¹ Kə bagi Farisawa tən nəb mʊlarəm a diye wa Urshalima a be gwan Yesʊwiyəng. Ka sʊwe go, ² "Wʊla ma ki məssarbə ba mʊm yaməna daam ba nəbə graməmməng? Bəraki me bə yərramən kana jiwʊ ka dʊ a jau jɨni jauri." ³ Ka nga sotənnna hanjimi go, ''Bo wʊla ma ki tə yaməna soriya Niyajiyʊwi bərarə yobiyan jɨnʊwʊng? ⁴ Bərakə Niyajiyʊwa sʊwe go, 'Ne gratə nee mʊ tən te mʊ,' wa sʊ yəm bə bwiram a jiya nee tən tei, ba bwiya. ⁵ Mənni tə sʊwe to, 'Wa sotənna te kən nee ki go, "Kənə tʊgarang kənna bətə nya a gwa miyʊwʊng na nəttətta Niyajiyʊwi, ⁶ wai ni we me ba fau go gə ne gratə te. A wai jʊwi we kətə dəg yəm ba Niyajiyʊwʊm a yullo ji rə kʊnni bərarə yobiyan jɨnnʊ. ⁷ Jɨn nəbbə bwiram! Nən nyagʊ kən Ishaya a sʊ yəm yʊwerəm a jiya jɨni go. ⁸ 'Nəb bam be bə ni grate nən nyi bwigi, mənni furna jiyʊ nən pre nən me. ⁹ Bə ni gratə nən kʊn, bəraki bə məsatən məsarang kan jiyəng a jiya soriya nəbbi.''' ¹⁰ Ka bu kʊlən da nəbbən a be gwan giyʊ a sotən go, ''Tə kau su na tə fʊm- ¹¹ Me ji dɨgira nyiyʊ gən ji lʊgtərə niyʊ. Mənni gən ji jərera nyiyʊ, wai wʊ gə dəg ni nəngnga kʊrsən.'' ¹² Kə məssarbə ba gəm a be sotənna Yesʊwi go, ''Kən yəm mo Farisawa nwi bə ləmmang rə nwitangnga yəm bam bə ga?" ¹³ Yesʊ ka jautən go, ''Waurang kə Te miyʊ wa jiyʊ a wau bəng bən butomən. ¹⁴ Tə dʊ hanjim, hanjim dubə bə wʊrə dubəm. Duu ba wʊtən daməra duu ki waringəm ba jiyəm ba yəra bwa." ¹⁵ Bitrus ka nga sotənna Yesʊwi go, ''Jəgga bəmən bam dəgtangnga yəm be.'' ¹⁶ Yesʊ go, ''Jɨn rə kɨngniyəng berə tən kʊ tə me tənə fumtang ga? ¹⁷ Tə yəmbə to ji warigʊ wa dəgi a nyʊi yɨgira mʊra furri bə jər nyang yɨgira ta bʊnung ga? ¹⁸ Mənni jɨni jərera nyiyʊ bə jəre wa furri. Mənni ji jiirera furiyʊ gə lʊgtə ni. ¹⁹ Bəraki kəmarang kə bwirang bə jəre wa rəngsa, jurang, talte, swiyer də serəmən, kʊte, butangnga sira jiwʊn yəmbi, rə kəbgai. ²⁰ Jɨni yaiye ji lugtə ni. Mənni jautang rə bʊnaiya yəraməntangnga kaniyʊ me bə lʊgtə ni.'' ²¹ Kən Yesʊ a diməna gai a diya kʊllo bɨtətta Taya tən Sidoni. ²² Kə gʊ nyiya Kan'anai a be gaiyəng. Ka gʊg jiir go, ''Nwi kʊnnang ka miyəng, Nigra, yəllan Daudai! Yʊwiya miyʊ wa kʊnang deni rə səmba bwira." ²³ Mənni Yəsʊwa sotən bə gʊji. Məssarbə ba gəm ka be chəlla, sʊwerə go, ''Ka hangʊ a di, bəraki bə fʊngbən nən wʊri.'' ²⁴ Kən Yesʊ a nga sotən go, ''Təmiye ba gwa gʊ niyʊ a diməna mata lira ya kaita Isra'ilai." ²⁵ Mənni ka be a ru a kak ka gəng, sʊwe rə go,''Nigra, tʊgai." ²⁶ Ka ngatən a sʊwe go, ''A dautən bəwe dəb jɨni jauriya bəttəbiyʊ kwitəna betə jwai." ²⁷ Ka sʊwe go, "O o, Nigra, mənni betə jwai ka jarə kəssəllantə yəra wʊra ganang kə jau jɨni jauriwʊng ka nirə kaiyʊ wa jiyʊwʊng." ²⁸ Kən Yesʊ a nga sotən go, ''Nyʊi, nəbbəntang ka yəm bə nyam ba mʊmməng ka rə grate; masi ya yullo nən nyəngkə mən farə rəgəng.'' Yʊwi ka kwara a wai fʊlla. ²⁹ Yesʊ ka dʊ gai a di do rə wimang ka Galiliyəng. Ka gwiya həlla chichi ya gaiyəng. ³⁰ Kʊlən mwan ka be gwa giyʊ. Ka be rə jwagbe, dube, bə tənatənai yəməm na nəbbə merə kʊmniyəm mwam, na bagi bə me bwitə ləmangngəm. Ka be rəga kakka Yesʊwʊng, ka kwara rəgəng. ³¹ Bərarə nyang kʊlən ka nəngnga mənatangnga bʊni a fʊlla wa chʊbə langta bʊwa-bʊwaiyəm sʊrə yəm, tə kʊmtənəti ka kwara, jwagbe ka yoyom, dube kə chure. Kən hanjima wer Niyajiyʊwa Isra'ilayəng. ³² Yesʊ ka bʊwowʊ məssarbə ba gəm go be a gwan giyʊ ka sotən go, "Kəmən bʊm kʊlən, bəraki nən ka kin kotə tə bwanbi mənni merə ji ba jauwi. Me mən farə mo mən yo hanjim a jabə gʊji, bəri hanjim ba fənno a jʊwi." ³³ Məssarbə ka sotən go, ''Bə nən nya mwantəttə fʊm-fʊmmi tə ba switəni a le a gai we me gʊni wi wʊ ba switəna kʊlən dan di.?" ³⁴ Yesʊ ka sotənna hanjimi go,''Ka tənə mwantettə fʊm-fʊmmi tə nyənne?" Kə go, ''Nyibi rə betə laai yə me mwami." ³⁵ Kən Yesʊ sotənna kʊlən go a chiro təmmang. ³⁶ Ka dəb mwantəttə fʊm-fʊmmi nyibiyʊ te rə laatihi, a bukka nəngnga wʊnnanəng, ka kətəla mwantəttə fʊm-fʊmmi hi ka ne məssarba a ne kʊlənnəng. ³⁷ Kʊlən warigʊ ka jau a rira. Ka kʊra kəsəllanta gərməni a riro kəlte nyibi. ³⁸ Bam ba jauwʊm ji nəbbə barəm netəttə gwar, me wʊtəm tən bətəbi a mʊri. ³⁹ Kən Yesʊ a yo kʊlənnəng ka dɨgga mʊra bontəlong ka hiyəng a diya təm ba Magadaməng.