¹ A jǝrmǝnne wa gaiyəng ka be bɨr da gənəng, kə bwiranəm ba gəm a fungəng. ² Ko griyu a beng, ka məsa tən na nəb a kan da ruwani nyiniyǝng, nəb mwam ba nwiyǝm , ka mənna bunte, nəngnga gulte go, "A nya kang məsaranka le?" "Dan bərsan də ne hangu nyanyǝngkən gən dəne?" "Məni jǝna mənatangka buniyǝng kə nəngngarə rə kananguwun kə bo?" ³ "Me nə ngən bwe wu buro riti wuga, yilan Meriyu, na rə chiyangu nə ba Yakubu, Yahuda, na Joses na Simani ga? Mo chittə-chuwitangu nə kakin a gu ga?" ⁴ Hanjim ka nəngnga fur də yulluwun nən Yesu, kən Yesʊ a sotənna hanjimi go, "Niwu yuwe yǝmi merə grate a mura bɨr da gən, a mura dugərtitan gu, na mura kaitan gu." ⁵ A kabi ba nəngnga swerda mənnatang ka buniyǝng kə mwaməng, a tək tən a titangka kaniyǝng ka nəngnga təna nəbba bwara-bwarayǝm na nya bwiti ləmmangngiyəm. ⁶ Hangu ka nwi mənnatang ka bwiyǝng bəra rə bunai ya nəbbəntang ka yimbə nyamba jiyǝm. Ka di a kauwurre murte rə mǝsarang. ⁷ Ka buwe bə kwʊ a jǝr bəsuwuməng, ka sʊ təmma hanjim bəsu-bəsuwung, nerə kumni a jiya weni bwirai, ⁸ ka ne sori hanjǝm go a dimən a damərki, kari ba dəb; jini jauri, chǝmər, tən swa a yomba jiyǝm, ⁹ mǝnni na dʊ ləbərte, na kar ba dəb dʊte təsu. ¹⁰ Yesu go, "Kaitǝ tǝ dǝgi wi ki, kar tə jǝrre yigi ra jiwu bətə du murihiyu. ¹¹ Bɨr da yəgən bənki, jiwu tə jǝrməna gaiyu, tə bamən kurda nanan jǝnuwun na dʊtətta dutən anji. ¹² Ba hanjim a jǝrəng ka su wautan nga yǝməng go nəbba bukang na du nəngnga tang a jǝni bwirai. ¹³ Nəb mwam ka nya bwitə ləmangi bərarə ki ban hanjim ka karamən səmbatə bwirai a gwa nəngngatang a fini rə nʊngngi. ¹⁴ Nidʊ Hiridus ka nwi, bərarəki dun da Yesuwun kən yǝm deni. Bagi surə go, "Kən guge Yohana nǝngnga baptismai a mura nəbba bətǝrom, bənga nya kumni ta nəngngatan nga jina mənnatang a bwiyan ngu churi." ¹⁵ Bagi bo go, "Nən Iliya." Bagi go nən gu wu yuwe yǝmi nyirarə kwan a mura nəbbə yuwe yǝməm bə chirem. ¹⁶ Mǝnni a fulla Hiridus a nwiyǝng, go, "Yohana gə mwemən duri ka gun." ¹⁷ Bərarəki hangu ka tau a dəg kin mai Yohana jarəmməng bǝra nəng nyiya chi Filibusi wu hangu a namənni, wu bərə mo Hirodiyai. ¹⁸ Bərarəki Yohana sotən na Hiridusi go, "Me mənə sir a kag ka duutəng n'na nyiya chumi." ¹⁹ Bərarəki Hirodiya ka nwi jogər da jir dandəng, ka fau jutang kan ngəng, mənna nyabə sir. ²⁰ Bəra rə yulgoi na nəngatang kə nyang ka Yohanang, Hiridus ka nwi tatangu, ka farə go gə jǝg. A jiwa kautənsu a yǝmba ngəmiki, furi ka kiyare, mənni bo, ka kautən su we rə bwiləmri. ²¹ Mən ka gaiyǝng, sir ka nyabwi, a fulla Hiridus a nəngnga jǝni-jaura bwiləmra ko buwon ka gəngngi na buwowu nəbbə gram ba təmba gəmməng na rə ba Galiliyǝm. ²² Yuwiya Hirodiyasi a be na yǝl-yǝlang a kag ka Hiridus tən fubəbangəməng, kə bwiya ləməng. Nidʊ a wumən nyiyǝng ka sotəna bwechuhi go, "Chila wargu ji mən fari, bən nən." ²³ Ka bautən buni go, "Chila wargu ji mən fari ki nanu gulo təmba miyǝm ki, bən nən." ²⁴ Kə bwechuwihi a kaba gwa nei go, "Wulai ji bən chilai?" "Dur da Yohana nǝngnga baptismayǝn." ²⁵ Kə bwe chuwi hi a kabwi rə sigəng a gwa nidʊwi go, "Mən fau mo niye dur da Yohana nǝngnga baptismayǝn a mura kasi kʊ nyangnyǝngke." ²⁶ Ka da