¹ A wai fʊlla, Yesʊ ka di ya ko gəriya Yahudawai, ka tʊwa mʊri ya kʊna kwaiyʊ. Məssarbə ba gəm ka nwi jʊn, nyangngəng ka sʊ bʊra dʊtəta kwaiyʊ mənni jarre. ² Mənni Farisawa chʊ hanjiməng, ka sotəna Yesʊwi go, ''Chʊ, məssarbə ba mʊm kə təm ji soriya dang ko gəriya Yahudawai." ³ Kən Yesʊ a sotəna hanjimi go, ''Tə ke bə ji Dauda nəngngai ga, a fʊlla wa nwi jʊnni na katən nəbbə barəmmi ga? ⁴ Nyəngka dɨgiya kaita Niyajiyʊwiyəng, na jau mwan də fʊm-fʊmmən da kaita Niyajiyʊwʊn, də sori a dang hangʊ na nəbbə bə ka kinəm rə jautangngi, mənni Nəbbə tʊng jɨni a chəriya Niyajiyʊwʊm dang nən ji bə sori a ngatən go jauwʊng. ⁵ Tə ke bə a mʊra sori ya sʊwe go a ko gəriya Yahudawai, Nəbbə tʊng jɨni a chəiriya Niyaiyʊwi bə ka a kanda nyʊini rʊwaniyən a yamən a ko gɨrmənə gəri, mənni a chi da ban hanjim a təm bə jɨni bwirai ga? ⁶ Mənni kəmən sʊggəmən mo, gʊ wa li kaita kanda nyʊini rʊwani rə granni ka gwe. ⁷ Lʊngo kətə yəm ji waiwe jəggari go "Kən li fautang a bʊmte a li tʊngtang a jɨni a chəriya Niyajiyʊwi,' me na bətə nəngngatən duute wʊ me bə təm ji bwirai. ⁸ Mənni Yəlla Niyʊ gən Nigra wa ko gəriya Yahudawai.'' ⁹ Kən Yesʊ a dʊ gai a dɨgiya kanda rʊwani nyʊini ya jiyʊwʊng. ¹⁰ Go nyəng ka gʊ ni wʊ kang ka gəng a bʊbʊriyʊ, kə Farisawa a gʊl Yesʊ sʊwerə go, ''Sori ka nga go nəngnga kwaratang a ko gəriya Yahudawai ga?'' Go na ba tə kəba hangʊ a ji ya təmtang a ji bwira. ¹¹ Yesʊ ka sotənna hanjimi go, "Nən wʊna jɨnʊ wʊ ka rə maa kwan, mənni maahi ka yar a bwa kə wʊlʊlong a ko gəriya Yahudawai mənni me ba tawe a jəggei? ¹² Ba nəngnga go nyəne ki kən bɨngo kalʊri ya niyʊ tən maa! Bərarə nyang ka dautən we nəngnga ji nya a ko gəriya Yahudawai." ¹³ Kən Yesʊ a sotənna ni hiyəng, ''Yage kang ka mʊng.'' A wʊ kang go nyəng, kanghəng ka kwara nyəra kə kinəng. ¹⁴ Mənni Farisawa ka jɨrro tari ka sʊ dɨgga jɨni bwirai a jiya hangʊwi. Farə nyəngkə hanjim ba mʊktə gərəng. ¹⁵ Yesʊ a yəm yai jɨniyəng ka dimən a gaiyəng. Nəb mwam ka fʊng hangʊ, ka kwara nən hanjim warigʊ. ¹⁶ Ka bautən jiir a ban hanjimi go kari ba sotənna gʊ. ¹⁷ Naki a rii ji wʊ sʊwe a gwa Ishaya ni yʊweri mo, ¹⁸ Chʊ, kewe miyʊ wʊn samən-sauwiyʊ, wʊ yotən dai, wʊ we miyʊ nwi ləmmang ka gəngngi. Bən titən we miyʊ a jiya gi, ba sʊ dʊʊtətta miyʊ a gwa nəbbə me Yahudawam. ¹⁹ Me ba nəngnga bʊri na gʊg jiir rə kwani, merə ni wʊ ba nwi jiir da gən a jʊtti. ²⁰ Me ba kəra jəmang ka chʊchʊwiyəng; Me ba mʊktə gʊnggor da kərangngən, də ka diye rə do a bwiyatangngən, ba be rə dʊʊte a ji ya jautang a kak, ²¹ bərarə nyang nəbbə me Yahudawam ba nya titang a fʊri a dʊn da gən." ²² Mənni gʊ ni n'dʊ, na mɨi bo, karə we bwira, kən be gəra gwan Yesʊwi. Ka kwara rəge, jiya fʊngngei ni hi ka sʊ yəm, ka chʊ. ²³ Kʊlən warigʊ ka mənna bʊni, a sʊwe go, ''Waiwe Yəllan Dauda ga?" ²⁴ Mənni Farisawa a nwi wai jiya mənatangnga bʊniyʊwʊng, ka sʊwe go, ''Ni hi waiwe me bə jəg səmbatə bwirai rə kʊn me rə ngatang ka Ba'alzabʊ nidʊwa səmbatiyəng." ²⁵ Mənni Yesʊ ka yəm kəmmarang ka jiyəng, ka sotənna hanjimi go, ''Tənə dʊʊte ta wʊtəgo nəngnga kak rə bwiyangʊwi me ba sii, bɨr tən kaita wʊtəgo bwiyangʊwi me ba sii. ²⁶ Kən Chetan ba jəg Chetan ki