¹ Ako waiwʊrere Yesʊ ka jəre a kai ka chi a kɨng ka wimangngəng. ² Nee nəbbi mwam deni ka kawʊr hangʊ, go nyəng ka dɨgi a bontəlong ka hiyəng ka wimangngəng. ³ Kən Yesʊ a sotən jɨni mwam rə dəgtang ka yəmməng. Ka sʊwe go, ''Gʊ ni warə jɨniyʊ, ka di warə jɨni. ⁴ A nəngnga waurang go nyəng bagi dʊʊm ka kwiyo a jʊwi, go nyəng kəlete ka be jau. ⁵ Bagi dʊʊm a kwiyo a ji ya wete, gʊ me təm wi. Rə kwa-rəkwa go nyəng ka ji, bəraki təm həm me wʊləllo. ⁶ Mənni ko gwiyeng, ka həllo ka bʊrrəng bəraki a nəngnga be niite. ⁷ Bagi dʊʊm a kwiyo a mʊra tʊte. Mənni tʊti hi ka gra a məra. ⁸ Bagi dʊʊm ka kwiyo təm bə nyam ka gwal, gʊ ka nəbbən be kwan, bagi furtə nukkʊn, bagi bo furtə bwanbi. ⁹ Wʊ karə suniyʊ a nwi." ¹⁰ Məssarbə ba gəm ka be a sotənna Yesʊwi go, ''Wʊla ma ki mən sotən yəmma kʊlən rə dəgtang a yəməng?" ¹¹ Yesʊ ka nga a sotənna hanjimi go, ''Kən nəggən sər tə yəm dəgriya dʊʊtə ta jiyʊ, mənni ne bən hanjim. ¹² Bəraki wʊ ka gəri, bən kaubwi yəgtən mwam. Mənni wʊ me gəri, hang wʊ bani ka rəgi bən yəmən. ¹³ Ji ya nəngnga kən sotən yəm rə dəgtangngi; Nən kwini a chʊtang me bə chʊre, bo nən kwini ka nwitang me bə nwire, bulləm a jəgga. ¹⁴ A gwan hanjimi yəm yʊwerəm ba ni təmri Ishayam ka ri bwi, ba sʊwem go, ''A nwitang bətə nwi, mənni me bətə jəgga; a chutang bo, bətə chu, məni me bətə jəgga. ¹⁵ Bəraki furniya nəb bambi ka nəggən, ka kʊssa nwitang, bo, hanjim ka məra kəmta jiyʊ, na ba kari bətə chu rə kəmta jiyʊ, bo ba nwi rə suna jiyʊ naki tə jəgga furna jiyʊ, na ba kauwe bwi, na kwara nən ji.' ¹⁶ Mənni kəmta jɨnʊ yə dəgtən kangngi, bərəki ka chu, nyang bo suniya jɨnʊ ka nwi. ¹⁷ Bə nyam kən sʊgəmən, nəbbə yʊwe yəmməm tən nəbbə təm ji nyam mwam kəna fau go tə chu ji tə chuwi, mənni a chube. Kəna fau go tə nwi ji tə nwiyʊ, mənni a nwi be. ¹⁸ Tə kau suu a dəgtang ka yəmməng ka ni warə jɨniyəng. ¹⁹ Gʊ ka nwi yəm ba dʊʊtətta jiyʊ mənni na jəgga be ki, mənni wʊ bwira ka be a yəmən ji wau a fʊri yangʊwiyəng. Bam be gən dʊʊm bə wau a jʊwiyəm. ²⁰ Bam bə wau a jiya lainiyəm, gə ni wa nwi yəm na yʊ rə kwa rə kwa rə bwiləmriyʊ, ²¹ A nyangngi, a nəngnga bə nətte ka bi fʊri a fʊlla bani. Mənni a ji wʊ switangnga bwi tən kʊnang a gʊnne bərarə bwanəng ki ka təlna rəkwa-rəkwa a yarəng. ²² Bam bə wau a mʊra tʊttəm, gə wa nwi yəmhəm, mənni jɨnna gʊsəti rə jʊllai ya gənnai ka kʊm bwanhən, go nyang a dəmən ba nəbbən bete. ²³ Bam bə wau a təm bə nyaməm, n'gʊ wa nwi bwanhən na jəggai. Waiwe gə wa nəbbən betə mwammi, bagi ka nya be kwan, bagi furtə nukkʊn bagi furtə bwanbi." ²⁴ Yesʊ ka kaubwi a ne dəgtangnga yəm sʊwerə go, ''Bən bɨngo dʊʊtə ta jiyʊ rə gʊ ni wa wau dʊʊm bə nyam a kʊwi. ²⁵ Mənni a bukkə nəbba dara dʊmniyəng, ni a kagi a gʊ kabe wautən kʊlli a mʊra sak̇əlləm ka di yom ba gəm. ²⁶ Jiwʊ bara kwaiyʊ jiyerəng ki kʊlli a jiye rə kəgangəng. ²⁷ Keweta ni rə kuwi ka birawa sotənna hangʊwi go, 'Nigra, balli men dʊwʊm bə nyam gəbən wau a kuwa mʊwʊm ga? Nəngnga mo nyənne ka chi rə kʊlliyəng?' ²⁸ Ka sotənna hanjim go, 'Ni a kakgi a nəngnga wai jiwe.' Kə keweti a sotən go.'' Mən fau mo nən yəgi nən bʊtomən ga?' ²⁹ Ni rə kuwi ka sʊwe go, 'O o. Kari ba chi a ji tə bʊtomənnə kʊlliyʊ ki, bən butomən rə səkəlləm. ³⁰ Tə dʊ waringəm ba jiyəm a gra kin yɨgira fʊlla sənangngi, a fʊlla sənangngi bən sotəna nəbbə harrəm, ''Tə bʊtomən kʊllihi rə jigʊ na bʊwa halte na tʊng, mənni kʊra sakəlləm na kwi a bənniya miyʊ.'"" ³¹ Kən Yesʊ a kaubwi a sotən bagi yəm dəgrəm a hanjimi go, ''Bən bɨngo dʊʊtətta jiyʊ rə beta mʊstardi, wʊ gʊ ni a wau a kuwangʊ wa kawʊr-kawʊrriyʊ. ³² Bam dʊʊm bambe ga li kətəlerə-gʊwi a dʊʊm warigʊ. Mənni a bukka gərang ki, kali ritən dəgga ku kawʊr-kawʊrriyʊ. Ka yullo riyang kə kəletə nəngnga kwilotʊwʊng.'' ³³ Yesʊ ka kaubwi a yəgtən yəm dəgrəm. ''Bən bɨngo dʊʊtətta jiyʊ rə bari wʊ nyʊi ka dəgtəna miyəm tasang tə bwanbi ki ba dəgga fuga." ³⁴ Yai jɨni yaiye warigʊ Yesʊ a sotənna kʊlən a yəm dəgrəm; Me rə ji wa sotənna hanjimi me mʊra yəm dəgrəmmi. ³⁵ Waiwe a chi bwi gona ji ni yʊwe yəmmi a sʊwei a chi yəmbə nyam, go, ''Bən wʊmən nyʊiya miyʊ rə yəm dəgrəm.Bən sʊwe jɨniya kʊllu-kʊllu biyu a dəbbe wa ji mʊ təmmi." ³⁶ Kən Yesʊ a dʊ kʊlən hənəng ka dəgga kaiyəng. Məssarbə ba gəm ka be a gwan giyʊ ka sʊwe go, ''Jəgga bəmən yəm dəgrəm ba kʊlli wʊ ka sei hiyʊ." ³⁷ Yesʊ ka nga, a sʊwe go, ''Hangʊ wa wau dʊʊm bə nyami Yəlla niyʊ. ³⁸ Sei hi bo, gən gʊsəte; dʊwʊm bə nyam bo, gəng bətəm ba dʊʊtəm. Kʊli hi bo, bətəm ba niya kagiyəm. ³⁹ Niya kaggi wa wauwi nən