¹ A bʊkkə Yesʊ a mwarmən wʊtangnga su a məssarbə ba gəm kwʊ a jir bəsʊwʊməng, ka dʊ gaiyəng, na ba gə məsatən na gə wau yəm a mʊrtan jiyʊ. ² A ji wʊ Yohana nwi nyəngkə ka jarəməng, a jiya swiyer də Yesʊ nəngngarən,ka təm məssarbə ba gəməng. ³ Nya tə sotənna hangʊwi to,''Nən mwe wʊ mən beri ga, bo nən kwi kəmta gʊ ga?'' ⁴ Yesʊ ka nga, a sotənna hanjim go,''tə ya tə sotənna Yohannai ji tə chʊwi, rə ji tə nwiyʊ. ⁵ Dubbe kə yərə chʊtang, jwagbe ka yore, nəbbə rə bʊgabwirəm ka nya tʊmməntang, bə me bə nwi yəmməm ka nwi rə yəm bo, ba bətəro-bətəroiyəm kən gʊg a kauwe bwi rə yuum, bə farəm kən wautənnə yəm bə ləmmangngəm. ⁶ Dəgtangnga kang a gwa wʊ me bə təl na bəra nən mi." ⁷ Nəb bamba diya tau jʊwiya jiyʊwʊng, Yesʊ ka sʊ sotən yəm a kʊlən a jiya Yohannai, sʊwerə go,'' Tə yɨgi tə jəga wʊlai a sei- yɨr də səmba məgarən ga? ⁸ Mənni tə yɨgi tə jəga wʊllai-Ni wa mai dʊtettə rə məksaiyʊ ga? Nən nyang, nəbbə mai dʊtettə rə məksaiyəm bə chiro a kaina dʊʊbi. ⁹ Mənni tə yɨgi tə jəga wʊllai, ni yʊwe yəmmi ga? Nən nyang kəmmən sʊgəmənne, ka li ni yʊwe yəmmi. ¹⁰ Waiwe nən hangʊ wʊ mʊla jiyan giyʊ, chʊ, kəmmən təmre nii təmri ya miyʊ, wʊ ba suwa a kak ka mʊngngi, wʊ ba yəngna nən jʊwi a kak ka mʊngngi. ¹¹ Kəmmən sʊggəmən yəm bə nyam, a mʊra bʊwung ka wʊtəməng, me rə wa li Yohanna nəngnga batismai rə grati. Mənni ni wa li yarməntang a mʊra dʊʊte ta jiyʊwi kalli hangʊ re grate. ¹² A sʊwe wa kotən Yohanna nəngnga batismai berə kʊ, dʊutə ta jiyʊ wa jiya bʊgtətangnga bwi, nəbba yariyəm bə yʊ nən kʊmni. ¹³ Mənni nəbbə yʊwe yəmməm na rə duutə warigʊ, ka sʊ yəm yʊwerəm bera fʊlla Yohannai; ¹⁴ bo, kə bətə yʊ ki, waiwe nən Iliya wʊ ba bei. ¹⁵ Wʊ ka rə sunniyʊ masi a kautən suu. ¹⁶ Bən bɨngo bam daam bambe nən wʊlai? Nyəra rə bətəbi bə nəngnga yʊta bandʊwam, ba chiro buwowʊ bwitəm. ¹⁷ Sʊwerə go, kənən gʊ gəmən lete, tə yəlbə yəllang, kənən ti bʊni, tə ti bə wi. ¹⁸ Mənni Yohanna be me bə jarrə mwan də fʊm-fʊmən, bo, me bə noo hiya inabiyʊ. Kən sʊwe mo, 'Karə weni bwirai.' ¹⁹ Yəlla Niyʊ ka be jarre, nore, kən sʊwe mo, 'Chu ni rə sʊwi, ni yi chʊwai, chʊgo ni yərə chəmmər da dʊrən ni na rə nəbbə rə jɨni bwiraiyəm!' Mənni bərsan mən yəmma a gwa swiyer dan gənni. ²⁰ Kən Yesʊ a sʊ mwetən yəmma bɨtətta nəngnga swiyetəttə kʊntai tang gʊwʊm wi, bəraki hanjim a bu bə kang. ²¹ Ji ya kʊnanngngi deni a mwi Korasinu, ji ya kʊnnangngi deni a mwi Bethsaida! Na lʊngngo kən nəngnga swiyer da mənnatangnga bʊni a Taya na Sidon, nyəngkəng nəngnga gəməng gərəng ki, na nʊ ka bukang kʊni a miya gʊsətte a swara bʊgəm. ²² Mənni ba chi rə dəndeni a Taya tən Sidon a ji wʊ bən nəngnga duuti a ligən. ²³ Mwe Kafarnahum, mən kəmma mo bən nən grate yɨgira ji ga? O o, bən səggən a təm yɨgira gwa kʊnnangngi. Na lʊng go kən nəngnga yai jɨniya mənatangnga bʊniyʊ a mʊra Sodom ki, na nʊ we berə kʊ. ²⁴ Mənni kəmmən sʊgəmənne bən nəngngatən dəndəni a Sodom a ligən a ko duuti.'' ²⁵ A wai jii we Yesʊ ka sʊwe go, kəmən werənne, Tei, Nigra jiyʊ tən təmmi, bəraki kən baramən na nəbbə rə bərsanəm na barə yəmtangəm. Kən wumtənna bə mesatən bəm, nyərarə beta bətəbiyəm. ²⁶ Nən nyang, Tei, yai jɨni ye ga dautən we a gwa mwiyʊ. ²⁷ Kən nii jɨni warigʊ a gwa Te miyʊ wi; a nyangngi merə wa yəm Yəlli hi yʊ nyərarə Te me rə wa yəm Te hiyʊ, nyərarə Yəlliyʊ a dəmənna Te, na rə warigʊ wʊ Yəlli ya fau go gə nʊngngi. ²⁸ Tə be a gwa miyʊ, waringəm ba jɨnəm bə tə no kʊnangngəm, tə gənne rə nəggənna jɨniyʊ,mə rə kinəng bən nəggən gəri. ²⁹ Tə dəb riyang yʊwarang kamiyəng na tə məsaməna mi, bəraki mənnən səgtang ka dʊrəng, rə dəndenni a yobiya furiyʊ, yɨgira jiivwʊ bətə nya gəri a mʊra furna jɨnnʊwi. ³⁰ Mənni riyang yʊwarang kamiyəng kə dəndənəng jɨna miyʊ bo merə nəggən."