¹ Bwiləmriya yautang tǝn wa jǝni jauri ya mwanda merə bariyəng a dutən kotə təsuwung. Ki nəbbə gram bǝ tung jǝni a chǝriya Niyajiyuwung na nǝb mʊlarǝm ka fau nyəng kəba tau Yesu a kulu kuluwi bwi rəgəng natə ju. ² Kə sugare go ''Mənni men ko bwiləmriyu, bǝrkǝ bətə dǝg furna nəbbi ya gun.'' ³ Yesu ka Betanya a kaita Saminu rə bugabwiri, ka kura bwi ya jautang a jǝni jauri, kə gu nyi a dəbbe dalǝnda nong kə məttə-məttəng kər rə chǝmmər deniyǝng, ka wumən a swaratəna durda Yesuwunnəng. ⁴ Mǝnni bǝgai ba nwi jʊggərǝm. Ka suga bwitən jiwu go, 'Wullai ya ma ki bǝn nəngnga kan lungtang kanke? ⁵ Nʊng kanke na bǝn mii a sumənna dinari bǝtǝttǝ bwanbi, na wutugotənna bə merəgəm.'' Kətə milatǝn yəm ma nyihiyəng. ⁶ Kən Yesu a sotən go, ''Tə du hangu a gai. Bəri wulai kətə milatən yəmməng, ka nəngngaimən jiya dautən wi. ⁷ Tə ka tə nǝ kǝmarang ka tugarang ka nəbba yarmənnəm na bə merəgəm ki, tə ka kin jʊttʊkwang, mənni jǝn me bənən chi kin jʊtʊkwang. ⁸ Nyi hi ka nəngnga swiyer də nyan da yingnatang ka bwiya miyuwʊng bəra dəgtang. ⁹ Bə nyam kəmə sugum məne, a gani bən wau yəmba ləmləmiyəm warigu a gʊssitem me bən tamən rə swiyer də nyiwa nəngngai mənən.'' ¹⁰ Yahuda Iskariyoti, kwan a mura mǝssarbǝ ba gəm, ka mwa yigira nigra nəbbə tung jǝna chǝriya Niyajiyuwum na gə nəbən hangu. ¹¹ A jii wu nəbbə gram həm bǝ tung jinni a chǝriyǝm a nwi nyangngəng, ka nəngnga bwiləemri rə kwani rə yəm burəm ba netang a chǝmmər hanguwum. Hangu kasu farə jutǝ ba nəbən Yesu gəra gwa jiyu. ¹² A ko rə jigu wa bwiləmri ya mwan da fomfommən də merə bariyən, na bo tungtang ka bəglar da bwiləmri ya yautangngi, kə mǝssarbǝ ba gəm a sotən go, mǝn fau mo nən ni yigi a le yǝngna gubǝn jau jǝni jauri ya bwiləmri a yautangngi a le?" ¹³ Ka təm bəsu a mura mǝssarbǝ bagəm go, ''Tə digi a mura bɨr, gu ni a dəbbe tʊr da hiyən ba nyagǝn.Tə fung. ¹⁴ Kai ta digiwi wariguwi kətə fung, tə sotəna ni rə kaihiyu, 'Ni məssari go, ''Kanda fubǝn da miyǝn gǝdǝne, gu bǝn jau jinni jauri ya bwiləmri ya yautangngi nən mǝssarbǝ ba miyem? ¹⁵ Hangu ba nʊggǝn kai tə kuntai ta jiyu yǝngna yǝngnai. Tə yǝngna bəmən gai.'' ¹⁶ Mǝssarbǝ ka du ka digiya bɨr hənnəng. Ka nya jǝni warigu nyǝngka sotǝn rəgəng, ka yǝngna gwa jautang ka jǝnni jaura bwiləmri ya yautangngi. ¹⁷ Yʊwa mang, ka be tən bə kwou a jər bəsuwum. ¹⁸ Nyəngkə hanjim a chiro a gun tək jǝni jauriwi na jarǝ jǝni jauriyəng, kən Yesu a suwe go, ''Bə nyam kəmən sugʊmməne, kwan na jǝnu wunǝ jarǝ kini ba mii.'' ¹⁹ Kə hanjiyəm a ləbtə furni, gʊlgare a bwitən jiyu kwan nən kwan. ''Bən yam me nən məgga?'' ²⁰ Yesu a ngatən go, ''Kwan a mura bə kwou a jər bəsuwʊm, wʊnən dəg kang kin ni a kasi ku nyəngki. ²¹ Yǝlla Niyu ba di nyəngkə yəm bə yʊlgoiyǝm a suwe gǝrə a n'giyəng. Mənni kunang a wai ni we ba miyu! ''Ba litən kə karə məna bərəng." ²² A