¹ Ka sotən na hanjimi go, "Mən sugəmən yǝmbə nyam, karə bagi ban jǝnəm bə me ba chu bwiyatəm, ba chu dʊʊtettan Niyajiyuwi nyǝngkə ba be rə kumni grəng." ² A buk ka kotə tə nukkunəng, Yesu ka dəb Bitrus, Yakubu na Yohana ka gwi nə hanjǝm a gu hǝla wu pəlliyǝng dang nən ji. A gai bwiyagu ka wulga a kag kan jiyǝng. ³ Dʊtetangngu ka chi kwau wu merini a gusǝti wuba dəmən a nəngngai. ⁴ Kən Iliya na Musa jǝrtəne wa hanjimi, suga yǝmni tən Yesuwung. ⁵ Kə Bitrus go, "Ni məsari, ka nyagu nən bənəng ka gumbe, nən nəngnga kungote tə bwanbi, dumun din, Musa din na dan Iliyan din." ⁶ ( A yǝmbə ji wu ba suwe, bəra rə tate.) ⁷ Kə korta be məra hanjiməng. Kən nwi dagi jǝr jirera korən nəng, surə go, "Bwe we Yǝla dai ya miyu. Tə kautən su we." ⁸ Rəkwa gaiyǝng, hanjim a wumən kəmtəng a chubə ni, bwigi Yesu ngən kwan. ⁹ Hanjim fiməne ra hǝlahiyǝng, kən Hangu a ne sori hanjiməng go kar ba sotən jiya chuwi a gu ni ba kwan, a duwe yǝgira fulawu Yǝla Niyu ba gun məne rəga bwiyati. ¹⁰ Kən hanjim a masi rə yǝmhəməng, ka jaukag gʊlgara jugǝr da jiyǝnəng go, wulai ji wu hangngu kǝmmari rə bam yǝmbi "guntang a bwiyate" ¹¹ Hanjim a gʊl Hanguwung go, "Wula ma ki nəb mularəm ba soriyǝm suwe rə go a chin bwi Iliya a be rə jiguwung?" ¹² Ka sotən na hanjimi go, "Bən jum, Iliya ka be go na ngə juwe rə wunəji. ¹³ Mənni wula maki mula mo kwak Yǝla Niyu ba no kunang na bən kwila bong? Mənni mən sugəmən mo Iliya ka be, hanjim ka nəngnga tən jǝya chu rə səri, nyǝngkə wang a suwe rə ga jiyang giyǝng." ¹⁴ Buk ka kawe bwi a mura bwiranəm ba ngəməng, ka chu hanjim tən nəb mwaməng na rə nəb mularəm ba soriyǝm juga burikin. ¹⁵ Rəkwa-rəkwang hanjim a chu hanguwung, nəb ka mənna bʊnte rə kwani ka mwarawa be sʊ Hanguwʊng. ¹⁶ Ka gʊl mǝssarbǝ ba gəməng go, "Tə juga tən buri a wullai?" ¹⁷ Kə gu a mura nəb həm a ngatənəng go, "Ni məsari, n’be nəng yǝlla miyu a gwa mwiyu; karə we bwira wu me bə nga tənnə go su yǝmmi, ¹⁸ a guntən ki ka mara təm, jǝg fugʊlta nyi, kərsə nungte, kumbwi kəngkang. Chǝlla mǝssarbə ba mum mo a jəgtən, mənna dəmən be." ¹⁹ Ka ngatənəng go, "Jǝn dam bə rə bunaiya nəbbǝntang ka yǝmbə nyaməng, Bən chi nən jǝn yǝgira wunə fulla? Bən mida nən jǝn yǝgira hale? Be mənnə hangu." ²⁰ Kən hanjim a betə nə rǝ bwehiyǝng. We hi a chu Yesuwung, ka mau bwehi ya təm fʊtəlare. Bwe hi a yara təməng ka sʊ jǝg fugʊlta nyiyǝng. ²¹ Yesu a gʊl te hiyǝng, "Ka lang nəngnga nyangnyǝngkəng ga?" Te go, "Bwigi kangngəng ka bweng. ²² Ka mai mu wa kǝrang, tən hi, farə jutang kang ngəng. Bən dəmən nəngnga guji ki, nwi kunang ka nǝnnǝng na tuga bən." ²³ Yesu a sotən go, "Bən dəmənki? Wunəji wu nəngnga bwiyu bəra rə ni wa nəbən yǝmbənyami." ²⁴ Rəkwa-rəkwang te bwe hiyu ka gug jǝr rə kumni go, "Kən nəbən yǝmbə nyam! Tugai ya bunaya yǝmbə nyam bamiyǝmi." ²⁵ Yesu a chu berə rə