ka wʊtəgo bwi kag rə dʊr da gən. Ba nəngnga go nyənne ki tai dʊʊteta sii? ²⁷ Ki mən jəg səmbate rə kʊmni ta Ba'alzabubai ki, mənni yəlləm ba jɨnəm bə jəg hanjim a gwa wʊni? Bərarə nyang ji ba chi gəmən nəbba duutəm. ²⁸ Mənni kəmən jəg səmbate bwirai rə We Niyajiyʊwi ki nən nyang dʊʊte ta Niyajiyʊwi ka be gəmən. ²⁹ Mənni ba nəngnga go nyənne ni a dɨggi a kaita ni rə kʊmniyʊ a yimmən jɨni a si bə kak a bʊwa ni hi? Kə mənni ba dəmən a kʊmən jɨni a kaitangʊwi. ³⁰ Wʊ nən me kini, bə nəngnga kak nən me, wʊ bo me nən kʊra kini bə wəsəla-wəsəla. ³¹ Bərarə nyang kəmən sʊgəmənne, wʊnə ji bwira na təmtang a kəmmarang kə menən gəng, bən yɨnotənna ni, mənni bumən We Yʊlgoi ki me bən yɨnotən. ³² Nən wʊnə ni wa sʊ bwan də bwiran a dʊra yəlla niyʊwi, bən yɨnotən. Mənni wʊnə ni wa sʊ bwan də bwiran a dʊra We Yʊlgoiyʊ me bən yɨnotən a gʊsətəttə kʊwi na tə beri. ³³ Dəg riyangnga chi kə nyang, na betangʊ a chi yə nyai, dəg riyang a yullo kə bwirang na betangʊ a yullo yə bwirai, mənni mən yəm riyang a betangngʊ. ³⁴ Jɨn beta sooti, naki tən nəbbə rə bwiranəm, ba nəngnga go nyənne ki tə sʊ ji nyai? Bəraki ji ya ri fʊriyʊ n'gʊ nyʊii sʊweri. ³⁵ Ni nya bə sʊ ji nya wʊ ka furiyangʊwi, ni bwira rə kəgang bə sʊ ji bwira ka furiyangʊwi. ³⁶ Kəmən sʊgəməne a ko dʊuti nəbba jəgga bwantəttə merə finiyʊ ta sʊwei. ³⁷ A jiya bwantəttan jɨnʊ, bən jəggən, a gwa bwantəttan jɨnʊwi bo bən tigən." ³⁸ Bagi nəb mʊlarəm tən Farisawa ka nga a sotənna Yesʊwi, ''Ni Məssari, nən fau no nən chʊ jiya mənatangnga bwiyʊ a gwa mwiyu.'' ³⁹ Kən Yesʊ a nga sotənna hanjimi go, ''Daam bə bwiram na tangngər da taltən bə fau go tə chʊ gʊji a mənatangnga bʊniyʊ. Mənni me rə gʊji bən nʊngngi, ba li wa ni təmri Yʊnana ni yʊweriyʊ. ⁴⁰ Mənni nyəng kə Yʊnana nəngnga kotə tə bwanbi rə kʊm tətə bwanbi a fur da laanəng, nən nyang bo Yəlla niyʊ ba nəngnga kotə tə bwanbi rə kʊmtətə bwanbi a təm a mʊri. ⁴¹ Nəbba Ninebam ba sira a ko duuti tən bam daam be mənni ba ti hanjim. Bəraki ban hanjim ka bu kang a jii wa nwi yəm waurəm ba Yʊnanami, mənni chʊ, wa li Yʊnanai ka gaiwe. ⁴² Nyʊi dʊ a tʊwangngi ba gʊn tən nəbba dan daam bəm a ti hanjim. A diyewa gʊ təmma jiwi naki gə nwi dəməntang ka Solomonəng, chʊ bo, wa li Solomoni ka gwaiwe. ⁴³ A jiwʊ we sirəmmi a dʊ niyʊ ki, ka sʊ yɨgira gani me hi wi farə gwa gəriyʊ mənni a nyabe. ⁴⁴ Go nyəng ki ka sʊwe go mən kaubwi a kaita miyʊ tən jərewi. A kauwebwiyəng a nya kən yɨnomən kaihi a dʊ Yʊlgoi. ⁴⁵ Ki ka kaubwi a berə yagi weni bwirai nyʊibi, ba li hangʊ rə bwiranəm, ki warigəm banjiyəm a be a chi a gaiyəng. Ba chi mwatənta nihiyʊ balli sʊtang rə bwiran. Ba chi nyang a bam daam bə bwiram be." ⁴⁶ A fʊllan Yesʊ sotən yəmma kʊlənni, neeng gʊ tən chəttetangngʊ ka sira a tari farə go, tə sotən yəm. ⁴⁷ Kə gʊ a sotən go, ''Jəga, nemʊ tən chətəttamʊ ka sira tari, farə go tə sʊnnən yəm." ⁴⁸ Mənni Yesʊ a nga a sotənna hangʊ wa sotəni, ''Nən wʊne gən nee miyʊ mənni bo chətəttamiyʊ nən ba wʊne? ⁴⁹ Ka wʊ kang ka gəng a nʊngla məssarbə ba gəm, ka sʊwe go, "Jəga nee miyʊ ngwe tən chətətta miyʊ. ⁵⁰ Wʊnə ni wʊ təm jiya Te miyʊ wa jiyʊwi, ngən chiyamiyʊ tən chʊchʊwi ya miyʊ na nee miyʊ.