jii ka jarə jǝni jauriyu, Yesu ka dəb mwan dǝ fum-fumǝn a dəktən kang, ka wulang. Ka ne hanjimǝng, a suwe go '' Tǝ yu. Gǝn bwiya miyu.'' ²³ Ka kaba dəb chule, ka nǝngnga wunnannǝng, ka ne hanjimǝng, waringǝm ba jiyǝm a no mura chuleng. ²⁴ Ka suwe go ''Bǝn dugum ba miyəm ba yəm bʊrəm, bən kʊssəre bəri nəb mwamməm. ²⁵ Bə nyam mǝn sugǝmǝne me bən kabi no hiya inabiyu bo, məni ba chiya kowʊ bən no figu a mura Dʊʊte ta Niyajiyuwi.'' ²⁶ A bukka ma fiyangǝng, ka diya bank ka Zaitun nəng. ²⁷ Kə Yesu a sotən go, jən warigu bǝtə təlna tə yǝra bəri nən me, bərki a mula mula bwi go, 'Bən bau yari, matə ba kuwo. ²⁸ Mənni a bukkǝ guneng ki, bǝn lugən yigira Galili. ²⁹ Kən Bitrus a sotənna hanguwi go, ''Ki bagi ba yar warigu ki, me bən yar.'' ³⁰ Yesu a sotənna hanguwi go, bə nyam kəmən sunənne, a mura kumwe kolong me ba dʊlga kən suwʊn ki bən jau buriya miyu kali tə bwanbi." ³¹ Mənni Bitrus a suwe go, ''Kǝ bənǝ bwiya kin ki, me bən jau buri ya mu. Waringǝm ba jiyǝm ka nəngnga bam yəm burəm. ³² Ka lauwa guka bərə mo Gesmani, kən Yesu a sotənna bwiranəm bagəm go, ''Tə chi a gwe, mən di ruwa nyini. ³³ Ka dǝb Bitrus, Yakub, tǝn Yohana, ka sʊ nwi kʊnang rǝ switangnga bwi rə kwani. ³⁴ Ka sotən na hanjiyəm go, "Yum ba miyu kə nwi kʊnnang a nǝngnga da men bwiya.Tə yami a gwe na tə chi rə yəmtang.'' ³⁵ Yesu a kəra kak baniyeng, ka ru a ruwanyini go, ki ba nəngnga bwi ki, dəb gǝmən wai jii we. ³⁶ ka suwe go, "Abba, Tai, wunəji warigu ka nəngnga bwi a gwa mwiyu, dəbbimən chʊlle kʊnnəng kangki. A nyangngi bo men fautang ka miyəng, məni kʊmang ari bwi. ³⁷ Rə kautang ka bwiyəng ka nya hanjiyəma dumni, ka sotənna Bitrusi, Siman, muwa dum ga? Bali me bən dəmən chi rə yəmtang a jii kwan ga? ³⁸ Tə chi rə yəmtang tə ruwa nyini kari bətə yarra bənggorang. We ka fare, mǝni bwi merə kumni. ³⁹ Ka kaubwi a ruwa nyini nyara rǝ bwantə tərə jiguwi. ⁴⁰ Nyang bo a kauwe bwiyəng a nya hanjim a dumni, bərki dum ka riromən kəmtə rə kwani ka buna ji ba sotənna hangu. ⁴¹ Ka kauwe bwi kən bwanbiyəng ka sotən go, "Tu wa dum tə gərmənə nyang ga? Ka switən nyang! Fulla ka nəngnga. Kən nəbbən Yǝlla Niyu a nəbbərə jǝni bwiraiyəm. ⁴² Tə gun tənǝn di. Tə chu ni miiri ka diye rə do. ⁴³ Ka mura sutangnga yǝmǝng, Yahuda, kwan a bə kwu ajir bəsʊwʊm, tən kʊlən da nəbbən rə dampotə rə gumtə, rǝ nəbbə gram bə tung jǝni a chǝriya Niyajiyuwum, na nəb mularǝm, na tabə bən tungngəm. ⁴⁴ Wai wʊ miri ka bəngotən go ''Wubən kʊm rə surangngi gən ni hi, tə tau tə di rəge tə məra." ⁴⁵ Yahuda lauwe rə kwa rəkwang, ka be gwan Yesuwi ka sʊwe Ni Məssari rǝ surangǝng', ⁴⁶ Kə hanjim a tau a di rəgəng. ⁴⁷ Mənni kwan na jiyu ba sirasiraiyəm a jigge dumpo a kammən su a bwira nigra nǝbbǝ tung jǝni a chǝriya Niyajiwum. ⁴⁸ Yesu ka sotǝnna hanjimi go,"Tə jire nyəra nəbbə tuwa kubəm rə dumpo