǝ Farta, kǝtlǝm cha'owunchǝfe sərchi Fartǝ khar, sǝnwun ɗǝchiɗi nach ndi'ichan kǝ taɗwun khar kǝ chǝwun tersi. ¹⁹ Tlǝ mbǝ'lachowun pǝnandǝ fe nawakchǝ kǝ yahudawach tǝ fe sǝnwakchǝ ǝn kǝ ɗar Farta ɗǝnɗi nach kǝ kit'ta'an. ²⁰ Nowun mbakhǝn mba'an ndikti Farta fe tlǝ chəch ɓǝɓi ɗǝcha tǝ fe nach kǝɗ wanwancha kǝtlǝm sǝnwandǝ ǝn kǝ ɗaranwa. Sǝnwun ɗǝchi'ini nat kǝtlǝm sərtətǝɗi kharyowun cha'owunchǝ kit'ta'an khar kǝ ɗar Farta. ²¹ Nggun tǝɗi tlǝ nach cha'andǝ nafchǝ khar, cha'awowun inchiyowun khar wa? nggun tǝɗi tlǝ nach ɓasǝwa kǝ yarkǝfewa, yarkǝwowunwa? ²² Nggun tǝɗi tlǝ nach ɓasǝwa kǝ chǝfe fǝlaukǝtawa, chǝwowun fǝlaukǝtawa? Nggun tǝɗi tlǝ 'yatach kǝ mananfe ɗǝkhacha , yarkǝwowun ǝ kǝtǝnsitawa? ²³ Nggun tǝɗi nach mbǝnfata kǝnowun tla'andǝ kirsǝwa sǝnwun sərtə, tlǝ parachowun sərcha'anwa? ²⁴ "Sǝɓanfe tlǝm Fartǝ kaɗ ǝ khur fe sǝnwakchǝ Farta kǝtlǝm nggun," kǝɗ ɗǝnɗi yarandǝ fe tangtang. ²⁵ Nde ta'an khechete mbǝs ǝnkhar mǝɗyowun ma ǝ pariwun ɗǝnɗi mba'tǝ sərta, paɗ ma tlǝ parawowun sərta'an, khechet'yowun chokkǝ kumi khechete. ²⁶ Kuɗuyu ta'an pǝnchanwa na Fartǝ tlǝt fe kaɗ nawakchǝ kǝ yahudawacha, paɗ khechewakcha kǝ nafchǝyan ma ǝ pari ndǝ ɗenɗi mba'tǝn ǝ khur sərta. ²⁷ Nafchi'ini khechewakchǝyu paɗ parindǝ sərti Farta; nandǝ ndatwa kimsi kǝ chowunchǝ Fartǝ kita si, kǝtlǝm khechowunchǝfe chǝka kǝɗu nggun para sərta wa. ²⁸ Ngga fe tlǝ tlech ɓǝra ɗǝparacha kǝtlǝm Fartǝ nach kǝ yahudawachawa, paɗ ngga kǝtlǝm khechet 'yandǝ na Fartǝ tlǝt tandawa. ²⁹ Kǝtlǝm nda'an, ngamǝn tǝɗi mbedemǝndǝ Fartǝ kha ǝ khur wandǝkaɗach'yamǝn nach kǝ ka yahudawacha. Tlǝ Fartǝ mǝnchi paɗ mbedemǝnchǝ semeti Fartǝ kha, ngga kǝtlǝm tle ɗǝparach kǝmɗi Fartawa. Chǝkme chǝmwu nafchǝ mǝnchuwa, na Fartǝ chǝmmǝnchi.