¹ Yesʊ ka dɨgga bontəllong ka hiyəng a yau a diya bɨr da gən. ² Bo kən betən rə gʊ ni bwiya bʊbʊriyʊ a jiya gʊ dari yang gʊ. Yesʊ a chu nəbbəntang ka yəm bə nyam ba jiyəməng, ka sotənna niwʊ bwiya bʊbʊriyʊ, ''Yəlli, nəngnga fur də kwauwʊn. Kən yənnonən jɨni bwirai ya mʊ." ³ Kə bagi nəb mʊllarəm sʊgara bwitan jiyʊ go, ni waiwe ka bʊmən bwan." ⁴ Mənni Yesʊ ka yəm kəmarang ka jiyəng ka sʊwe go, wʊlla maki tə nəngnga kəmarangke bwirang a furna jɨnʊwʊng. ⁵ Wʊnə ga li dəndeni sʊwe mo, kən yʊno nən jɨni bwiraiya mʊ, na bo sʊwe mo gʊn na yo yom!? ⁶ Mənni na ba tə yəm to Yəlla niyʊ ka rə kʊmni a yənotən jɨni bwira ya gʊsəti,.." Ka sotən na wai ya bʊrbʊriyʊ go gʊn dəb jɨni dara mʊ na di ya kai." ⁷ Kə ni hi ya gʊnna di a kaiyəng. ⁸ Kʊlənhən a chu nyangngəng ka mənna bʊnte, ka wer Niyajiyʊwʊng, wa ne nəb tai kʊmniti. ⁹ Yesʊ wa kɨr a kɨngəng, ka chu gʊni bərə mo Matiyʊwi a chichi, nəngnga swiyer a gʊn yʊ chəmmər da dʊrən wi. Ka sotənna hangʊwi go, ''Fʊngngiye.'' Ka gʊnna fʊngngəng. ¹⁰ A jii wʊn Yesʊ jau jɨni jauri a kaiyʊ, kə bə yərə chəmmər da dʊrən tən bərə jɨni bwirayəm a be nya chiro tən məssarbə ba gəmməng. ¹¹ Farisawa chu nyangngəng, ka sotənna məssarbə go, ''Wʊla ma kə ni məssariyan jɨnu jarrə tən bə yʊ chəmmər da dʊrən tən bərə jɨni bwirayəmməng?'' ¹² Mənni Yesʊ a nwi nyangngəng ka sʊwe go, ''Bərə bwitə ləmmangngəm me bə farə ni nəbbən yənnəngngi, wʊ me bwi ləmmangngi gə fare. ¹³ Tə yəm jəggatang kankə fu, 'Me mən fau yiyatang, men tungtang a jɨni.' Me bəri bʊtangnga bə nəngnga jiya dautʊwiyəm na bukang, mənni m'be bəra bərə jɨni bwirayəm." ¹⁴ Kə məssarbə ba Yohanam a be gwan giyʊwʊng, a sʊwe go, ''Wʊlai ya ma ki nən na Farisawa nən so hi a ji a ji, mənni məssarbə ba mʊm me bə nəngngarəng?" ¹⁵ Kən Yesʊ a sotən go, ''Bə nəngnga swiyər da nattəm ba nəngnga fur də yullʊwʊn nyəngkə bweli ka kinəng ga? Mənni, fʊlla ba be wʊ bən dəbmən bwelihiyʊ. A wai jii gʊ hanjim ba so hiyʊ. ¹⁶ Merə niwʊ ba maitən dʊkkə funəng a jiya dʊkkə fiyəng, Bəraki kə funəng ba bʊrramən a kə fiyəng, bʊratang ka gəng ba li kərə jigʊwʊng. ¹⁷ Nəb bo me bə kwi hiya inabiyʊ fii a mʊra gʊltətə funi. A nəngnga nyangki, gʊltihi ba bʊssa ki inabi hi ka kwiyo, ki, gʊltə hi ka kiya bo. A ji a nyangngi, mən kwi inabi fii a mʊra gʊltəttə fii, nyang ki kən yiya waringəm ba jiyim." ¹⁸ Yesʊ ka mʊra sʊtangnga yəmma hanjiməng gʊ nigra nəbbi ka be rʊwatən nyʊini go, ''Kʊ nyang nyəngke yʊwiya miyʊ ka bwiya, mənni be na titən kang, ba nəngnga yuum.'' ¹⁹ Kən Yesʊ a gʊn a fʊng tən məssarbə ba gəmməng. ²⁰ Mənni bo kə gʊ nyʊi wa nəngnga jəttə kwʊ a jiir təsʊ kwi dʊggʊm deniyʊ, a tʊwe wa bukka Yesʊwʊng, ka məbra hatərən da dʊkkang gəngngəng. ²¹ Bəraki ka sʊwe wa furriyang go, ''Kə mənna məbra dʊkkang gəng ki, bən kwara.'' ²² Kən Yesʊ a wʊlga bwiyəng, ka chuwʊng, ka sotən go, ''Yʊwi, səng furri. Nəbbəntang ka yəm bə nyam ba mʊmməng ka kwara nən mwe." Rə kwang nyʊi hi ka kwara. ²³ Yesʊ a lauwa gwa nigra nəbbiyəng, bo kə churrə nəbbə gʊro jɨniyəm rə kʊlən sʊra yəmni rə kwani. ²⁴ Ka sʊwe go, ''Tə nəbbən sər, bəraki bwe chʊwi hi a bwiya be, bə daan duum.'' Kən hanjim a nʊ hangʊ rə nʊr da yəgtangnga sʊwʊnəng. ²⁵ A bukkən jəg kʊlənna tariyəng, ka dɨggiya tau kang ka gəng, kə bwe chʊwi hiya gʊnnəng. ²⁶ Yəmhəm ka tʊwe mʊri hi warigʊ. ²⁷ Yesʊ a kər a kɨngəng, bagi dubbə bəsʊ ka fʊng, gʊg jiir sʊwerə go, ''Bwen Daudai, nwi kʊnang ka nənnəng.'' ²⁸ Yesʊ a dɨgga tagi kaiyəng dubəhəm ka yɨga nya. Yesʊ ka sotən go, ''Kətə nəbbən yəm bə nyam to mən kamənə kʊmmi nəngnga nyang nyəngkə ga?'' Ka jautən go, ''O, Nigra.'' ²⁹ Kən Yesʊ a məbra kəmta jiyʊwʊng, go, ''A yullo gəmən nyəngkə tə nəbbən yəm bə nyam rəgəng.'' ³⁰ Kə kəmta jiyʊ a wʊmmən bwiyəng. Mənni Yesʊ ka ne sori hanjim rə kwani go, ''Kari gʊ ba nwi yəm bam be.'' ³¹ Mənni hanjim ka diya wasə yəm həm a mʊrtə warigʊ. ³² Dubəhəm bəsʊ a diyang, kən bətənnə wa Yesʊwi rə gʊ wʊ bʊwa bʊwai yəmmi wʊrə we bwirai. ³³ A bukkən jəg we bwirang, kə waiwʊ bʊwa yəmmi a sʊ yəmməng. Kʊlən bo ka mənna bʊnni, sʊwerə go, ''Lai, chʊmən bə yai jɨni yaiya mʊra Isra'lla!'' ³⁴ Mənni, kə Farisawa sʊwerəng go, ''Lai, nən kʊmni ta nidʊwa weni bwiraiyʊ gʊ jəg weni rəgi." ³⁵ Kən Yesʊ a yogo bɨtte tən mʊrtə warigʊwʊng. Nəngngatən məssarang a gana nyʊini rʊwana jiyʊwi, sʊrə yəm bə ləmmangngəm ba dʊʊtətta Niyajiyʊwʊmi, mənni bo kwararə bwatə dəndang rə bʊnaiya bwilammangngi warigʊ. ³⁶ Mənni a chu kʊlən mwamməng ka nwi kʊnnang kan jiyang, bəraki bə nong kʊnnang bo kattə ka yar. Gə be nyəra mate me rə yari. ³⁷ Ka sotənna məssarbə ba gəm go, ''Sənang ka mwam, mənni nəbba swiyerəm nən bani. ³⁸ Bərarə nyang tə nəngnga wʊlak tə rʊwatən nyʊini ya Niyajiyʊ rə sənangngi, naki" na təmgəmənne bagi nəbba sənangngəm.”