¹ Kətləm nda'an wanmanchəna, fe yakhti kə ni, fərichəwun mbənfata kheɗɗi tə khurinchi tə fatə indinchi, khur mbanɗiya, tlaram kit khur chənmən, fe yakhti tlawurchəna. ² Nggət siyandə Afodiya, nggət siyandə Sintiki, nam tə kaɗat arta khur chənmən. ³ Nggə as'indəswa, nggət siyowunda tlawur ɓakhchənchəkhaa i kit kəsaman nəssəɗyasi. Kətləm ɓakh ən kha keɗeche khur ɓaas ndikti Farta, tə Kilimas tə kwaan tlawur tarchinchi,fe na tləmchənandə khur ɗelwer tə sisingnde. ⁴ Mbənam fata khur chənmən nding. Nggət ndatwa cham kheɗɗitə khure. ⁵ Malaman nafchə nat kə nandə kərəstəyowun, chənmən nduk khaa. ⁶ Kə nowun ɓakhtəkha kə ɓəra chəkməwa məni kəɗi, khur chəkami tə sita tə usoko, malaman sitiyowun kə sa' kəmɗi Farta. ⁷ Kəɓi kaɗi i Farta, tla mbəranchə chəkwun səndə khaa nan parat khar tə wandəkaɗach yowun tə sakchəyowun khur Almasihu Yesu. ⁸ Ndukwata'an wanmanchəna nat ɗənɗi nach kə kit nat ɗənɗi cha'chəs kə mananfe, nat ɗənɗi nach kə chəɗchəɗta'an, nat ɗənɗi tlə ɓach tə mbənfata, nat ɗənɗi ne kə kwastə ɗəna mba'ta, mə əna chəmndəsi kaɗo ən ɗar ɗəchə'ini. ⁹ Ɗəchəɗi nat chaatwun tlətwun səktəwun, natwun ə natinchəkhaa, cham ɗəchə'ini. Farta tlə kəɓi kaɗi nannat tə wunchi. ¹⁰ Chənchə kheɗɗitə khur kaan khur chənmən nakanya, nggərwun nat ɗəpat tə nanchi. Ɗəpiwunsə tə nenchi kaan chokh, mbəswun mbandə kə kəsichəwunsiwa. ¹¹ Ngga kətləm yakh ənənchi mba'ti kəɗuyu. kətləm cha'inchi kərəsta kə ɗar chəka mə nati khuran. ¹² Səninchə choktə khur ɓakhta, paɗ səninchə mban mbəstə kaan. Chəka khur mban mi chaənchi, mban səmnda kaan tə mban choktə khur mita, nati choktə khur mbəs əna tə choktə khur kumi mbəsta. ¹³ Ni mbakhən chət chəkami təmɗiyan mətlan təɗi tla chekichə alkəta. ¹⁴ Nat tə kəɗu chokwun tə nanchə khur ɓakhtinchəkhaa. ¹⁵ Sənwun paɗ nggun Filibiyawacha ndatwa tərkan ndikti Farta, fartəɗi malti Makidoniya khaa, fə fər kitchəs kəsichəs wa kə ɓəra fər əna tə tləta, nggun ndak. ¹⁶ Chək fartəɗi nati ə Tasalonika. kurɓawun tləni ɗəcha tla kəsichəsi. ¹⁷ Ngga kətləm ni ka pafənwa, mani kəɗu, ni ka ɗənɗi ne ɓat tə chekte khur ɗənɗi ɗəftəwun khaa. ¹⁸ Tlənchə ɗəcha'an nat, nəssə ka'an kharənchi ngalichə kaɗi. Tlənchi khari Abafroditus ɗəchəɗi nat ɓach məɗyowunyu. Ɗəch nat tla ne mbinchan tə taktə ɗə sata, əna tləta i mbənfat kəmɗi Farta. ¹⁹ Fartinchi nan chowun ɗənɗi yakhtəwun khur kaanta'an'yan tə khur mandi Almasihu Yesu. ²⁰ Mandə kəmɗi Chənmən kən kə fere, kə chok kəɗu. ²¹ Ndaman ən fə fər kitche nat khur Almasihu Yesu. Nat wanmanchəmən təɗi ne məɗya ndowun əna. ²² Nat fə fər kitche məɗya tandə ndowun əna, kapata'an fe ne wuri Kaisar. ²³ Malan tlərɗakti chənmən Yesu Almasihu kə choktə semet'yowun, kə chok kəɗu.