¹ Yesu ka dʊ gai yǝgira kulo Yahudiyai a yawur da laa Urduni, kə nəbba yǝgi ya gwa giyuwung ka su məsatən jǝniyǝng nyǝngka mitənwugrəng. ² Kə Farisawa ta be gwang giyuwung go natə bəngo, nəngngatən gʊlǝn go, "Ka nyagu ni a jamən kang a nyiyangu ga?" ³ Hangngu go, "Sori nyǝni Musa nəgənni?" ⁴ Hanjim go, "Musa ka nga go nibari a jamən kang a nyi na ne wang." ⁵ Yesu go, "A sugumən nyang bərarə dudənəgənən da jənən." ⁶ "Mənni rə jigu wung 'Niyajiyu a nəngnga wunan jiyu, a nəngnga hanjim wʊ bari tə wʊ chuwi.' ⁷ 'Bəra rə nyang ni ba du tengu tən nengu na məmtən bwi a nyi yangu, ⁸ na ji bəsu a yulo bwi kwan. Yǝgira kak hanjim men nəb bisu nam kwan. ⁹ Bərə grǝ nyang, ji wu Niyajiyu a murgai, kari ni ba wutʊgo." ¹⁰ A jiwu hanjim ka mura kaiyu, kə bwiranəmbangəm a kaba nəngnga tən gʊlirəng. ¹¹ Ka sotən go, "Ni wa jamən nyiyangu na nawu guwi bə nənga talte. ¹² Nyi ya dʊ nibarangu na nabəna gu niyu gərǝ kǝgang bə nəngnga talte." ¹³ Kə nəbba betən rə bətəbi kətəl-kətəl a hanguwi go na titən kang, mənni kə bwiranəm a jau hanjim rə ngəng. ¹⁴ Yesu a yǝme ji nəngnga bwiyuwung, a nwibə ləmang nəng hanjim ka sotən go, "Tə du bətəbǝ kətəlkətəlem a be gwa miyu, kari tə dang rǝge, bərəki dʊtətta Niyajiyuwi ta nyǝra nən hanjimi." ¹⁵ Yǝmbə nyam mə sugəmən, niwʊ me ba yu dʊʊtəttan Niyajiyuwi nyira rə bwei meba ba dəgiwe." ¹⁶ Ka dəb bətəbi a dəg a gulongəng ka dǝgtən kangngəng. ¹⁷ Hangngu a sʊ yoməng, kə gʊ ni a lauwe rə sǝggəng ka ruwung go, "Ni-məsari nya, wullai ji bən nəngnga ki nya yumbə kurə-kwangəm?" ¹⁸ Kə Yesu go, "Wula maki mən birəmo ni nyang? Me ni nya we a dimənna Niyajiyuwi. ¹⁹ Kən yəm sori; 'Karbən ju ni, karbən da rə nyi ya guwi, karən kuro-kute, karbən ti nyar, karbən nəngnga funoi, ne grate temu tən nemu." ²⁰ Nihi go, 'Kən fung sori waiwʊ warigu fulla wʊ mə bweliyu bera ku." ²¹ Kən Yesu wa jəga hangu rə yotangadang. ka sotən go, "Kəng buna ji kwan. A chinən bwi miro jina mu warigu na ne nəbbə merəgəm, na ba nya jǝna kaniyu a ji. A jiwʊ nəngngaiki mbe nan fungngiye." ²² Yəmhəm ka yuwomən nanang hanguwi, ka di rə fudə yulluwʊnəng, bərəki karə jina kani deni. ²³ Yesu a jiga ka sotəna bwiranəmbangəm go, "Ba nəngnga bwaigu ni rə jina kaniyu a dəga dʊʊtəta Niyajiwi!" ²⁴ Bwiranəm ka mənna buni rə nwitang a tai bwantəte. Kən Yesu a kaba sotən go, "Bətəbi, dəgitang a dʊtətta Niyajiyuwi ji rǝ bwaiguwi! ²⁵ Bachi rə dəndeni naka kʊrmungəng a dəga bwaka bataləng, tən kə ni rə jəna kaniyu ba dəga dʊʊtətta Niyajiyuwiyəng." ²⁶ Hanjim ka mənna rə buni rə kwani, suga rǝ go, "Nən nyangki, wunǝ gəba jǝr." ²⁷ Yesu wa jǝga go, "A gwa niyu, nən bwaigu, mənni a gwa Niyajiyuwi, a bwaibe." ²⁸ Bitrus go, "Chu, kənnən duwe jǝni wargu nən fungngǝnne." ²⁹ Yesu go, "Sugəmən yəmbə nyam, merə ni wa duwe kai, chitə bari, chitə chuwi, ne, te, bətəbi, təm bəra nənmi na rə yǝmba ləmangəm, ³⁰ ki me ba yu kali be kwan a tai