¹ Ə mecheta'an, wanmanchəna, kwalam fat khur chənmən. Nggət nggər yarowundəsi, ngga ɓakhtə kəmɗinchəwa. Ɗəchəɗya nandə khəraowunda. ² Mbəramsi tə yəɗcha, mbəramsi tə səɓtə fə tarcha. mbəramsi tə fə kalwarmicha. ³ Kətləm nga'an ne kə fə khecheche, kətləm ngga'an tlə mananchə Fartə khur semet'yan, ngga'an fə tla inchi khur Almasihu Yesu, paɗ fər alkət ya'ansə kə tar fatawa. ⁴ Chək nakan nggət tə indinchi ɗəfənchə alkətsi kə tar fata, ma na nowun kaɗa ɗəf alkət kə fata, mbeɗenni kha. ⁵ Khechichə fe məndə foɗfwaɗa tə ngətta, məɗi nafchi Israilawacha kwatl ndə Bilyamnu, tlə Yahudawa ta ke'ke tə chak mee tlə Farisawat naki. ⁶ Təmɗi kwetəkha tə ɓakhandə nafchi Farta kə ɗar fərkit kəmɗi chakmee, nati kə əna kumi 'yarata. ⁷ Kətləm nat ɗəchəɗi ne kə mbəs ən khar kəmɗinchi tərchi tanda ngga ənawa kətləm Almasihu. ⁸ Sengngenchi ɗəchəɗya nat ngga ənawa kətləm sən Almasihu Yesu chənmən. Kətləm mətlan karti chəkami nat. Tərwi tandə kəɗ ənawa. Chandawi kəɗ ənawa kətləm kə mbəsi Almasihu. ⁹ Kə mbəsichəfe khuryan. Tlərɗaktənchəs kə i yakh indinchəwa təmɗi chakmee. Chəka kəɗu tlərɗaktinchəsi təmɗi fərkit khur Almasihu, tlərɗakta tla ɓach məɗi Farta təmɗi fərkit. ¹⁰ Nakanya yakhinchə kə sənni ndə tə alkət tla'tiyan, tə nat khaa khur ɓakhtiyan. Kə choki kəɗ mətlan təmɗi mərtiyan. ¹¹ Kətləm chək tə mban mi kə tla'i khur məmatacha. ¹² Ngga tə choki tapi mbəsənchə ɗəchəɗyawa, ndu choki kə ndiita'anwa. Nggət kwe'təkha tə parata, kətləm kə kəsani ɗənɗi nggətli tə Almasihu Yesu kətləm ndi. ¹³ Wanmanchəna tərwiwa tapi nggətlaniwa. Nakan ənsə arta tla tlə chəti, tlə mbətichə ɗənɗi ne kərsa, ətl naki kwe'təkha kə tla pangnga. ¹⁴ Nggət kwetə khaa kə ɗar ɗənɗi dəfti kə panga, kə mbəsi kənau 'yati Fartə khur AlmasihuYesu. ¹⁵ Natmən fe ne ndiiɗchan, kə kaɗamən khaa tə mbanɗiya ma paɗ kanɗiwun ən samən, na Fartə pənowun tlenni paɗ. ¹⁶ Chəka kəɗu, minnə satəmən kəsamkhar kəɗu. ¹⁷ Kə chokwun kə fə cha'at tə nanchi wanmanchəna. Ɗəpaman ndiichan fe ne wi'ta kəɗ ɗənɗi choktəmən kə əna cha'ata kəmɗiyamən. ¹⁸ Nafchə kaan tandə wi'ta, fenni mba'owundi ɗəch kə ɗar nanda, nakanya nggət nggər mba'owunda tə 'yaməta kəɗ fe karchə paləngdi Almasihu. ¹⁹ Ndukwat nandə mərtə kaɗi kətləm khuryanda ne kə fartə'yanda. Tla'andə indiyanda nachan khur khartəfatyanda. Kaɗatyanda kə ɗar əna khesi. ²⁰ Nakan ngəman wanchi khulafərta, məɗi natmən pək tlə tlətmənchi chənmən Yesu Almasihu. ²¹ Nan mbeɗendə fach 'yamən kha i kuɓandə fata kə chanchə kə kaa fata khur mandəyan tla chətən tə alkətyan ɓatən tə chəka mə nat kəmɗiyan.