¹ Ka birawa kagi kǝng ka wimangǝng a tǝmba Garisaniyawam. ² Yesu jǝre ra bwantulong ka hiyǝng ngǝng, rǝkwa-rǝkwang, gu ni rǝ we bwirai ka jǝrtǝne wa hanguwi a mura sutǝ ka gayu. ³ Nihi bǝ da sutihi, Mǝn buwa nǝn chǝnte. Mǝni rǝ chǝntǝn buwa rǝ gi me niya sǝng a tauwi. ⁴ Kǝn buwa rǝ chǝnte kali mwam mǝni ka tuso chǝntihi, me rǝ gu ni rǝ kumni tǝ ba sǝng a kaba buwai. ⁵ Rǝ kum rǝ ko nihi ka mura sutihi muwa wurte mwiya bwiyangu rǝ wetǝtǝ bǝlgǝmi. ⁶ A fulla chuwe Yesu berǝ preng ka mwawu sǝg a ruwa kak ka gǝng. ⁷ Ka mau wuri rǝ kumniyǝng go "wulai a dai nǝn mwe, Yesu yəlliya Niyajiyu wa li grati? Kǝn chǝlan rǝ dun da Niyajiyuwun kari ni kunang." ⁸ Bǝraki Yesu ka sotǝn go "Jǝrmǝn na niwe mwe we bwira." ⁹ Ka gul hangu go "Dun da mun mo wune?" Ka jautǝn go dun da miyǝn mo mwam, nyǝnkǝ nǝ ka mwammǝng. ¹⁰ Ka chǝla hangu a jiya ji go kari ba kaigǝmǝn a tǝmhǝm. ¹¹ Ka gǝnda kulmor da ngǝrtǝn tobwita swirda hǝlanihiyǝn. ¹² Ka chǝla hangu go "Tungbǝn nǝn dǝgiya bwita ngǝrtǝhiyu" ¹³ Ka ngatǝnǝng, kǝ weni bwiraihi a jǝrmǝnǝng ka dǝgiya bwita ngartihiyǝng, mwamiya jiyu ba lau ne tǝ tǝsʊ, ka suwowe rǝ sǝgniyǝng ka yǝra mura hiyǝng. ¹⁴ Kǝ yarǝm ba ngǝrtǝhiyǝng a mwara sǝngniyǝng ka sotǝn jiya nǝngna bwiyu a nǝbba gǝrrǝm na gani kǝngngəriyǝm.Nǝb mwam ka birawe na tǝ chu jiya nǝngna bwiyu. ¹⁵ A be gwa Yesuwiyǝng ka chu ni waiwe rǝ weni bwiraiyu a chiya gai a yobi yan gu rǝ dʊtǝtta nyai, kǝ tata ma hanjimǝng. ¹⁶ Ba be na chu jiya nǝngnga bwi rǝ ni we rǝ weni bwiraiyuwung ka diya sotǝna nǝb ji hanjim a chuwi. ¹⁷ Nǝbhǝm ka chǝla hangu go jǝrmǝn na tǝmba jiyǝm. ¹⁸ Yesu dirǝng, kǝ nihi jǝgmǝn weni bwiraiyu a chǝla hangu go na tǝ di kwang. ¹⁹ Mǝni Yesuwa ngatǝmbe, ka sotǝn go "di a kaitan jǝnu, a gwa nǝbba mʊmmi na sotǝn ji nya Niyajiyu a nǝngnga nǝnni na nyǝngka nwi bumta mu grǝng ." ²⁰ Kǝ nihi a dǝgi a bǝr da Dikafofisǝng suwerǝ grajiya ji nyai wu Yesu a nǝngna tǝnni, wariguwan jiyu ka mǝnabʊnte. ²¹ Rǝ kautang ka bwiyǝng ka Yesuwung a bwantulong ka hiyǝng a kagi kǝng ka wimangngǝng ne nǝbbi ka kawur hangu. ²² Kǝ kwan a mura nǝbbǝ gram ba kaita nyiniruwaniya Yahudawai wu bǝrǝ mo Yayirusi a be rutǝna kak ka gǝngnǝng. ²³ Kǝ chǝla rǝ go "Yuwiyamiyu me bwilǝmang, wa nyiya bwiyati. Kǝn chǝlan nǝn diya kaitamiyu na titǝn kang na nya bwilǝmangi na kwara" ²⁴ Ka di kinǝng, nǝb mwam fungre, fummarǝ hangu a kǝngngǝr warigu. ²⁵ Ka gu nyi dugum kwiyomini juttǝ kwau a jǝr tusu. ²⁶ Ka no kunang rǝge rǝ kwani, ka yogo gana yunongi mwam, a ju chǝmǝr deni, mǝni bwarhǝn bǝ yǝgtǝn kwewi. ²⁷ Ka nwi jǝni nyai Yesu nǝngngari, Ka tuwewa buk kangǝngnǝng ka mǝbra lǝgǝna guwung. ²⁸ Nyǝngkǝ ka dǝb a furiyangu go, "Kǝ nabǝ mǝbra hang nyiya dugka ngǝngngi ki bǝn kwara" ²⁹ A mǝbra hanguwung kǝ dugumhǝm a siyǝng, ka nwi a bwiyangu go kǝ gǝ kwara a bwatǝtangu. ³⁰ Re kwang, Yesu ka nwi kumni ka jǝr a bwiyangu ka nǝngnga gulǝn go, " Wuna mǝbra dugka miyǝngngi?" ³¹ Nǝb mǝsarǝm bangǝm a jautǝn go, "Chu ne nǝbbi a kawʊrni na nyǝngkǝ fummanǝng rǝ gǝng . A wai yobiwe bǝn yǝm niya mǝbrani go nyǝne? ³² Mǝni Yesu ka wʊlgo kǝmtǝ na gǝ chu niya mǝbra gǝni. ³³ Nyihi a yǝm jiya nǝngnabwi nǝn giyǝng ka jǝre wa mʊra nǝb bwi karǝ bǝrǝ tatǝng, ka ruwa kak ka Yesuwung, ka soten ji a nǝngngai wariguwung. ³⁴ Kǝ Yesu a soten go "Yʊwi, netang ka fʊriyǝng ka mʊng ka kwaranǝn mwe; di lǝmang kǝn kwara a bwatǝttanmu." ³⁵ Ka mʊra sutangnga yǝmǝng kǝ bagai nǝbba diyawa kaita nigra kanda nyiniruwaniyǝn da Yahudawan a be rǝ yǝm go, "Yuwiyamu ka bwiya. Wula ma ki mǝn da Ni-mǝsariyǝng?" ³⁶ Mǝnni Yesu a nwi ji hanjim a suweyǝng, ka sotena nigrahi go, "Kari nwi tate. Nebǝn yǝmbǝ nyam bwigi" ³⁷ A lau a kaihiyǝng, a ngatǝn ba gu ni a dǝgi a sumǝna Bitrusi, na Yakubu na chiyangu Yahaya. ³⁸ Ka dǝgiya kaita nigrahiyǝng ka chu nǝb nǝngnga furdǝyǝluwun na bagai mwam tiro wite. ³⁹ A dǝgiya kaihiyǝng kǝ gullǝ nǝbhǝm go, "Bǝrarə wulai kǝ tǝ tiro witǝng?" Bwechuwihi a bwiyabe; bǝ dan dum." ⁴⁰ Kǝn hanjima nura nutǝng. Ka jǝg nǝbbǝ ka gaiyǝm warigu a tariyǝng. Ka buwe te bwechuwiyu na nengu na bagi ba hangu a be kinǝm. Ka dǝgi a gʊn ti bwechuwihiwi. ⁴¹ Ka tau kang ka bwechuhiyǝng ka sotǝn go "Talitha Koum" mǝni bǝ suwe go, "Bwechuwi, mǝn sunǝn mo, gun." ⁴² Re kwa-rǝ-kwang bwe chuwi hi ka gun a yo yom. (Nyǝngkǝ jǝtǝttangu ka lau kwau a jʊr tusu) ⁴³ Ka sotǝna hanjimi go, kari gʊni ba yǝm. Ka kaba sotǝn go tǝ ne jǝni jauri a jau.