¹ "Kəmɗi tlə tləndi Farta tla ne kətən sitə ə Sardisu, yaro; Tlaya ndikti tla kəssə Semechi Fartə khar muɗ tə wan'ndərichə muɗ." Sənənchə ɗənɗi chətu. Chin tləmwa chə ɗəpata, chək kuɗu chə mərta'an. ² Nakhənu kə firin alkət kə tla takchəsi, tla ne nduk mərta, kətləm mbəssawi ɗəchət'yo kə ndiita'an pangngn Fartənchəwa. ³ Kətləm nda'an kaɗokhar ɗənɗi tlətu tə ɗənɗi səktu. Paro kə tirinkhaa. Ma nekhənwenwa, ni ɓat kəɗ yere, paɗ nggo sən fartəɗi nati ɓat'yo wa. ⁴ Fowun tləmchəs tapkəɗa khur nafchə ə Sardisu fe pongwaktə kapach'yandə kaɗi. Nandə 'witə tə nanchi tə kheɗɗitə kapach fiyanda kətləm kəmndəsi. ⁵ Tla mbakhəncha na fe məkan kheɗɗitə kapach, paɗ ni welentə tləmankaɗ khur ɗelewer tə sisingndawa. Ni mba tləman pangngn papa tə paɗ pangn fə tlənchə'yan. ⁶ Tla na tləma səktəyansi kə sək ɗənɗi na semet mba'andə nafchi Farta. ⁷ Kəmɗi tlə tləndi Farta ə kətən sitə ə Filadelfiya, yaro; Tlaya ndikti tla ne chəɗchəɗ paɗ kit - mətlan tə wansukram i Dauda khar, ma inanchə khaa, nefsə ne nggəlandawa, ma nggəlanchi nefsə ne inandə khaa wa. ⁸ Sənənchə ɗənɗi chətu. Ɗəpo, ɗəfənchə mikən'ndə 'cha khaa ə pangn wa, tla nawaktə chəkwun inandə khaa. Sənənchə wa alkət 'yosi tapkəɗa, chək kəɗu firin kit kə ndiktinchi, paɗ aswen ində kə tləmnawa. ⁹ Ɗəpo, fe ne kə i kətən siti khweere, fe tlə ndach wa yahudawach nakanda, paɗ ngga tandawa, nandə ndik lekte. Ni ɗəf tandə kə ɓandə ɓirtəkhaa pangnwa, paɗ nandə səndəwa yakhənchəwechi. ¹⁰ Kəsko ɗənɗi khar mba'uti tə kərəsta, ni kəswech khar ə fartə kaɗata, tla ne ɓat kə khur khesi, kətləm kə kaɗan fe nafchi khesi. ¹¹ Nggət ɓat nakanya, kəsu ɗənɗi khar mbəstu 'kwa'kwa, kətləm kə tlə nef fatəindəyo wa. ¹² Ni chandə tla kərəssa kə khurməkta ə kətən siti Farta, paɗ nan tam chəkes khuran wa. Ni yarandə tləm Farta ə ɗaran, tləm kapa mirɓi Farta (yuwa Urushalima tla ɓach kakh khulafərta məɗi Fartənchi), tə yuwa tləmna. ¹³ Tla na tləma səktəyansi kə sək ɗənɗi na semet mba'andə nafchi Farta." ¹⁴ "Kəmɗi tlə tləndi Farta tla ne kətən sitə ə Lawudikiya, yaro: Tlaya ne kə ndikti kə chok kəɗu, tlə ɗəf kəfata tə tlə mbu kit, tla ne chət kutraktə khur ɗəchəɗi chət Farta. ¹⁵ "Sənənchə ɗəchəɗi chətu, paɗ ngga nacho khaskhas ndu ɓe'ɓe wa, yakhchi kə nen khaskhas ndu ɓe'ɓe! ¹⁶ Kətləm nda'an chokko khurɗəfi, ngga ɓe'ɓe ndu khaskhas wa, nduk khaa kə chəkhuchi kaɗ khur me'inchi. ¹⁷ Kətləm ndacho wa, 'Nggət wurumnda, ɗəchənchəs kaan, paɗ yakh wi chək mə wa,' Nakan sənwen wa chə tlə ɓakhtawa, kheɗeen nafchə fa, paɗ ənyo səwa, komnda tə paɗ nacho cha' khaa. ¹⁸ Səku ɗənɗi nati mba'uta, khəyu tipes məɗinchi tla tərandə fe khaa tə wata, kətləm kə nen kə wurumnda; tə kheɗɗitə kapacha kə mikin kətləm kə kharuchə fat kə nenchəwa; tə fiɗet kə pe'ən kə wenite ma'no naməta. ¹⁹ Tlə cha'anchi ən nef khar tla yakhti, kə cha'andachi khar mbanɗi nat ndə nat khaa. Kətləm nda'an kwe' u khaa kə tirin khaa. ²⁰ Ɗəpo, nggət kit mi kən'nda nggət fəɗanda. Maək nef ɓəratənchi, inantə mi kətənan khaa, ni yimndə khur wiryan, kə səmi ən tə anchi, mətlan tə nggəta. ²¹ Tla mbakhəncha, ni fəran mbanda kə chok tə nanchi ə khur kutraktinchi, kəɗ ɗənɗi mbakhəndi, paɗ nati ɗas tə papa khur kutraktiyan. ²² Malan tla na tləma səktəyansi kə sək ɗənɗi na semet mba'andə nafchi Farta.