¹ Tlam nat chəkawun nawakchə kwakwa khur fər kit. Ngga fə tlendə ndikchə khawa. ² Yowun nefe fər kit yansi kə səm chəkami tla nawaktə fər kit yan tə alkət fa sachə ɗəng tlə səmndən. ³ Tla tlə səmchə chəkami kə njər tla tlə səmwakchə chəkami wa. Tla paɗ tlə səmwakchə chəkamiyu kə njər tla tlə səmchə chəka məwa. Kətləm tlə Farta ndi. ⁴ Chə wuni chiɗi tlə chakanchə mee mafaɗi ne kə yi nef samən? tlartə yan tə khəmndiyan khaa ə indi tləwiryan. Na Fartə mbakhən tlaranda. ⁵ Yowun tlə mananchan yowun Farta mə fona. Yowun paɗ tlə tərchan tarcha'an nat kaara'an. Chəkawuni kə tlar kha ɗar ɗənɗi yakhtənsi. ⁶ Tla ɗəfchə kəfat kə farta'an kə ɗəf kəfatsi kətləm Farta, tla semcha, səmchan kətləm Farta, kətləm kə chan tə usoko Farta. Tla sənwakcha karchan səmndə kətləm Farta, mətlan paɗ chan tə usoko Farta. ⁷ Nowun sə khur mən ne khaa kətləm indiyan wa, nowun sə paɗ mərchə kətləm indiyan wa. ⁸ Ma nimən khaa, nachamən khaa kətləm Farta. Ma mərmən mərchamən kətləm Farta. Ma tankəɗu ma nimən khaa, ndu kə mərmən yi Farta naka mən. ⁹ Kətləm nda'an mərtə Almasihu paɗ tle'i, ma nan nat kə Farti məmatacha tə fe tə sisingən chəfa. ¹⁰ Chə paɗaa, kətləm mi chakandu mee wan mu? chə paɗ kətləm mi njirtu wan mu? natmən namən tlar tə pangən chak mee i, Farta. ¹¹ kətləm yaranchə fe khaa wa kə na, "inchə in mee" nda Farta "Kəmɗinchə chəkawun weɗɗe nancham kurumchə khaa, nat wansenuche nandə manandə Farta." ¹² Kə ɗuta'an yu, chəkawuni khur mən nan mb.a'a ɗənɗi chətən tə indiyan pangən Farta. ¹³ Kətləm nda'an kə nggər mən chakan mee ra'an wa. Matanan kəɗu kaɗaman khaa, kə ngəmanef kə chok kə ɗakwan chit wansartə khaa wa. ¹⁴ Səninchə paɗ patlang nə tə chənmən Yesu, ənsi nawakchə chəɗ chəɗ tərkanan wa. Se tla tərchi wa chəɗ chəɗ wawa. Chokam chəɗ chəɗ. ¹⁵ Ma kətləm ɗəsəmndiyo ne khaɗandə wanmu, chə witə khur kafata wa. Kə səbe'en tla mərtə Yesu kaɗ kətləm ndi tə ɗəsəmdiyo wa. ¹⁶ Mə nggəmawun ɗənɗi tərtəwun ndichan kə ndik fe səɓta'an kə ɗaran wa. ¹⁷ Kətləm kutrakti Farta ngga ndik səm nda tə sata wa, nachan kə ndik kakəta, khas khas kəta, tə kheɗɗi tə khure, khur semet chəɗ chəɗ. ¹⁸ Kətləm tla ne chan mafakət Almasihu tə mban ini nachan kə tləta'an məɗi Farta, paɗ tlə nafchə ndi, ¹⁹ Kətləm nda'an kam ɗənɗi ne kə 'yi khas khas tə fata, tə ɗənɗi ne manowunnda. ²⁰ Kə səɓawun teri Fartə kaɗ kətləm ɗəsəmnda wa, chəkami nachan chəɗ chəɗ, mbənwa fa wa! nafɗi tlə səmchə ɗənɗi ne ɗəfɗi kə khəmkha. ²¹ ndədwa kə səmən tləwe wa ndu sa mballa wa tə chəkami ne ɗəf wanmu kə khəm khaa. ²² fər kit təɗyo nessi, kəsam khar patlang wun tə Farta. Tlə mbəs ən khar tla ɓan'andə wanɗə kaɗatyan wa ndichan ɗənɗi chəttən. ²³ Tla khunawak tə wanɗə kaɗatyan khaa, paɗ ə səmmi, sən wa chət ɗənɗi kəmwakchəsi, kətləm fər wa kit wa. Nat ɗənɗi nawakchə kə 'yi fər kit ɓuɓifata.