sǝngniyǝng, ka bautən jir a we bwirayǝng go, "Mu we mwʊti na rə wu buwa langngəri, kən sunən jǝrmənne na kari bən kabwi a bwehi." ²⁶ A mau wuri na məga bwehi rə kumniyǝng ka jirəng. Kə bwehi a dəddai da bwiya-bwiyang, nəb mwam go, "Ka bwiya." ²⁷ Kən Yesu a tau bwehi ya kang ngəng, ka guggən, kə bwehi ya sǝssiyǝng. ²⁸ Yesu a dəga kayǝng, bwiranəm ban ngəm ka gʊl go, "Wula maki nən dəmən bə nə jǝg we bwirahiyǝng?" ²⁹ Hangngu a sotən na hanjimi go, "Waiwe me bə jǝrre me sotangnga hi we təng ruwaninyiki." ³⁰ Kə hanjim a dʊ gaiyǝng ka tʊ a Galiliyǝng. Hangngu a fabə go gʊ ni a yǝm gu tə kawi, ³¹ bər ki bə misatənna bwiranəm ba ngəm. Ka sotən go, "Bən nəbən Yǝla Niyu a kangka nəbəng, ba ju. Ji wun juwi ki, bukka kotə tə bwanbiying ba gune." ³² Mənni hanjim a jǝgga bə ban yǝmbe, hanjim bə nwi tata gʊltangngi. ³³ Kən hanjim a be Kafarnahuməng. A bukka dǝga kaiyǝng kə hangngu a gʊl hanjiməng go, "Wulai ji tə suga wura juwiyu?" ³⁴ Hanjim a dəmən ba suwe guji. Bəra rə ki hanjim a lang bə jugawun buri go wunə gəba chi wʊ gra. ³⁵ Hangngu a chi-chiyǝng ka buwe bə kwau a jir bǝsuwuməng, ka sotəna hanjimi go, "Karə wu farẹ go gə chi wurǝ jiguwiki, a chi bwi a yullo wu kətəle na bwira bagi wariguwi." ³⁶ Ka dəb bwe kətəleguwiyǝng ka ti a jugʊr da jiyinəng, ka dəg bwehi a kummangngu ka sotəna hanjimi go, ³⁷ Ni wʊ ba yu bwe nyanyǝngki bəra nənmi, a yu me, ni wa yuwiyu, a yibə mən kwan, a yǝbən nə wa təmiyei." ³⁸ Yohana sotən go, "Nigra, kənnə chu gʊ ni karamən weni bwirai a nəb rə dunda mun, mənni kənəng dang rǝge, bəraki me bə fung bənəng." ³⁹ Kən Yesu a suwe go, "Kari tə dang rǝge, bəraki me rə niwʊ ba nəngnga swer də nyan rə dunda miyǝn ki ba kawe bwi rə buk ka suwe guji bwira miyǝng. ⁴⁰ Ni wʊ me chugo bwiga ta nənnuwi, nən wuni. ⁴¹ Ni wʊ ba nəgən hi tə no bəra tən nəbba Kristiyǝm, mən sugəmən yǝmbə nyam ba nya nətətangu. ⁴² Wuni wa yulo ji ya yarti wa kwan na muri bətəmba nəbbən yǝmbə nyami, ba litən nyagu a nihi butən ner dǝ kuntan a kwir dan gən na mai grə wimang. ⁴³ Kə kang ka mung ba dəgən yarki, mwemən na maisǝre. Ba linəng nyaguwi dəga kai tə nyai mənnə kang kin, tən kə bən dəga kǝrang rə bwiyamu wariguwung. ⁴⁴ Gu gəlgotangu me bə bətərori na kǝrang ka gəng me bə dumori. ⁴⁵ Kin na ka mʊng ba dəgən yarki, mwemən maisire. Ba linən nyagu dəga kaitənyai mən kuri na kin tən kə bən dəga kǝrang rə nani tǝsʊwung. ⁴⁶ Gu gəlgotangu me bə bətərori na kərang ka gəng me bə dumori. ⁴⁷ Kən kəmta mu ba dəgən yarki, jigamən. Ba linən nyaguwi dəga dʊʊtǝtta Niyajiyuwi mən du tən kəbən dəga kǝrang rə kəmta mu təsʊwung. ⁴⁸ Gu gəlgotangu me bə bətərori na kǝrang kangən me bə dumori. ⁴⁹ Bəraki kǝrang gu bən tumən wunə gəri. ⁵⁰ Bungkanəm ka nyagu, mənni a buna chuluwi ya gu ki, wulə ba yǝngna? Tə chi rə bunkanəm a jǝni, natə yulo bə chi lǝmang rə bwitǝm."