nidʊ, mənna dəmən ba kwila tən chilan da gən bərarə buni ta bauwi na rə fubəbangəm. ²⁷ Bərarə grə nyang, ka təm niwu barə krang ngi a mura bə torəm go dina be rə dur da Yohanan. Kə ni tori a diyǝng ka mwewu durhən a jarəməng. ²⁸ A be rə durhən a kasiyǝng ka ne bwecuwihiyǝng, ka ditən gra neng. ²⁹ Bwiranem bangəm a nwi jiwa nənga bwiwung, ka be dəb bwiyangu a yǝga dəg a suwʊng. ³⁰ Nəb təmrəmhǝm a kawe bwi a gwan Yesuwiyǝng, ka sotən worgu jiwa nəngayǝng tən jiwa misatən na nəbbi, ³¹ kən Hangu a sotən na hanjimi go, "Tə yǝgi a gu me nəbwi na tə gərmən bani." Bərarəki nəb ka nənga tən mwam ma hanjimi, me rə sirda jautang nga jǝni-jauriyǝn. ³² Bəra grə nyang, kən hanjim a dəga bwantulong ngəng ka diya gu me nəbwiyǝng. ³³ Nəbba chu hanjim diyarəng, ka yǝm, ka lu hanjim rə sǝngniyǝng yigira gai, jirowura murtan jiwu warigu. ³⁴ Jiwun hanjim a lau nyi ya wimangngi na chu mwama nəbbiyǝng, Yesu ka nwi kunang ka jiyǝng, bəraki, a chu hanjim nyǝra mate me rə yariyu. Kən Hangu a su məsatən jini mwaməng. ³⁵ Yuwamang, kə məssabə bagəm a be gwang giyuwung go, "Fulla ka su, məni nuwa gu me kainiwi. ³⁶ Təm nəbba diya na yǝga təm bə rə dom, na murtə rə doi na nya suta jǝni-jauri." ³⁷ Mǝnni ka ngatǝna hanjimiyǝng sotənǝng go, "Jǝn təne jǝni-jauri na juwa." Hanjim go ! Bənnən yuwe jǝni-jaura betə təsuwi ka du a lau ne nəbbi wu ga? ³⁸ Hangu go, "Tə ka tənə mwantə tə fum-fumi tə nyine? Tə jigawe." A kawe bwiyǝng go, "Mwantə tə nu, na late təsu." ³⁹ Kən Hangu go tə dəg nəb a chiro kultǝ-rǝ-kultǝng a jiya yir də yuwun. ⁴⁰ Kə nəb a chiro kultə-kultəng, bagi be kwan-kwan, bagi furtənu-tǝnu. ⁴¹ Kən Hangu a dəb mwantə tǝ fum-fumi tǝ nʊ rə latə tǝsʊ ka gug a ji a dəgtən kang ngəng, ka ne bwiranəm bangəm go ne nəbbəng. ⁴² Hanjhim warigu ka juwa a rira. ⁴³ Kusalanangu yin kʊra ka riro kʊtoni kwau a jir təsu. ⁴⁴ Nəbba juwam ka lau netə tə nu. ⁴⁵ Rə kwa rə kwang ka dəg bwiranəm bangəm a bwantəlong go di a kag ka gəng yigira Baisaida, a buk ka sotən na nəb go diyang. ⁴⁶ Nəb a diyang, Ka gwi a bang ruwa nyiniyǝng. ⁴⁷ Yuwa mang, bwantəlong ka lau jugur da wimangngən məni Hangu ka təm fu. ⁴⁸ ka chu nyǝngkǝ hanjim no kunon rəgǝng, bərarə sǝmba wimangngi wa gune rə kumniyu. Rə yawi swiriyǝng, Hangu ka diye yowura ji ya hi farə go gə su hanjim. ⁴⁹ Mənni hanjim a chu Hangu yowura jiya hiyǝng, lungtǝnu go bwiyǝng, ka mau wuriyǝng. ⁵⁰ Bǝraki hanjim a chu Hanguwung ka nwi tate. Rə kwa rə kwang, Hangu ka sotən na hanjimi go, "Tə tau furnan jinu." "Nən me!" "Tate kara magəne!" ⁵¹ Hangu a dəga bwantulong na nya hanjiməng, kə sǝmba siyǝng. Hanjim ka mənna buni deni. ⁵² Bəraki hanjim a fumbə yǝmba mwantə tə fum-fumi. Furna jiyu ka kʊse. ⁵³ Bukkən hanjim a yawung, ka be təmba Genasara, ka bu bwantilong a gaiyǝng. ⁵⁴ Hanjim a jiro mənne wa bwantilong ngən, nəb ka yime Hangu rə kwa, ⁵⁵ ka diyawu rə sǝngni warigu a mura murta jiyu dəbba wurə ba bwara-bwarayǝm a baltǝttǝ darana jiyu, fung Hangu rə ge. ⁵⁶ Wunə ka wu Hangu a dəga murti kitilei na rə tǝmba jiyǝmmi ki, mən be nəng nəb ba bwara-bwarayǝm a gana banduwati. Chilarə Hangu go dugi tə məbra nyi ya duggi ya gu, ba mǝbram warigu ka kwara.