¹ Ka su mǝsarang a nyi ya wimangngi, kʊlǝn da nəbbən ka fung hangu. Məni hangu ka dəgi abwantulong. Məni bo kʊlən da nəbbən ka bangang ka wimang ngǝng. ² Ka məsatən jenni mwam rə dəgtang a yəm a muri ya məsarang, ka suwe go. ³ "Tə kau su no, gu ni wu warǝ jǝnniyu. ⁴ Ka di a wautang go nyəng bagi duwum ka kwiyo a juwi, kəllete ka dəbba. ⁵ Bagi ka kwiyo a ji ya wete, gu metəm mwam wi. A lang be bəra ki me təm mwam a ji tang gu. ⁶ Nəngnga ko dəniyəng ka yungngayungngai, yagi ka kʊse bəraki a dəgbə nətte deni. ⁷ Bagi bo ka kwiyo a tʊtte, ka ji, a gra, məni tʊtte ka buwa, a gwalbə nyagu. ⁸ Bagi bo, ka kwiyo a təm bə nyam, ka gra a gwal nyagu, kən nya beta kwaiyu a bwarǝn yagi furtə bwanbi, yagi furte nukkun, yagi be kwan." ⁹ Ka suwe go, "Wunə ni rǝ suniyu a kau su na nwi." ¹⁰ A fulla Yesu gən kwan ni, bagi nəb na rə bwiranem kwau a jǝr bǝsʊ, ka gʊl finita yəm dəgrəmmi. ¹¹ Ka sotən go "N'jən bo kən nga gəmən motə yəm ji ya bǝmǝnbwiyu, a muri ya duute ta Niyajiyuwi, məni bo bagi bǝ tə me kinəm wuni ji ki, bə fau dəgtang ka yəmməng. ¹² Na a chutang ki, a chu, məni kari ba jəgga. A nwitang ki, a nwi na kari ba yəm. Kari ba bukang naki bən yənotən." ¹³ Ka sotən go balli tə yəmbǝ dəgtang a yəm ga? Halǝ gʊ bətə yəm tagiyu? ¹⁴ Ni warǝ jǝnniyu bə wau yəmba Niyajiyuwum. ¹⁵ Ba yar a juwiyəm a jərgo tən nəbbən wau yəm a furnajiyuwum. Ban hanjim a nwi yəmməng, a langbəng Shetan ka be a dəmmən yəm həm a furnajiyu. ¹⁶ Nyang bo rə bən wau a gwa wetǝm, ngəm ba nwi yəm na yu rə bwi ləmriyəm. ¹⁷ Məni bo a dəgbǝ nətte rə kumni, a ji wu fumtang na rə kunang a bei ki bərarǝ bwan ki a ji bani ki ban hanjim ka təl nani. ¹⁸ Bagi bo a jərgo tən ba kwiyo a mura tʊttem, a nwi yəmhəmǝng, ¹⁹ məni jǝnniya gʊsǝti rə julan da gən na rə jələn da jǝnniyən ka buwa a dəmmən yəm hǝm a yullo merə fini. ²⁰ Bən wau a təmbə nyamǝm, gən ba jərgo tən ba nwi yəm na yuwum, na nəngnga fini gərəm. Kǝn nya beta kwaiyu a bwarǝn furtə bwanbi, yagi furtə nukkun, kə nya yagi bo, be kwan." ²¹ Kən Yesu a sotəna ba hanjimi go, "Mən be rə gungor də kwetəren a mura kai naki həbtən kǝlən na dəga swetǝ ga? Tə be rə ge to naki na ti a gutiriyang gu. ²² Me ri ji, a kəllu-kəllu bwiyu, wu me bən yəmmi. Me ri ji a məra - mərai bwiyu wu me ba jəgbwi a tariyu. ²³ Wunǝ ki a kau su, na nwi!" ²⁴ Ka sotənǝng go, "Tə kaubwi rə kəmmarang ka jənəng a ji tə nwiyu. Chule n'bau gəri bən banən gəre, kabi yəngnən. ²⁵ Bəra ki mən yǝgtəna ni wu ka gəri, wu megəri bo, ki kən yəmmən, ne wu ka gəri." ²⁶ Ka suwe go, "Duutǝtta Niyajiyuwi nyərra rə ni wu wasə duwʊm a təmmi. ²⁷ Da na gunnən duwʊm ka ji a gra a yəmbǝ nyəngkə nəngnga gərəng. ²⁸ rə bwigo ka nəbbən fini: rə jiguwʊng bari, sʊg-kwaiyǝng, ki ka fung rə kwai. ²⁹ Kwai ya bi ki, ki kǝn dəgtən kii na har, sənang ka ma." ³⁰ Ka kaba suwe go bən bənggo duutǝtta Niyajiyuwi rə wulai? Rǝ bənə dəgtang ka yəmǝng bǝnǝ bǝngo gǝrəng? ³¹ Nyəra rə be sakǝləm mi wu wau a təmmi. Ga li kətəleguwi a mura duwʊm ba gusǝtəm. ³² A nyangngi bo wau ki ka gra li yagi rita siyu a nəngnga hakte, ki kəlete ka nəngnga kwilote a hakte.' ³³ Rǝ dǝgtang a yǝm mwam ka sotǝm yǝm a hanjimi, nyǝra kǝ hanjim ba yǝm grǝng, ³⁴ mebǝ sotǝn yǝm a hanjimi me rǝ dəgtang a yəm, məni fula gǝng kwani ki ka jəgga tən jənni warigu a bwiranəm ba gəm. ³⁵ A kohi, yuwa mang, ka sotəna bwiranəm go, "Nən yau a yauwur." ³⁶ Kən ban hanjim a du kʊlen, ka dəgi a bwantulongngəng. Tagi bwantulongtə ka gai. ³⁷ Fulla səmba gune rǝ kumniyu longsungta hiyu gwigori, na bwantulong riye rə hiyǝng. ³⁸ Yesu ka mura buka bwantəlongəng,a da dum a jiya dǝntǝlǝn. Kən ban hanjim a be guk hanguwung, go, "Ni Məsari bənən bətəro mənni a daanbǝ ga?" ³⁹ A gunnəng ka mwe səmbahiyǝng. Ka sotən a hiya wimangngi, kura bwi na masi sau. Mənni səmba hi ka da, "Wunəka ka masi sau. ⁴⁰ Ka sotəna hanjimi go wula ma ki tə nwi tatəng? A lawetənku bo tə nəbən bə yəmbə nyam ga?" ⁴¹ Ba hanjim ka sau tatə deni ka sotəna bwitajiyu nən wune wai we, "Nən wunǝ bo, wu səmba wimangngi nwitən yəmmi?"