¹ Wanmanchəna fe fərchə kit, ənɗi kapati yakhta tlə siyandi Fartə kaan, ndat wa, kə khəra' nafchənchi, Yahudawacha. ² Ngət mba'tə tə kit taan kətləm tanda, chəka nakan tandə para Farta wa. Sənwandə mbanɗi natandə para anchə nde' wa. ³ Sənwandə mbanɗi tlə ɗəftə Fartə nafchə kə tləmata'an wa. Yakh chandəs wa kənandə ke'ke' tə Farta, chəka kəɗu tləwandə ɗənɗi yakhtə Fartəs kə chantə tandə wa. ⁴ Pari Yesu Almasihu sərtaan khar kətləm kə ɗəf chəka wun fərchə kit kən ke'ke' tə Farta kətləm nda'an sərta ngga waat wa. ⁵ Yarach Musa kə ɓəra nafchəɗi kwe'chə kha kə. Parandə sərta i Farta: Nafchəɗi chəch 'ndich ke'ke' tla yakhtə sərta ne nat kha kə fere. ⁶ Ka kət ɗi ɓach təmɗi fər kit nda chanwa, kə ndowun khur wanɗəkach 'yowun wa wun ne tərtə kafərta?" Kətləm kə ɓə tə Almasihu ka'kha kəmɗamən. ⁷ "Kə ndowun wa wunne yəmndə kha kə məmatacha kətləm kə tla'anchə Yesu kaɗ kə khur məmatacha". ⁸ Ndachanwa kəni, ndiktaan nduk tə wechji khur mee'yo tə wandəkaɗat'yo, ndik fər kit tla na'an ɓassiya. ⁹ Ma ngəmeen tə me'yo wa Yesu Fərtə nakan, paɗ firinkit khur wandəkaɗat'yo, ndatwa tla'an Farta khur məmatacha no khəra'ta. ¹⁰ Ma fər nafchə kə ɗar ɗəchə'ini, nandə chok tə ke'ke tə Farta. Təpaɗ ma ə mba'wun ə ɗa'kəta ndatwa Yesu chənmən na Fartə khəra'andata. ¹¹ Nachan Kə yarata'an khur ndikti Farta kə ɗar Kristi, "Tla fərchə kit kəmɗiyan nach kal anchə khawa paɗ nə fat kharanchəwa." ¹² Kuɗuyu ta'an chaktəs wa pətlər yahudawach tə fe nawakchə kə yahudawacha wa, nat ndə chən nandə arta kətləm farti chəkawun nafchəɗi fərchə kit kəmɗiyan, tlə kəsanchan chəkawun tla chəkhancha. ¹³ Nachan ndə kəɗ ndənɗi natən kə yarata'an i Farta ndatwa. Na chənmən Farta khəra'anməndə nat fe siyancha." ¹⁴ Təkən nafe 'ya fe fərwakchə kit , paɗ təkən nat ndə fərkit tla tamwaktəndə səkanchi? Nachandə sək tə wa kəni ma ɓasandau fe wa? ¹⁵ Tə paɗa'a ma tlən wu Fartə tanda wa, nanchandə mbər ɗət ɓastəwa kəni?, nachan nat kəɗ ɗənɗi nech kə yarata'an i Farta ndata wa. Nan chok tə kə ɗəna saka ində ma bi nafchə tə kwastə ndik tə!" ¹⁶ Nga natndə ne sək ɓassanwa, kətləm ndach Ishaya wa "tlə manda wun fərchə kit kə ɓaan?" ¹⁷ Chok chan kuɗu nati mba'owunchi nach nafchə fərt kit kənɗi Kristi kətləm səkndə ndikti kə ɗaran, paɗ nafchə sək ndik ti ini kətləm fowunsə nech ɓasə kə ɓəra Kristi! ¹⁸ Ndachiwa səkwandawwa, chok kəɗu su' ɓəratandə nat khur khessi, paɗ ndikchiyanda su' kə ndukwa khessi. ¹⁹ Ɓukwiyya, Israilawach ə sənwandawwa? ɗəfkwatl kanan ndach Musa wa, "ni ɗəfwunchi kə səɓkhurchowun kaɗ tə sərata, tə ɗənɗi nawakchə kə nafcha. Ɗəchiiniyu nachannat kə ɗənɗi nafchəɗi sənwakchə əna; ni chət ter tə tanda, kə səɓani khurchandə kaɗi. ²⁰ Ishaya tə alkət fa ndakanwa kəmɗi fe kawakchə nanchi, mbəskandə nanchi, pənənchə fatinchi kəmɗi fe kawakchə nanchi." ²¹ Fartə paɗ ndik kə ɗar Israilawacha, ndachanwa, "Nduk wawa Panandi kharchə chi kha kəmɗi nafchəɗi tlə nech ɗət kə pang tə kwa'kwa tə ində kə yi tandə kə ngərandə in kəmɗinchi."