¹ A fʊlla waiwe, Hiridʊs wa tau təmmi ka nwi yəm ba Yesʊwʊm. ² Ka sotənna kewetang gʊ go, ''Waiwe nəng Yohana nəngnga batismai; ka gʊn a bwiyate. Bərarə nyang tai kʊmni te gətə nəngnga swiyer an giyʊ.'' ³ Bəraki Hiridʊs ka tau Yohana, a bʊwa a dəgga jarəm bəra nən Hirudiya, nyʊiya chiyangʊ Filibusi. ⁴ Ka sʊwe go, ''A dautən bʊwe n'dəb a yullo nyʊiya mʊ." ⁵ Hiridʊs na ba mʊkte mənni bə nwi tata nəbbi bəraki hanjim a dəb hangʊ nyəra ni yʊwe yəmmi. ⁶ Mənni na ko n'bu Hiridʊsi, yʊwiya Hirudiyai ka yəl yəllang ka ləm bwi hangʊ Hiridʊssəng. ⁷ Ka nəngngatən butang a yəm rə bʊni sʊwerə go, a chəlla ji fari, kə na nʊ wʊlai ki gəbə ne. ⁸ A bukka yʊ bautang ka jiirəng a gwa neeng gʊwi, ka sʊwe go, ''Ni dʊdda Yohana nəngnga batismai a ji a kassi." ⁹ Nidʊ ka kʊm rə chəllan da gən. Mənni bərarə bʊnitəng hangʊ a bauwi, na bərarə nəbbə ka kin a wai jiyəm, ka nəbbən sori go nəngnga nyəng ka sʊwerə gəng. ¹⁰ Ka təm mwemənne dʊr da Yohanan a mʊra jarəməng. ¹¹ Kən bətən rə dʊr hən a mʊra kassiyəng, kən ne bwe-chʊwihi, ka yɨgi rə dʊr hən a gwa neeiyəng. ¹² Kə məssarbə ba gəm a be a dəb libotan gʊ a diya dəggəng. A bukka nyangəng ka diya sotənna Yesʊwiyəng. ¹³ A bukkə Yesʊ wa nwi nyangəng ka dɨgiya-bontəlong ka hiyəng yɨgiri gʊ ka me nəb wi. Kʊlən a nwiyəng ka fʊngrə nanni a bɨtəhiyəng. ¹⁴ Kən Yesʊ a be kak ka jiyəngəng, kə chʊre kʊlən mwam a kʊra bwi. Ka nwi kʊnnang ka jiyəng ka kwara rə bə merə bwitə ləmməngəm a mʊra jiyʊwʊng. ¹⁵ 5 Yʊ a mang, kə məssabə ba gəm ka be sotən go. ''Gai we səi, kum ka ma. Yo kʊlən da kʊra bwiyən na diya mʊrtiye, na sʊtatən jɨni jauri a dʊtəttan jiyʊ.'' ¹⁶ Mənni bo Yesʊ a sotən go, ''Di tang ka jiyəng merə fini, tə ne ji ba jauwi." ¹⁷ Kə hanjim a sotən go, ''Nən kanənnə mwantəttə fʊm-fʊmi tə nʊ rə laatə təsʊ bwigi." ¹⁸ Kən Yesʊ a sʊwe go, ''Tə be mənne gəre.'' ¹⁹ Kən Yesʊ a dəg kʊlən go chiro ji a yirəng. Ka dəb mwantə tə nʊ rə laatə təsʊ. A jəga jiyəng, ka dəgtən kangngəng ka kətəlang a ne məssarbəng. Kə məssarba ne kʊlənnəng. ²⁰ Warigʊwa jiyʊ ka jauwa rira, ka dəb kəsəlanta mwanti tən laati, kəlte kwʊ a jər təsʊ a riro. ²¹ Ba jʊwam ka lau nyəra nəbbə barəm netəttə nʊ, me wʊtəm rə bətəbi a mʊra keranghəng. ²² Rə kwa rə kwang hangʊ ka dəg bwiranəm a dɨga bwangtəlong ka hiyəng go na yau wa kagi kɨng na gə balle, na ba gə yo kʊlən. ²³ A bukka yo kʊllən a diyang, ka gwiya jiya bang go na gə rʊwa nyini. Yʊ a mang, ka gai gən kwan. ²⁴ Mənni bontəlong ka hiyəng ka jʊgər da wimangngəng. Mənni rə bwaiyərra tautang bəraki kʊrmong ka hiyəng tən səmba bə nəngnga kag nən hanjim. ²⁵ A jii wʊ bwanbiyʊ a yauwi swiri rə jigʊwi Yesʊ kə betəna hanjimi a jiya wimang. ²⁶ Məssarbəhəm a chʊ hangʊ yowʊra a jiya hiyəng, ka nwi tatə sʊwerə go, ''Chəngʊ,'' ka mau wʊri rə tate. ²⁷ Mənni Yesʊ ka sotən yəmma hanjimi rə kwa go, tə nəngnga kʊmni ta fʊriyu! Nən me! Kari bətə nwi tate.'' ²⁸ Kən Bitrus a ngatən a sʊwe go, "Nigra, kə nən mʊ ki dəgi n'be gwa mwiyʊ a jiya hi." ²⁹ Kən Yesʊ a sʊwe go, ''Be'.' Kən Bitrus a jɨrməna bontəlong ka hiyəng a yoyom a jiya hiyəng yɨgira a gwan Yesʊwi. ³⁰ Mənni Bitrus a chʊ səmbang ka nwi tate. A sʊ dɨgira hiyəng ka mau wʊri a sʊwe go, "Nigra, jəgi!" ³¹ Re kwang Yesʊ ka wʊ kang ka gəng a tau Bitrusəng ka sotən go, mwe nəbbəntang a yəm bə nyam a yarmənni, wʊlai ya ma ki mən nəngnga jʊggərəng. ³² A bukkən Yesʊ tən Bitrus a dɨgiya bontəlongəng kə səmba dʊ məgatangnga bontəlongəng. ³³ Kə məssarbəm bə ka bontəlongəm a ne gratə Yesʊwʊng sʊwe rə go, ''Bə nyam mən Yəlla Niyajiyʊwi.'' ³⁴ A jiwʊn hanjima yauwʊng, ka lauwe wa təm ba Janisaratan. ³⁵ Nəb ba gaiyəm a yəmme Yesʊwʊng, ka təm yəm yɨgira kɨgngər warigʊwʊng, ka hanjim betəne rə nəb ba bwara bwaraiyəm warigʊwʊng. ³⁶ Ka chəlla hangʊwʊng go natə məbra nyiya dʊgkan gəngngi, mənni bə məbra hangʊwʊm ka kwara warigʊ.