¹ A wai fʊlla məssarbə ka be gwa Yesʊwi a sʊwe go, "Wʊnə ga li grate a dʊʊtəta jiyʊ?" ² Kən Yesʊ a buwe bwe kəttəlegʊwi a be gwa giyʊwʊng, ka si gra jugər da jiyənnəng. ³ Ka sʊwe go, ''Bə nyam kimən sʊgəmənne, tə wʊlga be tə yullo nyəra bətəm be kətəl-ketələm ki, merə nyəngkə bətə dɨggi rəga dʊʊtətta jiyʊwiyəng. ⁴ Bərarə nyang, wa səg dʊr nyəra bwe kətəlegʊwi, ga li grata dʊʊtəta jiyʊ. ⁵ Wa yʊ bwe kətəlli nyəra we a mʊra dʊn da miyənni, ka yʊwi. ⁶ Mənni wa dəg kwan a mʊra bətəmbə kətəlem ba nəbbən yəm bə nyaməm a nəngnga jɨni bwiraiyʊ, bʊmni kwaitən nər a kwir da gən na maiya mʊra wimang kə wʊlʊlʊng. ⁷ Jiya kʊnangngi rə gʊsəte bərarə jiya təltangngi! A chin kwak tai jɨtta be, mənni jiya kʊnangngi rə ni wʊ a gwa giyʊ gʊ tai jɨttə ba bei! ⁸ Ki kang ka mʊng, ki naka mʊng ba dəgəna təltang ki, mwemən na masəre. Ba linən nyagʊ dɨgi ya yuum rə jwagte, nyəngkə bən maiyən na mʊgong kə kʊrəkwangngəng rə kanamʊ təsʊ rə nani təsʊwʊng. ⁹ Ki nu wa mʊ ba dəgən təl na ki, jəgmən, massəre. Ba linən dɨga yuum rə nu kwan, kə bən maiyənna mʊgong kə kʊrəkwangngəng rə nuttə təsʊwʊng. ¹⁰ Tə nəngnga dən kari bətə yəgtən sʊwa bə kətəl-kətələm be. Men sʊgəmən mo jʊtəkwang a ji, weni təmriyan jiyʊ bə jəga kak ka Tə miyʊ ka jiyʊwʊng. ¹¹ Yəlla Niyʊ wa be go nagə yiya jiya lei. ¹² Kəmarang ka mʊng wʊlai? Ki ni karə matə be kwan, na kwan a le ki, me ba dʊ yə fur wʊrwin a jɨr wʊrwini a kɨng a həlla ki ka diya fauwe wa lei ga? ¹³ A nya ki, yəm bə nyam kə mən sʊgəmənne, ba nəngnga fur də kwauwʊn a jiya nyatang ka waiwa leiyəng, a li ka fur wʊrwin a jər wʊrwin ya lira bi. ¹⁴ Nyang bo, me fautang ka Tə jɨnʊ wa jiyʊwʊng go gʊ a mʊra bə kətəl-kətələm be a kiya. ¹⁵ Chʊm a nəngnga nən bwiran ki, yɨgi sotən bwiran da gən, a sətənni tan junu dang nən jɨn, mwe tən kin dang nən jɨn. A kanən su ki, kən kauwe bwi nən chʊm. ¹⁶ Mənni a kwila kabə su ki, yɨgi tən bagi bəsʊ ki ba lau bə bwanbi ki a yullo bə ba bu bʊggəm, bəraki a nyiya bə bʊrə buggən bəsʊ, ki, bə bwanbi ki, mən nya bwantətə sabbi we. ¹⁷ Na bo a kwila nwitang ka jiyəng ki, di rə yəmhəm a gwa Ekklisiyai. A kwila nwi bə Ekklisiya ki, tə tiya yullo nyəra rə ni me wa Yahudawai tən ni yʊ chəmmər da dʊrən ni. ¹⁸ Yəm bə nyam kəmən sʊgəmənne, ji tə bʊwa gʊsəti warigʊ ba yullo jɨn bʊwa jiyʊ. Jiwʊ tə kʊwo a gʊsəti, kən kʊwo a ji. ¹⁹ Bo kəmən sʊgəməne, ki nəb bəsʊ ba nga a jiya ji tə chəllai warigʊ ki, Te miyʊ wa jiyʊ ba nəngnga gəmən. ²⁰ A gʊ nəb bəsʊ ki bə bwanbi ki a kʊra bwiwi a mʊra dʊn da miyənni, mən ka jʊgər da jiyən." ²¹ Bitrus ka be sotənna Yesʊwi go, ''Nigra, chiyamiyʊ ba nəngngaimən bwiran kali tə nyənnə kin yʊnotən? Ba lau kali nyibi ga?" ²² Yesʊ a sotən go, ''Sʊnnən bə mo kali nyibi, mənni nyibi a lau kali fur nyibi. ²³ Bərarə nyang, bən bɨngo dʊʊtətta jiyʊ rə gʊ nidʊ wʊ farə go gə ke gənna gʊ wʊ ka kangnga bwiranəm ba gəmmi. ²⁴ A sʊ kerəng, kən betəne rə kwan a mʊra bwiranəm ba gəm bə hangʊ fʊng sʊnni talenti nettə kwʊwʊm. ²⁵ A chi merə ji ba mər gəriyəng, nigra kaiyʊ wang gʊ ka dəg go mii hangʊ, tən nyʊi yang gʊ rə bətəmba gəm rə ji karə gi warigʊ, bəra mərtang. ²⁶ Kə kewe hi a yərra təmməng, ka rʊwa kak ka nigra gʊwʊng go, 'Nigra, nəngngai mən mitang ka daang, bən mər jiwʊn yʊwi warigʊ.' ²⁷ Bərarə nyang, nigra kewe hi ka nwi bʊmte, ka jamen kang a yʊnotən sʊni hiyəng. ²⁸ Mənni a bukkən jamən kewe hiyəng, ka yɨga nya gʊ kewe nyəra nən ge wʊ hangʊ fʊng sʊni dinari be kwani. Ka tau, a chərra kwir, ka sotən go, 'Məri sʊni mən fʊngngənni.' ²⁹ Mənni chi wʊn kewe ya chəlla go, 'Nəngngai mən mitang ka daang, bən mərən jiwʊn yʊwi warigʊ.' ³⁰ Mənni kewe rə jigʊwi ka kwila. A jiya nyangngi, ka dəg mai chi wʊn kewe a jarəm yɨgira fʊlla ba mər sʊni hiyʊ. ³¹ Bagi kewe ta chu jiya nəngnga bwiyʊwʊng, hanjim ka lʊktə furni deni. Ka yɨga sotəna nigra jiyʊ jiya nəngnga bwiyʊ warigʊwi. ³² Kə nigra kewe hiyʊ a buweng, ka sotən go, 'Mwe kewe bwira, kən yʊnonən sʊni warigʊ, bəraki kən chəllai. ³³ Mənni a dautən bə we mʊ rə kʊmong nəngngatəna chʊm ni wʊn kewei nyəra nyəngkə nəngnganən gərəng ga?' ³⁴ Nigran gʊ ka nəngnga jwagər, ka yagtənna nəbbə nəbən kʊnangngəmən, yɨgira fʊlla ba mər ji wʊn fʊngri warigʊwi. ³⁵ Nən nyang rə Te miyʊ wʊ ka jiyʊ ba nəngnga gəmən nyang, kə gʊwan jɨnnʊ me ba yʊnotənna chi a furiyangʊ ki.''