¹ Kǝn Yesuwa su mǝsatǝnna hanjimi rǝ yǝm dǝgrǝmǝng. Ka suwe go, "Gu ni ka ju teni ya beta rita inabiyu, ka kauwur rǝ wetǝng. Ka gulla bwa kǝn yam inabi wung. A mʊ gu toriyǝng ka ne nǝbbǝ ju swiyerǝm. Ka nǝngnga yomǝng. ² Fulla lauweng, ka tǝm kewe a gwa nǝbbǝ ju swiyerǝm go na yuwe beta riti a teni hi. ³ Hanjim ka tau kewe hi a bugte, mǝnni a ka kani rǝ kʊn. ⁴ Ka kaubwi a tǝm gu kewe bo, hanjim ka nwitǝn der a dur mǝnni a nǝngngatǝn jǝnna bujiriyu. ⁵ Ka kaubi a tǝm gu kewe bo, a wai ji we hanjim ka jʊ kewe hi. A nǝngngatǝn nyangnga bǝggai, bugtǝ baggai, juwo baggai. ⁶ Ka dutǝn ni kwan wu ba tǝmmi, yǝlla dai angu. Ga dutǝn kwan wa tǝmtǝn na hanjimi. Ka suwe go "Hanjim ba ne gratǝ yilla miyu." ⁷ Mǝnni nǝbbǝ ju kʊwʊn ka sugga go, "Wai we gǝn ni ba jau kullai. Tǝ be tǝnnǝn ju hangu na kulla hi a yulo wuni. ⁸ Ka tau hangu a jʊwung, ka jiggmǝn a teni a beta ritiyu a mai ya tari. ⁹ Bǝrarǝ nyang, wullai ji ni rǝ teni ba nǝngngatǝnna hanjimi? Ni rǝ teni hiyu ba tau hanjim a ne kunang ki ka ne bagi nǝb teni hi. ¹⁰ Ke ba muri a yǝmbǝ yulgom ga? Wer da nǝbbǝ mu kantǝn a kwelan, ka yullo wer da jingǝng. ¹¹ Wai ji we wa gwa Niyajiyu wi, mǝnni ka nyagu a kǝmta nǝnnu. ¹² Hanjim ka fau go tǝ tau Yesu, mǝnni bǝn nwi tata nǝbbi. Bǝrki ka yǝm go a su yǝm dǝgrǝm a dutǝttan jiyu. Ka du hanguwung, ka diyang. ¹³ Ka tǝm Farisawa tǝn nǝbba Hiridusǝm a gwa hanguwi go na tǝ tau a yǝm ba gǝm. ¹⁴ A be gwa hanguwiyǝng ka sotǝn go, Ni Mǝssari, kǝnnǝn yǝm no memǝn nǝngnga fini rǝ yǝmna nǝbbi, mǝnni memǝn ni rǝ fautang ka durǝngngi bo. Bǝ nyam ka mǝn mǝssatǝn yǝmba Niyajiyuwum a nǝbbe. Ka dautǝnwe nǝn ne Kaisar chǝmmǝr da durǝn ga? Nǝ mǝr ga? Kari nǝ mǝrrǝ ga? ¹⁵ Mǝnni Yesu ka yǝm furna jiyu a jullai yu, ka sotǝn go. "Wullai a ma ki tǝ bǝngoirǝng? Tǝ niye chǝmǝr na chu. ¹⁶ Ka betǝne rǝ kwan a Yesuwǝng. Ka sotǝn nan hanjimi go, "Wʊllo we tǝn dunda wunnǝn a ji?" Hanjim a suwe go "Wa Kaisari." ¹⁷ Yesu a sotǝn go, "Tǝ ne Kaisar jiyan Kaisari, na tǝ ne Niyajiyu jiya Niyajiyuwi. Hanjim ka mǝnna nǝn hangu. ¹⁸ Sadukiyawa, ba suwe go me guntang wung, ka be gwa hanguwi. Nǝngngatǝn gullǝn a hanguwi suwerǝ go, ¹⁹ Ni Mǝsari, Musa mulla bǝmmǝn go chiya niyu a bwiya na du goggor ki chi a dǝb na nyatǝn bǝtǝbi a chiyangu. ²⁰ Ka nǝb nyibi, chitte, wu gra ka na nyi, ka bwiya merǝ bǝtǝbi, ²¹ wu suwi a dǝbǝng ka bwiya merǝ bǝtǝbi. Wu bwanbiyǝn nyang bo. ²² Waringǝm ba jiyim nyibi a bʊtǝro a dubbe bǝtǝbi. A jitang warigu, guggor hǝn ka bwiya. ²³ A guntang ka bwiyatǝng, a jii wu hanjima gunni bo, ki ba chi nyiya wuni? Bǝraki waringǝm ba jiyəm nyibi ka na nyi hi." ²⁴ Yesu a sotǝn go, "Men ji ya nǝngnga ki tǝ le juwiyu ga, bǝraki tǝ yǝmbǝ Dʊndǝ yulgoiyən na rǝ kumni ta Niyajiyuwi? ²⁵ Nǝbba gun a bwiyatǝm me bǝ nǝngnga nate, me bə nəbbən nan ate bǝraki bǝ chi nyǝra weni təmri. ²⁶ Mǝnni bo ba bǝtərom, na gʊnnǝm, tǝ ke ba wang kan Musang ga, a yǝmba sʊwem, a jiwu ka sei, Niyajiyu a sotǝn go nge gǝn Niyajiyuwa Ibrahimi, na Niyajiyuwan Ishakuwi na Niyajiyuwan Yakubuwi ga? ²⁷ Hangu me Niyajiyu wa nǝbba bǝtǝrommi, mǝnni wa bǝrǝ yuwummǝmmi. "Kə tə le juwi" ²⁸ Kwan na mura nǝb mularǝm ka be nwi ji hanjim sugari; a chu go Yesu ka ngatǝnna hanjimi nyagu. Ka gul Yesu go, "Wunne sori gwa li yiggai yu?" ²⁹ Yesu ka sotǝn go, "Sori a li yu, 'Nwi, Israila, Nigra Niyajiyu wa nǝnnu, Niyajiyu kwan. ³⁰ Tǝ yotǝnda Nigra Niyajiyuwa jǝnnu rǝ furiya jǝnnu warigu, rǝ nǝr da jǝnnǝn warigu, ra kǝmarang ka jǝnnǝng warigu, rǝ kumni ta jǝnnu warigu. ³¹ Sorin suwi nyara rǝ wei, 'Yotǝn da niya kulliyu a mu nyǝra dur da mun. Me ri gu sori ya li yaiye. ³² Ni mulari hi ka suwe go, Ni Mǝsari nya, kǝn suwe mo Niyajiyu kwan, me gu we a dimǝna hanguwi. ³³ Yotǝn da rə furiya mu warigu, na rǝ yǝmtang ka mung warigu, na ra kumni ta mu warigu, na yotǝn da niya kuliyu wa mu nyəra rə dur da mun, ka li jǝnni tungri ya chǝriyu nǝbbǝntang ka dʊrung. ³⁴ Yesuwa chu ka su yǝm rǝ birsanǝng, ka sotǝn na hanguwi go mən me pre rǝ duttǝtta ta Niyajiyuwi." A bukka nyangǝng me gu ni a kwaba nǝngngatǝn gullǝn a Yesuwi. ³⁵ Yesu ka jautǝn a jii wu nǝngnga mǝsarang a kanda ruwanyiniyǝn; ka sotǝn go, "Wullai a maki jin nǝbbǝ kerǝm tǝ suwe to Kristi yilla Daudaiyǝng? ³⁶ Dauda rǝ bwigo a mura we Niduwi, ka suwe go 'Nigra ka sotǝn na Nigra miyu, go chiya kangkǝ nyangka miyǝng, bera fulla bǝn dǝg nǝbba kakgǝm ba mum a yulo dǝntǝllǝn dǝ ti nana muwun. ³⁷ Dauda rǝ bwigo ka bu hangu go 'Nigra, mǝnni ba nǝngnga go nyǝnne kǝn Kristi ba chi yillan Daudai? Nǝb mwam ka kautənsu a hangu rə bwilǝmmri. ³⁸ A mura mǝsarang ka gǝng, Yesu a suwe go, tǝ nǝngnga ba deen rǝ nǝbbǝ mularǝm, ba li farǝ go tǝ yorǝ duttǝttǝ kuntaiyu, na farǝ yutangnga surang a gana banduwai. ³⁹ Na farǝ gani chǝri a grati a kanda ruwa nyiniyǝn, na gani kuntai ya bwilǝmriyu. ⁴⁰ Hanjim bo bǝ yuwamǝn kai na yugniyonǝm, mǝnni ruwa nyin wulilli go na nǝbba chu. Nǝbbambe ba yu dutite kweiwi. ⁴¹ Yesu ka chi ya kag a gun kura chǝmmǝr wi a kandǝ ruwanyiniwun jiga nyǝngke nǝbba kwi chǝmtǝ a mura swa chǝmǝring. Nǝb bǝrǝ jǝna kaniyǝm kwi chǝmtǝ mwam mwam. ⁴² Gu yugwiyo ka be kwi jǝni rǝ bwai tǝsu. ⁴³ Hangu ka bu məssarbǝ ba gǝm ka sotǝn go, "Mǝn sugumǝm yǝmbǝ nyam, Yugwiyo rǝ bunǝni we ka kwi a li ji nǝb warigu a kwiyu. ⁴⁴ Bǝraki waringǝm ba jiyǝm a mamǝnne wa ji mwammi ka gǝrǝ, mǝnni yogiyowe a mura bunan da gǝn a kwi ji ka gǝri warigu.