¹ Kə Farisawa tən Sadʊkiyawa birawe bɨngo hangʊwʊng, gʊlle go a nʊnggi nʊngtang a ji. ² Mənni ka nga sotənna hanjimi go, ''Fʊlla yʊwa mai ki, tə sʊwe to, 'Təmhəm ba yu bəraki ka kortə kwiyʊwʊng.' ³ Rə mori ki kətə sʊwe to, 'Ba chi fʊlla me nyagʊwi, bəraki ka kortə kwiyʊ a məra jiyəng.' Kətə yəm nyəngkə bətə jəgga kortətta jiyʊ gərəng, mənni bo tə yəm be nyəngkə bəta jəgga nʊngtang ka fʊlang gərəng. ⁴ Tangngər də bwiran tən da taltən, kə farə nʊngtang mənni me kəgai nʊngtang bən nʊngən a diməna ka Yʊnanang.'' Kən Yesʊ a dʊ hanjiməng ka diyəng. ⁵ Fʊlla məssarbe a lauwe wa kagi kɨngngəng, mənni ka tamənna dəb bə mwan də fʊm-fʊmən. ⁶ Kən Yesʊ a sotəna hanjimi go,'' Tə nəngnga den na tə yəm rə bara Farisawa tən Sadʊkiyawai." ⁷ Kə bwiranəmhəm sugara bwitan jiyʊ go, ''Bəraki nən be bə rə mwan də fʊm-fʊmənəng." ⁸ Yesʊ karə yəmtang a kang kɨng ka sʊwe go, ''Jɨn bə yəm bə nyam a yarmənəm, wʊla ma kətə sʊga yəmni a bwitan jinʊwʊng, tə sʊwerə to bəraki nən be bə rə mwan də fʊm-fʊmiyən ga? ⁹ Tə jəgga bə mənni tə kəmma bə rə mwantəttə fʊm-fʊmi tə nʊ tə jau rə netəttə nʊwi, mənni kəltə tə nyənne tə kʊra? ¹⁰ Tən mwantəttə fʊm-fʊmi nyibi tə nəb netəttə gwar, mənni bo kəltətə nyənne tə kʊra? ¹¹ Nyənne kə tə bʊna yəmtang to me mən sʊgəmən yəm a jiya mwantəttə fʊm-fʊmiyəng, mən sʊgəmən tə nəngnga dən rə jəgatang rə bariya Farisawa tən Sadʊkiyawai." ¹² Kə mənni hanjima jəgga go me mo hangʊ bə sugimən go tə nəngnga den rə bari ka mʊriya mwanəttə fʊm-fʊmi, mənni bali go hanjim a chi rə yəmtang rə məsarang ka Farisawa tən Sadʊkiyawang. ¹³ Yesʊ a be gʊtottətta bəmtənna Kaisariya-Filibiyəng, ka gʊl məssarbə ba gəm, go, ''Nəb bə sʊwe go Yəlla niyʊ nən wʊne?" ¹⁴ Kə hanjim a sʊwe go, ''Bagi bə sʊwe go nən Yohanna nəngnga batismai, bagi go nən Iliya; bagi go nən Irmiya, bagi go kwana mʊri nəbbə yʊwe yəməm." ¹⁵ Ka sotənna hanjimi go, ''Mənni jɨn tə sʊwe to mənni w``une?" ¹⁶ Kən Siman Bitrus a nga sʊwe go, ''Mə nən Kristi, Yəlla Niyajiyʊ rə yuumi." ¹⁷ Yesʊ ka nga sotənna hangʊwi go,''Wʊn dəgtən kangngi Siman yəlla Yunanai, bəraki men namte tən dʊgʊm jəgganən jɨni yaiye, mənni nən Te miyʊ ka mʊra jiyʊ. ¹⁸ Mənni bo kəmən sʊnənne, mʊ mənən Bitrus, a jiya lai we bən mʊ Ekklisiya miyʊ. Fʊggai ta kʊnnangngi me ba li kʊmnitang gʊ. ¹⁹ Bən nən bani ta dʊʊteta jiyʊ. Wʊnə ji warigʊ wʊ bən təggo a gʊsəti ba chi kən təggo ji, mənni bo wʊnə ji n'kʊwo a gʊsəti kən kʊwo a ji." ²⁰ Kən Yesʊ a ne sori məssarbə ba gəm go kari ba sotəna wʊnə ni go gənnə Kristi. ²¹ A dəbba wai fʊlla Yesʊ ka sʊ sotənna məssarbə ba gəm go a chin kwak gə diya Urshalima, gə no kʊnnang a jɨni mwam a kang ka tabəng tən nəbbə gram bə tʊng jɨniya chəriyəm, tən nəb mʊlarəm ba soriya Mʊsayəm, bən mʊktə hangʊ, na gʊg rə yuum a mʊra ko bwanbiyʊ. ²² Kən Bitrus a di rə ga kɨngəng ka su mwilantən yəma hangʊwi sʊwerə go, wai jiwa di pre nən mwe,Nigra, wai ji we kari nəngnga bwi nən mwe." ²³ Kən Yesʊ a wʊlga bwiya sotənna Bitrussi sotəna go, ''Diməna bukka miyəng, Chetan! Kən chi mən jiya təltangnga nai, bəraki jiya chi wa Niyajiyʊwi a daanbe,mənni jɨniya nəbbi ya daan." ²⁴ Nyang bo Yesʊ ka sotənna bwiranəm ba gəm, ''Wʊnə wʊ fare go gə fʊngngyə ki, a chin kwak a ko dʊr da gən, na dəb rəyang yʊwarang ka gəng na fʊngngiye. ²⁵ Bəraki warigʊ wʊ farə go gə yiya yuum ba gəmmi ba bʊna, mənni wa bʊna yuum ba gəm bəra nən me ba nya. ²⁶ Mənni gən tənə fini tə nyatang kə ni ba nyani nyəngkə nya gʊsəte warigʊ na bʊna yuum ba gəməng? Mənni wʊlai ji ni ba nəbbən ka fʊlga yuum ba gəm rəgi? ²⁷ Bəraki yəlla niyʊ ba be a mʊra gratəttan Ten gʊwi rə weni təmriyan gʊ. Ki ba nee jangəmi wʊnə ni a swigo tən jiya nəngngai. ²⁸ Yəm bə nyam mən sʊgəmən, karə bə ka sira gaiwʊm bə me ba məbra bwiyatəm bera fʊlla chu yəlla niyʊ bera dʊʊtətang gʊwi.