¹ Yesʊ a buwe məssarbə ba gəm kwʊ a jər bəsʊ, ka ne kumni tə ba jəg weni bwirai, na ba kwara rə bwatə dəndang na rə bə me bwitə ləmangngəm. ² Ku duntətta məssarbə ba gəm kwʊ a jir bəsʊwʊm gətte. Wʊrə jigʊwi, Saminu, (Wʊ hangʊ bərə go Bitrusi), tən Andrawʊs, chiyangʊ na Yakʊbu yəllan Zabadiyʊ, tən chiyang gʊ Yohana; ³ Filibus, na Batalamawus; na Toma, tən Matiyʊ wʊ yəre chəmmər da dʊrən ni, na Yakʊbu yəllan Alfai, na Taddawʊs; ⁴ Saminu Bakairawani, na bo Yahuza Iskariyoti wa mii yʊ. ⁵ Kwʊ a jər bəsʊwʊm bambe ngə bə Yesʊ a təmməm, ka ne soriyəng go, ''Kari bətə yɨgi a gwa bə me nəbba Israilam chi wi naki kari bətə dɨgi a bɨr da Samariyan. ⁶ A yəlo kə bətə dɨgi a ganiya matiya lira-lirai ya kaita Israilayʊ; ⁷ A ji wʊ tə ka yomi, tə warə yəm bə ləmmangəm tə sʊwe to, “Gratəta jiyʊ ka diye rə do.” ⁸ Tə kwara rə bə me bwitə ləmangngəm, tə gʊg ba bəttərom, tə tʊmən nəbbə rə bʊgabwirəm, na bo tə jəg weni bwirai. Tə yʊ a nətte, tə nəbbən a nətte. ⁹ Kari bətə tau kweyəlga rə wetəttə kəlchə-kəlchi a swani ya jɨnʊ. ¹⁰ Mənni bo kari bətə dəb swa a yom ba jɨnəm, na rə dʊte təsʊ, narə ləbərte, na rə damər, bəraki ni nəngnga swiyerri ka dautən wa jɨni jauri yang gʊ. ¹¹ A mʊra mʊrte kʊntai, rə yə kətəle yə tə dɨgi wi, tə fau ni wʊ rə yobi nyai na tə chi a gai yɨgira fʊlla bətə gʊnni. ¹² A chi bətə dɨgi a kai ki tə sʊwe to, chim bə ləmmangngəm a chiyan jɨni. ¹³ Mənni ki kai hi ka chi chim bə ləmmangngəm ki chimbə ləmmangəm ba jɨnəm a chi bwi a gwa hanjimi. Mənni a chi bo mewʊ ki, chimbə ləmmangngəm ba jɨnəm ba kagəmməne bwi. ¹⁴ Ba kwila yəgʊntangngəm na kagəmən suuwʊmi, ji wʊ tə jɨrməna bɨrhəni na bo kaihiyʊ ki, tə bamən kur a nana jɨnʊ. ¹⁵ Yəm bə nyam, kəmmən sʊgəmənne, a ko duuti bən nəngnga tən dəndeni a təm ba Sadʊmam tən Gwamrata a ji ya wai mʊri we. ¹⁶ Tə chʊ, kən təmgən nyəra mate a jʊgər da namte kiyammiyən. Bərarə nyang tə chi nəbbə rə bərsannəm nyərarə sote, na bo bə merə yariyəm nyərarə muglo. ¹⁷ Tə nəngnga den rə nəb, bəraki ba di nən jɨn a kakka nəbbə mwe duutəm, ban hanjim ba bʊgtəgən rə səmbite a gani rʊwani nyʊiniyʊ. ¹⁸ Ba di nən jɨn a kakka nəbbə mwe duutəm na kakka dʊʊbəm bəra nən me, na ba tə nəbbən yəm bə nyam a kakka jiyəng na bo a kak ka nəbbə me Yahudawam. ¹⁹ A chi ba mii gən ki, kari ji bətə sʊwei ba dagən, kə na chi wʊlai ji bətə sʊwe ki, bəraki bən nəggən ji bətə sʊwe a fʊlla hiyʊ. ²⁰ Bəraki me nən jɨn bətə sʊ yəm, mənni We Yʊlgoi ya Te jɨnʊwi gə ba sʊ yəm a nyina jɨnʊ. ²¹ Chi ba nəbbən chiyangʊ na mʊkte, te tən bwen gʊ. Bətəbi bo ba gʊntən na nəbba bʊwʊm, ba dɨg mʊkte hanjim. ²² Wʊnə ki ba kogən bərarə dʊn da miyən. Mənni wʊnə wa bifur yɨgira mwatenti ba nya yiyatang. ²³ A ji wʊ nəggən kʊnnang a bɨrdə ki, tə mwa yɨgira da kaggən. Yəm bə nyam kəmməng sʊgəməne, a yɨgira ji wʊ bətə mwarmən yogotang a mʊrta Israila, Yəlla Niyʊ ba be. ²⁴ Wʊ məsari me bə li ni məsartəni, kewe me bə li ni gran gʊ. ²⁵ Nən nyagʊ wʊ məsari a chi nyəra ni məsatəni, kewe bo nyəra ni gran gʊ. Mənni bu ni rə kaiyʊ mo Ba'alzabuba ki, bwiragʊwiyangʊ ba chi nən nyənne nyəngkə ba bu dʊntətta nəbba kaitangʊwi gərəng! ²⁶ Bəra rə nyang kari bətə nwi tatan jiyʊ, Bərəki merə ji wʊn mərai wʊ mebən wummənni, na bo merəji bara-barayu wu me bən yəmmi. ²⁷ Ji sʊgəmmən a kumma mʊriyʊ, tə sʊwe rə ko. Ji wʊtə gəmən a suuniyʊ, tə fi finang a kanta ji. ²⁸ Kari bətə nwi tate a nəbbə mʊktə bwiyəm, məni me bə dəmmən a mʊktə yuuməm. Mənni nwi tatə wai wu kari dəməntang kə ba lʊktə bwi na dəb we a mai a mʊra kərangkə kʊrəkwangngəng. ²⁹ Me mən mii betəkəlai təsʊ a ji rə bwai kwan ga? A nyangngi me kwan na jiyʊ wʊ ba yarra təm me rə yəmtang ka Ten jɨnʊwʊng. ³⁰ Mənni kin yɨr da dʊrən da jɨnən ki a kəkke bwi warigʊ. ³¹ Kari bətə nwi tatte, bəraki finitan jɨnu ka li ya kəletə mwammi. ³² Bərarə nyang nən wʊne warigʊ wa bʊ bukka miyəng a kakka nəbbəngngi, mə rə kinəng bən bʊ bukka gəng a kak ka Te miyʊ wʊ ka jiyʊwʊng. ³³ Mənni wʊnə wa nwi bʊriya miyʊ a kak ka nəbbəngngi, mərə kinəng bən nwi bʊriyan gʊ a kakka Te miyʊ wʊ ka jiyʊ. ³⁴ Kari bətə lʊng to be nən chim bə ləmmangngəm a gʊsəte. N'be bə mo naki be rə chim bə ləmmangngəm, n'be nən dampo. ³⁵ Mənni be mo na ni tən te a yullo niya kaggi yang gʊ, bwe chʊwi tən neen gʊ, nyʊi tən nakanni yang gʊ. ³⁶ Nəbba kaggəm ba niyəm ba chi nəbba kaitan gʊwʊm. ³⁷ Wa yotənda yəllangʊ na yʊwiyangʊwi a dautən buwa yullo winəng. ³⁸ Wa dəbbə riyang yʊwarang ka gəng na fʊngngyei ki, a dautən bʊwe a yullo winəng. ³⁹ Wʊnə wʊ farə yuum ba gəmmi, ba bʊna. Wa bʊna yuum ba gəm bəra nən mi ba nya. ⁴⁰ Wa yəggən ni, ka yʊwi, wa yʊwiyʊ ka yʊ wa təmmiyei. ⁴¹ Wa yʊwe wa yʊwe yəm a gwa Niyajiyʊwi bəraki ni yʊwe yəm a gwa Niyajiyʊwiyəng, ba yʊ nətteta Ni yʊwe yəmmi a gwa Niyajiyʊwi, Wa yʊ ni wu təm ji nyai, bəraki bə təm ji nyaiyəng ba nya nətteta ni təm ji nyai. ⁴² Nən wʊnə wa ne kwan a mʊra bətəm bə kətəl-kətəlləmi, kənna nʊ chʊlle hi lattətiyʊwi a no ki, bəraki hangʊ ni məssatəni, bə nyam, kəmmən sʊgəmməne, me ba bʊna nəttətang gʊ.''