¹ A bukka kotəttə nukkʊnəng Yesʊ ka dəb Bitrus, Yakʊbu tən Yohana, wʊn chiyʊ, ka di rəga kagi bang kə pəlləngngəng. ² Kən fʊlgamən bwiyang gʊ a hanjimi. Kak ka gəng ka yən nyəra ko, dʊtəttan gʊ bo ka yən kəlbare. ³ A gaiyəng, Mʊsa tən Iliya ka jɨrtəne wa hangʊwi sʊga yəmni kin. ⁴ Bitrus ka nga sotəna Yesʊwi go, ''Nigra, ka nəngnga nya gʊ kənən ka gʊng. Bən nga ki, bən nəngnga kʊngngoi tə bwanbi a gwe-din nən dəmən, din da Mʊsan, din da Iliyan.'' ⁵ Ka jiya sʊtang a yəməng, go nyəng, kwetərei ka məra hanjim, go nyəng, hanjim kə nwi jiir a jəre wa kortihi go, ''Waiwʊn Bwe dai ya miyʊ, wʊmən nwi ləmmang ka gəng dəniyʊ. Tə kautən su we.'' ⁶ Nəb təmrəm a nwiyəng, katəttan jiyʊ ka yəra mənni ka nwi tatə rə kwani. ⁷ A gaiyəng kən Yesʊ a be məbra hanjiməng ka sotən go, ''Tə gʊno na kari bətə nwi tate.'' ⁸ A gʊg nutəng a chubə gʊni a diməna Yesʊwi gən kwan. ⁹ Hanjim fiməne ra bangngəng, Yesʊ ka ne sori, go kari bətə sotən kang churang kang ka gʊ, tə yam Yəlla Niyʊ a gʊnna bwiyatə kali kini.'' ¹⁰ Məssarbə ba gəm ka gʊl, go, ''Wʊlai ya ma kə nəb mʊlarəm a sʊwe go a chin kwag Iliya gə ba be rə jigʊwʊng?'' ¹¹ Yesʊ ka nga a sotən go, ''Iliya ba be a ri wʊni ji warigʊ. ¹² Mənni kən sʊgəmən, Iliya ka be kʊni, mənni hanjim a jəgga be. A nyangngi, hanjim ka nəngnga jiya chʊ rə sərri nən hangʊ. A jʊwi kwani bo, “Bwe Niyʊ ba no kang kʊnang nyang a kanan jiyʊ.'' ¹³ Kə məssarba jəgga go hangʊ bə sʊ yəmma jiya Yohanna nəngnga batismai. ¹⁴ Hanjima be gwa nəbbiyəng, gʊ ni ka betəna hangʊwi ka rʊwa kak ka gəngngəng, go, ¹⁵ ''Nigra, nwi kʊnang ka yella miyʊwʊng, dəllatəkwi dare no kʊnang rə kwani. Jəttə kwang ki ka nyəngtəna mʊgʊng, gʊ ko ki a hi. ¹⁶ Kən betəne rəga məssarbə ba mʊm, mənni a dəmən ba kwara rəge.'' ¹⁷ Yesʊ ka jautən go, 'Tangngər də bwirəm də me bə nga yəm bə nyaməm, yɨgira wʊnə fʊla gʊ bən dəmən chi nən jɨni? yɨgira wʊnə ji gʊ bən dəmən mida nən jɨni? Tə be məne gəre.'' ¹⁸ Yesʊ ka kwertən yəm rə kʊmni ya səmba bwira hi, mənni ka jɨrməne wa hangʊwi, kə bwe hiya kwara a wai fʊlla rə kwang. ¹⁹ Kə məssarba be nya Yesʊ a kɨngngəng ka sotən go,'' wʊlai ba dang ki nən jəgbəng?'' ²⁰ Yesʊ ka sotəna hanjimi go ''Bəraki yəm bə nyam ba jɨnəm ka yərmən re kwani. Yəm bə nyam kəmən sʊgəməne, katənə yəm bə nyam nyəra bə mʊstardi ki bə tə dəmən tə sotənna bang kə to kərməna gai, ki ba kərməna gai, merə ji me ba dəmən na nəngnga bwi nən jɨni. ²¹ Mənni bo wai we bwirai waiwe me ba dəmən na jɨr, a diməna, rʊwatangnga nyini tən sotangnga hi ki? ²² A jiwʊ ka mʊra Galiliyʊ, Yesʊ ka sotəna məssarbə ba gəm go, ''Yəlla Niyʊ bən dəgtəna nəbba kang. ²³ Mənni ba jʊ hangʊ, a ko bwanbiyʊ ki, hangʊ ba gʊn,'' kə məssarba nəngnga fur də yulʊwənnəng. ²⁴ A fʊlla wa birawa Kafarnahummi, kə nəbba kʊra gʊlotta chəmmər da dʊrəni, a be nya Bitrussəng ka sotən go, ''Ni Məssariya jɨnʊ me bə mər gʊlo chəmmər dən kʊrarən ga?'' ²⁵ Ka jautən go, ''O,'' mənni fʊlla Bitrus a dɨgiya mʊra kaiyʊ, Yesʊ ka sotən yəmma hangʊwi rə jigʊ. go,'' Kəmma wʊlai, Siman? Dʊʊbə ba Təm bə kʊnəməm bə kʊra chəmmər da dʊrən tən da təmən a gwa ba wʊni? A mʊra nəbba təməm tən nəbbə berəm ga?'' ²⁶ Kən Bitrus go'' a gwa nəbbə berəmmi,'' Yesʊ ka jautəna hangʊwi,'' mənni nəbba təməm me mʊriya bə mər chəmmərəm. ²⁷ Mənni bo me nən fare no nən dəg nəbbə kʊra chəmmər da dʊrənəm a nəngnga ji bwira, tə yɨgiya nyiya wəmmangngi, na tə mai baniya laati na tə tʊwa wə laate rə jigʊwi a jərewa tariyʊ. A fʊla tə wʊmən nyiyang gʊwi ki, bətə nya chəmmər. Tə jəgge natə nəbbən na nəbbə kʊra chəmmər da dʊrənəm dinang tən dʊmən.''