¹ A jiwʊ Yesu dimǝnera kanda nyini ruwaniyǝn, kǝ bwira gu kwan a sotǝn go, "Ni Mǝsari, jigga wetǝ ta mənatangnga buniyu te kantǝtta nyəngna yəngnai te!" ² Kǝn Yesu a sotǝn go, kǝtǝ chu kantǝtta kuntai a nyiyanyiyai ye tǝ ga? Me wer dein dǝ bǝn du a jiya daggaiyin dǝ me ba nyǝngmǝnǝn. ³ A Jii wun Yesu wa chi a banka Zaitun jiggare kanda ruwa nyiniyǝn, Bitrus, Yakubu, Yohana na Andrawus ka gul hangu wa a kǝngng, ⁴ "Subǝmmǝn, wunǝ fulla gǝ jǝni yaiye ba nǝngnga bwiyu? Wulai ji ba yulo jiya nungtangi a jǝni warigu ba nǝngnga bwiyu? ⁵ Yesu ka su sotǝnnǝ go, "Tǝ chi rǝ yǝmtang” Kari gu ba dǝgǝn a letang. ⁶ Mwam ba be mura dunda miyin sugu mǝni go mǝn nǝn hangu, ba jula bǝggai mwam a lira. ⁷ Fulla bǝtǝ nwi yǝmba kunnǝmǝm ki, na be gǝmǝm rǝ yǝmnan gu a gani dandang, kari ba da gǝn; a chi kwag jǝni yaiya nǝngnga bwi, mǝnni mwatǝntang a lauwe be fu. ⁸ Tǝm ba guntǝn na tǝm, dʊʊte ba guntan a dʊʊte. Bǝn nǝngnga kǝtti a gani dandang, na jʊn. Yaiye sutang ka kunang ka buwongǝng. ⁹ Tə chi rǝ yǝmtang. Bǝn di nǝn jin na kakka dʊʊteng, bǝn bʊgtegǝn a kantettǝn ruwa nyiniwi. Bǝn di nǝn jin a kakka nǝbbǝ gram ba tau tǝmmǝm na dube, bǝra nǝn me, na ba chi jiya suwetangngi a ji. ¹⁰ A chi kwak wautǝn yǝm ba Niyajiyuwum a nǝb warigu. ¹¹ A fulla di nǝn jin a kak ka dʊʊtǝngngi ji bǝtǝ suwei kar ba daa gǝn, bǝn nǝgǝn ji bǝttǝ suwei menən jin bətə suwe, We Niduwi ba suwe. ¹² Ni ba nǝbbǝn chi n'ju, te ba nǝbbǝn bwe. Bǝttǝbi ba nǝbbǝn tebeban jiyǝm a dǝg n'juwo. ¹³ Bǝn kogǝn bǝrarǝ dunda miyin, mǝnni wa bi furi yigira mwatǝnti bǝn jigge. ¹⁴ A jiwe tǝ chu jini bwirai ya dautǝnbǝwi nǝngnga bwi a gwa dautǝnbǝwi ki (masi ni wu keri a jigga) bǝ ka tǝm ba Yahudiyam a gwi a hǝlla, ¹⁵ wʊ ka hǝlla kara suwere go gǝ dǝb ̇guji a kai. ¹⁶ Wʊ ka kʊwi kar ba kauwebwi go gǝ dǝb ji mǝrani. ¹⁷ Mǝnni kʊnnang ka nya nyimbǝ rǝ futǝm na bǝ no bǝtǝbiyǝm. ¹⁸ Tǝ ruwa nyini kari jǝnni hi ba nǝngnga bwi rǝ jusang. ¹⁹ A wai fulai bǝn nǝngnga kunnang dǝnni, kǝn nǝngngamǝm buwun a jii Niyajiyu a nǝngnga gusǝti, me bǝn kaubwi nǝngnga kʊrikwang. ²⁰ Niyajiyu na mamǝn bǝ kotihi ki me rǝ ni naba nǝngnga yumii. Mǝnni bǝra rǝ nǝbbǝn samǝnsawiyǝm ga dǝg mamǝn kotihi. ²¹ Mǝnni gu wa sugumǝn go, 'Chu, Kristi ka gwe!' go, 'Chu, Kristi ka gurere ki!' kari bǝtǝ nga. ²² Bǝraki ban Kristi a nyati na nǝbbǝ yuwe yǝmba nyatǝm ba jire rǝ jǝni dangdang ya mǝnnatang a buniyu, na ba tǝ julla nǝb, rǝ nyatangki, rǝbǝn samǝnsauwiyǝm. ²³ Tǝ chi rə yǝmtang, kǝn sugumǝn jǝni yaiye jii ya lauwebe. ²⁴ A bukka jii ya kunang ka yai kotihiyǝng, ko ba nǝngnga yulu, swang me ba nǝbbǝn kwetǝrrai, ²⁵ bǝtiswangngi ba yǝrawa ji, Jǝni kuntai ya jiyu ba mǝgga bwi. ²⁶ A wai jii hi bǝn chu Yǝlla Niyu bera a mura korte rǝ kumni rǝ gratǝttangu. ²⁷ Ba tǝmme weni tǝmri a kura bǝgǝm bǝn samǝnsawiyǝm a kǝngngǝr tǝ gwar a gusǝti. ²⁸ Tǝ mǝsamǝn na jaurang, tǝ chu waniyangu a tugamǝn na suwawuriyǝ ki, tǝ yǝm to jusang ka diye rǝ do. ²⁹ Tǝ chu jǝni yaiye nǝngnga bwi ki, tǝ yǝm to ka diye rǝ do, ka lauwe a nyiya fugangngi. ³⁰ Kǝn sugəmǝn yǝmbǝ nyam bam dam be meba ji jǝni yaiye warigu a nǝngnga bǝ bwi. ³¹ Ji tǝn tǝm ba ji, mǝnni bwantǝtta miyim me ba su. ³² Mǝnni wai ko hi, a wai fula, me ru wa yǝmmi, me weni tǝmri, men Yǝlli hi, Te hi gǝn kwan ga yǝm. ³³ Tǝ chi rǝ yǝmtang, tǝ jiga,bǝri ki tǝ yǝmbǝ ji tǝn ko hi. ³⁴ Nyara rǝ ni nǝngnga yomi-na dʊtǝn kai a bwiranǝm ba gǝm, wunǝ ki rǝ swiyǝr da ba nǝngngan, ka sotǝn na ni to tǝmi go kari ba da dum. ³⁵ Tǝ chi rǝ yǝmtang, bǝrǝ ki tǝ yǝmbe jii ni rǝ kaiyu ba kauwe bwi rǝgi; nǝn yu ga, nǝn juggar da kumǝn ga, yawi swiri ki,nǝn mori ki. ³⁶ Kari ba be fugbǝn, nyangǝn a dum. ³⁷ Ji mǝn sugumǝmmǝni ni we, mǝn sotǝna wuni ki tə; chi rǝ yǝmtang!"