¹ "Kəmɗi tlə tləndi Farta tla ne kətən sitə ə Afisus, yaro: 'Taya ndikti tla kəssə wan'ndərichəkhar ə khar kharsəm tə tla 'wichə patlang ɗə tlarchi pəttəlachəɗi muɗyu. ² "Sənənchə ɗənɗi chətu tə alkət tere tə paɗ kapa kərəs'əna. Sənənchə wa nggo kərəs səɓtə nafchawa. Sənənchəwa keɗeen fe tlə ndach wa fen manzanicha, paɗ ngga manzanichawa. paɗ mbəseen tandə kə fə lekche. ³ Sənənchəwa kərəs ənyosi, paɗ ɓekhən khaa kaan kətləm tləmna, chək kuɗu kketewen kha wa. ⁴ Ɗənɗi mbəniwakchəf tə wech, meleen yakh faɗo tərkanan yu. ⁵ Kətləm nda'an kaɗokhar məɗi khəmndu khaa.Tərukhaa kə chin ɗəchəɗi chətu tərkanan. Ma tərwen khawa, ni ɓat kəmɗo kə kətani pətəla yo kaɗ mət tlarti'yan. ⁶ Nakan tlaya 'yosi: kerin ɗənɗi fə tlə chət Nikolatawacha, tla karti fə nggət paɗ. ⁷ Tla na tləma səktəyansi kə sək ɗənɗi na semet mba'andə nafchi Farta. Kəmɗi tla mbakhəncha, ni fəran mbanda kə səm'ən məɗi ɗəftə sisingnde, tla ne ə khur mandi Farta wa" ⁸ "Kəmɗi tlə̧̧ tləndi Farta tla ne kətən sitə ə Samirna, yaro: Tlaya ne kə ndikti tla ne kə tərkanan tə mecheta'an, tla mərcha, chokkan tə sisingndəf paɗ. ⁹ Sənənchə ɓakhtəyo khaa tə ɓakhtəyi, chək kuɗu kənau 'yosi. Sənənchə fe tlə ndach wa yahudawach nakanda, paɗ ngga yahudawach nakandawa. Tandə kətən siti khweere. ¹⁰ Kə lekeen ɗənɗi ne ɓat pangnga wa. ɗəpo! khweere nduk khaa kə mək fowun khurwun kə pursuna, kətləm kə kaɗowunchi, paɗ nowun ɓakhtəkhaa kə mənchə muɗ. Cham kit kə fartə mərta, ni fərowun fatə in sisingnde. ¹¹ Tla na tləma səktə'yansi kə sək ɗənɗi na semet mba'andə nafchi Farta. Tla mbakhəncha, nə ən chanchə ə khur mərtə i chep wa. ¹² Kəmɗi tlə tləndi Farta tla ne ə kətən sita ə Burgamus, yaro: Tlaya ne kə ndikti tla ne tə chonggom khar tə micha'an chəmchan yu. ¹³ Sənənchə məɗi choktu, məɗi khai, mət kutrakti khweere. Chək kəɗu kisin tləmnə khar 'kwa'kwa. Sənənchəwa aswowun ində kə fər kit kə nanchəwa, chək tləkha Antifas tla mba'chə ndiktə kə ɗarna, tla yakhchə nanchi, tla ɓəlandə fe khurwun, məɗi khai choktə khweere. ¹⁴ Chək kəɗu ɗəch si yakhwakti fə'yo. Fowunsə khar'yo fe kəschə cha'ati Bilamu khar 'kwa'kwa, tla cha'anchə Balak khar kə ɗəf ɗəna chit wansartə khaa pangngn Israilawacha, kə səmndə ɗəsəmənɗi fərandə fe ɗəkhacha paɗ kə chəndə fəlaukəta. ¹⁵ Kəɗuyu paɗ fowun khurwun kəsndə cha'ati Nikolatawach khar 'kwa'kwa. ¹⁶ Təram khaa, man'ngga kəɗu wa, ni ɓat leɗleɗ kəmɗo, kə yani tanda tə chonggom təɗi ne mee inchi. ¹⁷ Tla na tləma səktəyansi kə sək ɗənɗi na semet mba'andə nafchi Farta. Tla mbakhəncha, ni fər wuɓtə manna, paɗ ni fər kheɗɗitə ɗekwene tə yara yuwa tlim ɗaran, tə tlim tla sənwaktə nefe, se tla tləch ndi. ¹⁸ Kəmɗi tlə tləndi Farta tla ne kətən sita ə Tiyatira, yaro: Tlaya ne kə ndikti wa'i Farta, tla ne tə wenitə kəɗ kəstə wata tə sarchə kəɗ khilengngn tipese. ¹⁹ Sənənchə ɗənɗi chətu, yakhfat'yo tə fərkit'yo tə ter'yo tə kapa kərəsta. Sənənchəwa ɗənɗi chətu nakanya mbərantə tla khaa chətu tərkanan. ²⁰ Chək kəɗu ɗəchsi yakhwakti fəyo. Tlə kərəscho nuɗi tlə 'yafewa Yezebel, tla tlə 'yach fat'yan wa annabi, Təmɗi cha'atyan ləmtə nafchənchi kə chəndə fəlaukəta paɗ kə səmndə ɗəsəmənɗi fərandə fe ɗəkhacha. ²¹ Fərani mbanda kə tərkhaa, chə kəɗu yakhwa kə tərkhaa khur fəlaukətawa. ²² Ɗəpo, ni mək anchə kə ɗar mət khuna khatəfata, fe paɗ chəch fəlaukət tə anchi kə khur ɓakhtəkhaa, se ma tərndə khaa khur ɗəna chəch'yan. ²³ Ni təkandə wanchə'yan kaɗi, paɗ nafchi Fartə nat nandə səndə wa nggət ne kə tla tlə tausanchə kaɗata tə wan'ndə kaɗata. Ni fərandə chəkwun khurwun kəɗ ɗənɗi chətən. ²⁴ Kəmɗi taktəwun ə ayatira, nat fe tləwakchə cha'aɗiya, tə fe sənwakchə ɗənɗi tlə 'ya fowun wa khwengnge tə ɗəchəɗi tlə chət khweere - kəmɗiyowun ndachi wa, ɗəfowun wi 'khe' tə kə inwa; ²⁵ Chək kəɗu, waat kə kəswun khar tə alkət fa kə fartəɗi nati ɓata. ²⁶ Tla mbakhəncha tə tla chəch ənɗi chəti kə ndukwata'an, kəmɗiyan nati fər manda kə ɗar khakhicha. ²⁷ Nachan chət kutraktə kə ɗarnanda tə fangngn wan'ndəɓətla, nan fufokhandat kaɗ kəɗ laɓaar ɓucha. ²⁸ Kəɗ ɗənɗi tləti khari papa, ni fəran wan'ndəri wokumtlata. ²⁹ Malan tla na tləma səktəyansi, kə sək ɗənɗi na semet mba'andə nafchi Farta."