Chetan. Sənanghəng bo, mwatənta gʊsəti, mənni nəbbə harrəm weni təmri. ⁴⁰ Bərarə nyang, nyəngkən kʊra kʊlli hi na tʊngnga kərangəng, ba chi nyang a mwatənta gʊsəti. ⁴¹ Yəlla Niyʊ ba təm weni təmriyangʊ, mənni ba kəramən jɨni dəg jɨni bwiraiyʊ warigʊ a mʊra dʊʊtəttan gʊ, na bə ka təm swiyer də bwiranəm. ⁴² Ba kwi hanjim a mʊra kərang kə kweiwʊng, gʊ ba tiro witə rə kərsətangnga nungti. ⁴³ A wai jiwe nəbbə təm ji nyam ba yən bwi nyəra rə ko a dʊʊtətta ten jiyʊwi. Wʊ ka rə suuni a kau suu. ⁴⁴ Dʊʊtətta jiyʊ nyəra rə gənna bara a kuwi. Ni ka nya ka barang, ka di a mʊra bwiləmri, ka mii ji kagəri warigʊ ka sʊte kuhiyəng. ⁴⁵ Nyang bo, bən bɨngo dʊʊtətta jiyʊ rə ni rə jɨnna kaniyʊ wʊ farə wetəttə kəlchə-kəlchiyʊ. ⁴⁶ A nya wer də kəlchi-kəlchən də nyan din nəng ka diya mii jɨni ka gəri warigʊ a sʊtang. ⁴⁷ Nyang bo, bən bɨngo dʊʊtətta jiyʊ rə gartəng kwiya a wimangngi, ka kʊra jɨni rə yuummi dəngdang. ⁴⁸ A riyəng, nəbbə tʊwarəm ka wʊwe wa nyʊiya wimangngi. Ka chi a samən yə nyai a kʊtoni, ka kʊssərə yə bwiraiyəng. ⁴⁹ Ba chi nyang a mwatənta gʊsəti. Weni təmri ba be a jəgmən bə bwiram a mʊra bə nyam. ⁵⁰ Bən kwi ba hanjim a kərang kə kweiwʊng, gʊ bən tiro witə rə kərsətangnga nungti. ⁵¹ Kətə jəgga yai jɨni yaiyə warigʊ ga?" Məssarbəhəm ka sotənna hangʊwi go,''O.'' ⁵² Yesʊ a sotənna hanjimi go, ''Bərarə nyang wʊnə ni mʊlari wa chin bwira dʊʊtətta jiyʊwi, a chi nyəra nirə kaiyʊ wa jəge nu fʊni na wʊ fi a gʊ tiriyangʊwi.'' ⁵³ A jiwʊ Yesʊ a mwarmən yəm dəgrəmmi, ka dʊ gaiyəng. ⁵⁴ Kə Yesʊ a dɨggi a təm ba gəm ka nəngnga tən məsarang a nəb a kantətta nyʊini rʊwaniyəng. Bərarə nyang ka nəngnga mənnatangka bʊniyəng sʊwerə go,''Ni waiwe a nya bərsan tən nʊngtang ka jɨnna mənatangnga bʊniyəng a le? ⁵⁵ Ni wai wʊ me Yəlla ni sʊla jɨniyʊ wʊ ga? Mənni nee menə gə wʊ bərə mo Mariyamʊwi ga? Mənni chəttə me nən Yakʊbu na Yʊsʊfu na Siman na bo Yahuda ga? ⁵⁶ Me chəttə chʊwi tang gʊ waringəm ba jim nən ka kinnəm ga? Hangʊ a nya wʊ jɨni yaiye warigʊ a le?" ⁵⁷ Ka lʊktə furni bəra nəng ge. Mənni Yesʊ ka sotənna hanjimmi go, ''Ni wʊ yʊwe yəmmi me bə nya grate a təm ba gəm na mʊra kaitang gʊ." ⁵⁸ Mənni bo a nəngnga bə jɨniya mənatangka bʊniyʊ a gai bərarə bʊnaiya nəbbəntang ka yəm bə nyaməm ba jiyəm.