na gumte na tə tai ga? ⁴⁹ Jii wu nən kakin jəttəkwang mən nəngnga məssarangi a gwa ruwaninyini, nən ka kin a wunǝ ko mǝnni tə tai be. Mənni nəngnga nyang naba ri jiwe dundə yʊlgon na suwai ⁵⁰ Bə ka tǝn Yesuwum warigu ka du a mwara diya. ⁵¹ Bweli rə dug burang kwan na məbəna bwi ni ka fungrə Yesu. Fulla nǝbhǝm a tauwung, ⁵² ka dutən dʊg burang həng ka mwa bwi rə kʊnnang. ⁵³ A gai wʊng ka di nən Yesu a gwa nigra nəbbə tung jǝni a chǝriya Niyajiyuwi. A gai ka kuratənne nəbbə gram, na rə bə tung jǝni a chǝriya Niyajiyuwung na nəb mullarəm. 54 ⁵⁴ Kən Bitrus ka fung hangu furere yigira kaita nigra nəbbə tung jǝni a kakka Niyajiyuwung. Ka chi tən nəbə jəgga kaita ruwa ni nyini gər kərang. ⁵⁵ Kə nəbbə gram ba nəbbə tung jǝnni a chǝriya Niyajiyuwum warigu rə bə nəngnga tən duutə Yahudawam ka fau jʊtə ba nya ka ju Yesu rəgi. Məni a nya be. ⁵⁶ Mwammiya jiyu ka kəra nyətte mini nyini ya jiyu a swigobe. ⁵⁷ Kə bǝgai ya gunne bo a kəratən nyəttǝng; suwerǝ go, ⁵⁸ kənən nwi a suwe go gəbə nyǝng kanda ruwani nyiniyən də nəb ba mu rə kaniyǝn, na gə kabi gə mu dagi a mura kotə tə bwanbi, dǝ mubǝ rǝ ka niyəng."" ⁵⁹ A nyang bo nyini ya swigobe. ⁶⁰ Kə nigra nəbbə tung jǝni a chǝriya Niyajiyuwi a guna jʊgʊr da jiyǝn a gʊl Yesu go, ''Me bə nga yəmbə nəb suwera mwiya durəng ga?" ⁶¹ Ka masi sǝu nə kəgang a suwe bə guji. Kə nigra nəbbə tung jǝni a chǝriya Niyajmiyuwi ka kaba gʊlləng, ''Mwe mən Kristi Yəlla wu dəg kangngi ga? ⁶² Yesu ka suwe go ''Nən me; bətə chu Yilla Niyu a chiya kang kə nyang ka nirə kumniyǝng, wu be ra mura korǝni.'' ⁶³ Kə nigra nǝbbə tung jǝni a chǝriya Niyajiyuwi a yəro dʊttətan gu ka suwe go, ''Bənə butang ka bugən kəbən nən fauwung bo? ⁶⁴ Kətə nwi buməntang ka nəngnga! Tə chu nyənne? Waringǝm ban jiyǝm ka mwetən duute hanguwi nyəra wa dautə bən juwi. ⁶⁵ Bagi bo ka su sugatən sugum, ka bumən kəmte,bugtəre suwerə go, ''su yəm yuwerəm.'' Nəbbə gram ba kanda ruwani nyiniyəm ka bugte hangu. ⁶⁶ Bitrus ka tǝm a tara kaiyu, kə gu bwe chuwi bwira nigra tung jǝni a chǝriya Niyajiyuwi a beng. ⁶⁷ A chu Bitrus gər kərangǝng, ka jəgga nyaguwung ka sotən go ''Mwe tə ka kin tə niya Nasarediwe Yesu'' ⁶⁸ Mənni ka jau buri a suwe go ''Yəmbə ji mən suwe ri njəggabe.'' Ka jirewa kanda fugangngi. Kə Kolong a dʊlgang. ⁶⁹ Bwe chuwi ka chu bo, ka sotənna ba sirasirai a gaiyǝm go ''Hangu we ka mura kwan na jiyu'' ⁷⁰ Mənni ka kaba jau buri, ka yəgtən banyiyəng, bə ka sira gaiyəm ka sotənna Bitrus ''Yəm bǝ nyam mən ka mura kwan na jiyu, bərki mən niya Galiliyu.'' ⁷¹ Ka su nǝngnga nyi a durda gən buwa buni suwerə go ''Yəmbə ni waiwe tə suweri we.'' ⁷² Rə kwa rəkwang kolong ka dʊlga kə suwung. Bitrus ka kəma rə yəmbə Yesu a sotən go ''Kolong meba dʊlga kali təsu ki bən jau buriya miyu kali tə bwanbi,'' a kəmma nyangngəng ka bwang rə wiyəng.