¹ Hanjima a be Urshalima, ka diye ri do ri Betafaji na Betainya, a gwa bang ka Zaitunǝng, Yesu ka tǝm məssarbə ba gǝm bǝsu, ² ka sotǝn go, "Tǝ dǝggi a muri kǝttǝle wurere bǝ tǝ nya be lungsungngi gwimǝn bu we. Tǝ kʊwe tǝ berige. ³ Gu a gulgǝn go nyǝnne ki, tǝ sotǝn to Nigra ngǝ fare ba kawe bwi rige kʊkʊ."" ⁴ Ka diyang ka nya be lungsungngi n’kwai a fugang ka kaiyǝng a nyiya juwiyu, ka kʊweng. ⁵ Kǝ bǝ ka sira-sirai a gaiyǝng go, bǝrarǝ wullai kǝttǝ kǝrǝ be lungsungngi hiyǝng?" ⁶ Ka sotǝn ji Yesu a suwei, ka du hanjim a diyang. ⁷ Məssarbə bambǝ bǝssuwʊm be, ka be rǝ be koro hi a gwan Yesuwiyǝng ka tiyatǝn dʊte ta jiyuwʊng kǝn Yesu a gwiyəng. ⁸ Nǝb mwam a mira dʊʊte tan jiyu a juwiyǝng, bagi a tiyatǝn wana kauwe. ⁹ Ba kak ka gǝmǝng tǝm bǝ fungngərǝm ka gug jittə suwerǝ go, "Hossana! Dǝgtanga kangnga a chi ya ni bera mura dun da Nigran ni. ¹⁰ Dǝgtangnga kang a chi a dʊtettǝ beri tenǝnnun Daudai! Hossana a mura ji!" ¹¹ Kǝn Yesu a yigiya Urshalimang, ka dǝgiya kanda ruwanyini ka jǝgga jini wariguwʊng. Yu wa mang, ka jir a diya Betanya tǝn bwiranǝm ba gǝm kwu a jir bǝssu. ¹² Tǝm a sillang, hanjim a duwe Bethanyan, ka nui juwʊn. ¹³ Ka chuwe jaurang ri wani, ka yigi ki gəbə nya jauri ki, a lauwe gaiyǝng, a nyabe, a dimǝna wani, bǝraki me sǝnang ka jauriyəng. ¹⁴ Ka sotǝn go, "Kari gu ni ba kaubwi a jau betamu kurəkwang." Məssarbə ba gǝm ka nwi yǝmhǝm. ¹⁵ A lauwe Urshalimang, ka dǝgga kanda nyini ruwaniyǝng, ka ka nǝbbǝ mirǝm tǝn bǝ sutarǝm a mura kanda ruwani nyiyǝng. Ka nyǝngngo ganangte ta nǝbbǝ fulgo chǝmtǝm, na dǝntǝltǝ ta nǝbbǝ miro moglotəm. ¹⁶ Ka dang kari ni ba dǝgi rǝ bǝ mi jinni a kandǝ ruwanyiniyǝng. ¹⁷ Ka mǝssatǝn na hanjimi go, "Me mʊla-mʊlai ga, 'Kai ta miyu ba chi kai ta ruwanyiniwu ta nǝb wariguwi ga? Mǝni jin tǝ wulga yulo gu kubǝ chiwi." ¹⁸ Nǝbbǝ tung jǝni a chǝriya Niyajiyuwʊm, na nǝbbǝ gram bǝ mʊla wana Musaim, a nui yǝmba suwǝm, ka fau juwi ba ju hangu gǝrǝ. Mǝnni ka nwi tatangu bǝrki nǝbbǝ mwam ka mǝnna buni rǝ mǝsarang ka gǝng. ¹⁹ Re yuwʊng ka jirmǝn a bǝr. ²⁰ Rǝ mori surǝng, ka chu jauranhǝng ka kuse yigira saggartangu. ²¹ Bitrus a kǝmmang ka suwe go, Ni Mǝsari, jəga, jaurang kǝn nǝngngatən nyiyǝng ka kuse. ²² Yesu a jautǝn go, "Ne yǝmbǝ nyam Niyajiyu." ²³ Yǝmbǝ nyam mǝn sugəmǝn wunǝ ba sotǝn yǝma bang ke go, "Jir na yara wimang ki, na nǝngnga bǝ juggər a furiyangu ki na nəbbən yəmbə nyaməm ba chi nyang. Niyajiyu ba nǝngnga ngǝmǝn. ²⁴ Bǝri nyang mǝn sugǝmǝn mo: Nǝ wuni ji ti ruwa nyini ti chillai, tǝ nǝbbǝn yǝmbǝ nyam to kǝttǝ nyai ki, ka chi wʊngni. ²⁵ Fulla tǝ si tǝ ruwanyiniyu ki, a chin kwag tǝ yunotǝn a ba nǝngnga gǝmǝn jǝni bwiraiyǝm, naki Tǝ jǝnnu jiyu ba yǝno gǝmmǝn jǝni bwiraiya jǝnu. ²⁶ Mǝnni tǝ yunotǝn bǝ jǝni bwirai ya jiyu ki, Te jǝnna jiyu me ba yʊno gǝmmǝn jǝni bwirai a jǝnnu. ²⁷ Ban hanjim a kawe bwi a Urshalimang. Yesu ka yora mori a kan da ruwaninyinǝng, nǝbbǝ gram bǝ tung jǝni a chǝriya Niyuajiyuwm, tǝn nǝbbǝ mularǝm, na ban tabe, ka be gwan giyuwung. ²⁸ Ka sotǝn go, nya kumni tǝ mǝn nǝngnga jǝni yaiye gǝri a le, mǝnni wune ga nǝn kumni tǝ mǝn nǝngnga jǝni yaiyǝ gǝrri? ²⁹ Yesu a sotǝnna hanjim go, "Bǝn nǝngnga gǝmǝn guliyǝn diyǝn. Tǝ sumǝn ki bǝn sugummǝn ki mǝn nǝngnga jǝni yaiye rǝ tǝnǝ kumni ki. ³⁰ Batisman Yohannai, wa jiyu ga, wa nǝbbǝ ga? Tǝ ngai mǝn. ³¹ Kǝ hamjima a bugo yǝm a jugǝr da jiyǝn ka suwe go, "Nǝn suwe no 'Wa jiyu ki, 'ba suwe go wula ma ki tǝ ne bǝ yǝmbǝ nyamǝng? ³² Mǝnni nǝn suwe no, Wa niyu ki,'....."bǝn mʊngo bǝn rǝ wete, bǝrki bǝn nwi tate nǝbbi. Bǝraki ka nǝbbǝn yǝm bǝ nyam go Yohana ni yuwe yǝmmi. ³³ Ka ngatǝn na Yesuwi go "Ni yǝmbe." Ken Yesu a sotǝn go mǝrǝ kinang me bǝn sugəmǝn kǝrǝ tǝnǝ kumni mǝn nəngnga jǝni yaiyə gǝri.