gusətə taiti: kaini, na chitə bari, chitə chuwi, na nebe, na tebe, na bətəbi na kuni rə notang a kunang, a mura gusǝtə ba be na nya yuum bə kʊrəkwangəm. ³¹ Mənni nəb mwam bə na nu wa kaggəm ba kawe bwi rə buk, bənna nʊ a buggəm ba be kag." ³² Hanjim a juwi yigi ra Urshalima, kən Yesu a su a kaggəng. Bwiranəm mənna buni, bə ka buggəm tatə mare. Kən Yesu a kaba bu bwiranəm a kəngngəng, ka kabə sotənə ji wʊ ba nəngnga bwi nəngi me rə langtangngi: ³³ "Tə chu, nən yiga Urshalima, bən nəbən Yəla Niyu a kangka nigra tun jəna chǝra Niyajiyuwi tən nəb məsarəm ba soriyǝm. Hanjim ba mwetən duute ba yagtən na nəbba yǝmbə Niyajiyuwum. ³⁴ Ba nura, a sugotən sugum, ba nəngnga tən səmbi, ba ju. Mənni a buk ka kotə tə bwanbiyǝng ki ba gun. ³⁵ Yakubu tən Yohana bətəm ba Zabadiyǝm, ka be gwa Hanguyəng ka sotən go, "Ni məsari nən fauno nəngnga bəmmən warigu ji nən chilai." ³⁶ Ka sotəna hanjimi go, "Wulai ji tə farə to nəngagəmənni?" ³⁷ Kə hanjim go, "Nga bəmmən nən chi kwang a dəntələn da gratən da mun, kwan a kang kə nyang, na kwan a kang kə gwilang." ³⁸ Yesu a jautəna hanjimi go, "Tə yǝmbə ji tə chilari. Bətə dəmən tə yu kʊnang kə bən nong, na mida rə wʊnglatang kə bə wunglaiyəng, rə baptisma bən nǝngngaimənni ga?" ³⁹ Hanjim go, "Bənən dəmən." Kən Yesu a sotəna hanjimi go, "Kʊnang kə bən nong bətə no. Baptisma bən nǝngngaimənni, bən nǝngngaigəmən rə kənggənin. ⁴⁰ Mənni ni wu ba chiya kang kə nyang ka miyəngi, tən wu ba chiya kang kə gwilangngi, me mənnə nyi a muri, bərə ki, ba nəbbə titənwum." ⁴¹ Bwiranəm bə kwauwum a nwiyəng, ka nəngnga jʊgər nən Yakubu tən Yohana. ⁴² Kən Yesu a buwowu hanjim go kəre rə dong, ka sotən go, "Kətə yǝm to nəbbə gram ba nəbba kuma muriyəm bə chi ya nəbba jiyǝm a ji, nəbbə rə yǝləntəm ban jiyǝm bə nʊng gratə nəb. ⁴³ Mənni jǝn, karba yulo nyang a jugʊrda jǝnən. Wu farə go gə chi wu gra a jugər da jənənni, a chi kwak a yulo bwira, ⁴⁴ wunə wu farə go gə chi rǝ jiguwi, a chi bwi a yulo kewe bagiyu. ⁴⁵ Bəraki Yǝla Niyu a be bə go na nəngnga gəmən swer, a be go na gə nəngnga swer, na gə nəbbən yumbangəm bəra nəb mwam." ⁴⁶ Kən hanjim a be Yarikong. Hangngu durə Yarikong tən bwiranəmbangəməng, na rə bagi nəb mwam, ka yila Timawusi bərə mo Batimawus, n'du, chira nyi ya juwiyu chila jǝni. ⁴⁷ A nwi mo Yesu wa Nazareth gə surəng, ka tau surə yǝm rə kumniyǝng, go, "Yesu, Yǝlan Daudai, nwi bunta miyu!" ⁴⁸ Nəb mwam ka sotən go masi. Ka gug jir a ji go, "Yǝlan Daudai, nəngaimən tugarang!" ⁴⁹ Yesu a siyǝng go buwe hangu a be. Kən buwe hanguwung, sotəne mo, "Gune wulak! Hangu kə bənne." ⁵⁰ Ka maisire duk kangəng rə kəngngəng, ka gune be gwa Yesuwiyǝng. ⁵¹ Kə Yesu go, "Wulai ji mən farə mo nəngnga nənni?" Du hi go, "Nigra, mə fau mo nya chutang." ⁵² Kə Yesu go, "Ya. Nəbəntanka friying ka mung ka kwara nə mwe." Rəkwa-rəkwang, ka su churə təmməng, ka tau fungtangnga hanguwiyǝng a juwiyəng.