¹ A bukkən Yesʊ a mwarmən yəmniyəng ka dʊ Galilyəng a be gʊtəttortətta Yahudawai, a yauwʊr da laa Urdʊni. ² Kʊlən mwam ka fʊng hangʊ, ka kwararə nən hanjim a gaiyəng. ³ Kə Farisiwa a be go na tə bɨngo hangʊwʊng, ka sotən go, ''Wa jiya sori niya jamən kangnga nyʊi yang gʊ a dəmən na bwiran də nya gərən ga?'' ⁴ Yesʊ a ngatən a sʊwe go, tə ke bə ga, ''Gə wa nəngnga rə jigʊwi, a nəngnga nibari tən nyʊiyʊ? ⁵ Gə wa nəngnga warigʊwi a sʊwe go, 'Bəra nyang ni ba dʊ te tən nee a mʊrga bwi tən nyʊiyang gʊ, ji bəsʊ ka chi bwi kwan ga'? ⁶ Ji kʊ me besʊ mənni bwi kwan. Bəra nyang ji Niyajiyʊwa mʊrgai kari gʊ ba wʊtugo." ⁷ Hanjim ka sotənna hangʊwi go, "Wʊllai ya ma ki Mʊsa a nəbbən sər go nən nəbbən wang ka jaməntang a kangəng ngi?" ⁸ Ka sotən na hanjimi go, "Bəra rə furna kʊssəkʊssi ya jɨnʊ giya dəg ki Mʊsa nga gəmən go tə jamən kangnga nyʊiyəm ba jɨnəmi, mənni rə jigʊ me nən nyang. ⁹ Kəmən sʊgəmənnə niya jamən kangnga nyʊiyang gʊwi, me ji ya taltə ki, na kaubwi a na gʊwi, bə nəngnga talte; wʊ bo na nyʊi jamən kangngi bə nəngnga talte.'' ¹⁰ Kə məssarbə ba gəm a sotən na Yesʊwi go, "Kə nən nyang a ni tən nyʊiyang g gʊ, me nyagʊ nəngnga nate." ¹¹ Mənni kən Yesʊ a a sotənna hanjimi go, ''Me nəb warigʊ ba nga rə kang məsarang ke, mənni bwigi bən ngatən mo yʊwʊm. ¹² Karə bən bu tuntəm, karə bagi bo bə nəb a wʊlga hanjim a chi tuntəm. Menni karə bə dəg dʊttətta jiyʊ a chi tuntəm bərarə dʊʊtətta jiyʊ. Wʊ ba dəmən yʊ məsarang kang ki a yʊ.'' ¹³ Kən be tənnə rə bəttəm bi kətəl-kətəl mo na tiyatən kani, na rʊwatən nyini mənni məssarbə ba gəm ka milatən yəmməng. ¹⁴ Mənni Yesʊ a sotən go, "Tə dʊ bətəm bi kətəl-kətələm, kari tə dang hanjim rə betang a gwa miyʊ, bəra ki dʊʊtətta jiyʊ wa nəb nyəra nən hanjimi.'' ¹⁵ Ka tiyatən kaniya dʊttətan jiyʊwəng ka dʊ gaiyəng. ¹⁶ Kə gʊ ni a be gwa Yesʊwiyəng a sʊwe go "Ni məsari dənə swiyər də nyan gə də bən nəngnga ki nya yuum bə kʊrəkwangngəm?" ¹⁷ Kən Yesʊ a a sotənna hangʊwi go "Wʊlai ya ma ki mən nəngngai mən gʊlliyir a jiya swiyer də nyan nən?" Kwan bwigi gən ji nya, mənni kə mən farə mo nya yuum ki, so sori." ¹⁸ Kə nihi a sotən go, "Wʊnə sori?" Kən Yesʊ a a sotən go, "Kari bən nəngnga jurang, kari bən nəngnga taltə, kari bən kʊ kʊte, kari bən bʊ bukka nyarəng, ¹⁹ Ne gratə temʊ tən nemʊ, na bo yotən da niya kʊliyu nyəra dʊr da mʊn." ²⁰ Kə bwelihi a sotən go "Kən fʊng jɨni yaiye warigʊ. Wʊlai ji ben fauwi bo?" ²¹ Kən Yesʊ a a sotən go, "Kəmən farə mo chi niya ririyu ki, di na miro jɨni mən ka rəgi warigʊ na ne bə merə gəm, bən nya jɨni ya kani a ji; na mənni be fʊngngiye" ²² Mənni bwelihi a nwi ji Yesʊ a sʊweiyəng, ka kaubwi rə fur də yəlʊwʊn, bərarə ki ni rə jɨna kaniyu deni. ²³ Yesʊ ka sotən na məssarbə ba gəm go, "Bə nyam kəmən sʊgəmənne, ba chi rə bwayir ni rə jɨna kaniyʊ a dɨgiya dʊʊtətta jiyʊ. ²⁴ Kən kau bwi mən sʊgəmənne, ba chi rə dendeni kʊrmʊng a dɨgiya bwaka batəlləng, kə ni rə jɨna kaniyʊ ba dɨgiya dʊʊtətta Niyajiyʊwiyəng.'' ²⁵ Məssarbə ba gəm a nwi nyangəng, ka nəngnga mənatang a bʊni deni, Ka sʊwe go "Wʊnə gə ba nya yiyatang?" ²⁶ Kən Yesʊ a jiga hanjiməng, ka sotən go "A gwa nəbbi me bə nəngnga bwi, mənni a gwa Niyajiyʊwi wʊnə ji warigʊ wʊ nəngnga bwiyʊ. ²⁷ Kən Bitrus a ngatən a soten go "Jəga, kənən dʊwe jɨni warigʊ nən fʊngngənne. Wʊlai bənən nyai?" ²⁸ Yesʊ ka sotenna hanjimi go, bə nyam kəmən sʊgəmənne, jɨn bətə fʊngngiyem, a tangngər də fiyən, a ji wʊ Yəlla Niyʊ ba chi ya dəntələn də gran da gratəttan gʊwʊn, jɨn rə kɨngniyəng bətə chi a dəntəltəttə grai kwʊ a jir təsʊ tə nəngngatən duutətta langtətta Isra'ilai kwʊ a jir təsʊ. ²⁹ Wa dʊ kainang gʊ, chəttə bari, chəttə chʊwi, te, nee, bətəbi, na ki kʊni ki, bərarə dʊn da miyənni, ba nya kali rə kali be kwan, bo ba jau fʊla yuum bə kʊrəkwangngəmi. ³⁰ Mənni bə rə jigʊwʊm mwam, ba chi ba bugʊm, mwam ba bugʊm ba chi ba kakgəm.